రెండో దశ టీకా: తొలి రోజు మొరాయించిన సర్వర్లు.. అయినా 25 లక్షల మంది రిజిస్ట్రేషన్
దేశంలో ప్రక్రియ సోమవారం నుంచి ప్రారంభమయ్యింది. ఇందుకోసం కొ-విన్-2.0 పోర్టల్ను కేంద్రం అందుబాటులోకి తీసుకొచ్చింది. ఈ పోర్టల్లో తొలి రోజు దాదాపు 25 లక్షల మంది టీకా కోసం పేర్లు నమోదు చేసుకున్నట్లు కేంద్ర ఆరోగ్యశాఖ వెల్లడించింది. ఇందులో 24.5 లక్షల మంది సాధారణ ప్రజలు కాగా, మిగతా వారు వైద్య ఆరోగ్య సిబ్బంది, ఫ్రంట్లైన్ వర్కర్స్ ఉన్నారని తెలిపింది. టీకా కోసం 60ఏళ్లు పైబడిన వాళ్లు దరఖాస్తు చేసుకోవచ్చని కేంద్ర వైద్య, ఆరోగ్య శాఖ పేర్కొంది. టీకా తీసుకోవాలనుకునే వారు www.cowin.gov.in,ఆరోగ్యసేతు యాప్ ద్వారా తమ పేరు నమోదు చేసుకోవాలని కేంద్రం వెల్లడించిన విషయం తెలిసిందే. లేదంటే సమీపంలోని వ్యాక్సిన్ కేంద్రాలకు వెళ్లి రిజిస్ట్రేషన్ చేసుకునే వీలుంది. కొవిన్ పోర్టల్ను సోమవారం ప్రజలకు అందుబాటులోకి తెచ్చారు. అయితే, తొలిరోజు సర్వర్ మొరాయించడంతో రిజిస్ట్రేషన్ ప్రక్రియలో ఇబ్బందులు ఎదురయ్యాయి. ముఖ్యంగా ఓటీపీలు ఆలస్యంగా రావడం, దగ్గర్లోని ఆస్పత్రులు, టీకా పంపిణీ కేంద్రాల వివరాలు లైవ్లో కనిపించకపోవడం వంటి సమస్యలు తలెత్తాయి. అయితే, ఈ సాంకేతిక ఇబ్బందులను సరిచేశామని, ఇకపై రిజిస్ట్రేషన్ ప్రక్రియలో ఎటువంటి ఆటంకం ఉండదని అధికారులు తెలిపారు. రిజిస్ట్రేషన్ ప్రక్రియ చాలా సున్నితంగా ఉన్నప్పటికీ, షెడ్యూలింగ్ ఎంపిక చాలా సందర్భాలలో మొరాయించింది. మధ్యాహ్నం నుంచి ఓటీపీ, సర్వర్ సంబంధిత ఫిర్యాదులు వెల్లువెత్తాయి. అనేక ప్రైవేట్ ఆస్పత్రులు సెషన్స్ ఇంకా క్రియేట్ చేయకపోవడం వల్ల పోర్టల్లో అవి అందుబాటులో లేవు. కొన్ని ప్రభుత్వ, ప్రైవేట్ కేంద్రాలు కూడా కో-విన్ ప్లాట్ఫారమ్లో ఏకీకృతం కావడానికి చాలా ఇబ్బందులు ఎదుర్కొవడంతో పోర్టల్లో అవి కనిపించడంలో ఆలస్యమయ్యిందని అధికారులు తెలిపారు. తొలి రోజు 60 ఏళ్లు దాటిన వ్యక్తులు 1.3 లక్షల మంది, అనారోగ్య సమస్యలు ఎదుర్కొంటున్న 45-60 ఏళ్లలోపువారు 18,850 మందికి టీకా అందజేశారు. ఇప్పటి వరకు 1.5 కోట్ల మందికి మొత్తం టీకా పంపిణీ చేసినట్టు కేంద్ర ఆరోగ్య శాఖ తెలిపింది. ప్రయివేట్ ఆస్పత్రుల్లోనూ టీకా అందుబాటులోకి వచ్చినందున వచ్చే కొద్ది వారాల్లో వ్యాక్సినేషన్ పెరుగుతుందని అధికారులు పేర్కొన్నారు.
By March 02, 2021 at 08:42AM
No comments