Breaking News

అమెరికాలో పడగవిప్పిన గన్ కల్చర్.. దుండుగుడి కాల్పుల్లో 10 మంది మృతి


అమెరికాలో మరోసారి గన్ కల్చర్ పడగవిప్పింది. సూపర్ మార్కెట్‌లోకి గుర్తుతెలియని వ్యక్తి చొరబడి విచక్షణారహితంగా కాల్పులకు పాల్పడ్డాడు. ఈ ఘటనలో పది మంది ప్రాణాలు కోల్పోగా.. పలువురు గాయపడ్డారు. కొలరాడోలోని బౌల్డర్‌లో ఈ దారుణ ఘటన చోటుచేసుకుంది. కాల్పుల ఘటనతో భయాందోళనకు గురైన కస్టమర్లు ప్రాణాలను అరచేతిలో పెట్టుకుని బయటకు పరుగులు తీశారు. అమెరికాలో వారం వ్యవధిలో రెండోసారి కాల్పుల ఘటనలు చోటుచేసుకుంది. దుండగుడి కాల్పుల్లో ఓ పోలీస్ అధికారి కూడా ప్రాణాలు కోల్పోయాడు. పోలీస్ అధికారి కమాండర్ కెర్రీ యమగూచి తెలిపిన వివరాల ప్రకారం.. ‘బౌల్డర్‌‌లోని టేబుల్ మెసా ప్రాంతంలోని కింగ్‌ సూపర్‌ మార్కెట్‌లోకి గుర్తుతెలియని వ్యక్తి చొరబడి కాల్పులకు తెగబడ్డాడు.. సోమవారం మధ్యాహ్నం 2.30గంటలకు ఈ ఘటన చోటుచేసుకుంది. కాల్పుల్లో పోలీసు అధికారి సహా మొత్తం పది మంది మృతి చెందారు. కాల్పులకు పాల్పడిన వ్యక్తిగా అనుమానిస్తున్న ఒకరిని అదుపులోకి తీసుకున్నాం. దాడికి గల కారణాలు ఇంకా తెలియరాలేదు’అని ఆయన తెలిపారు. దాడి జరిగిన ప్రాంతంలో పోలీసులు అత్యవసర ఆదేశాలు జారీ చేశారని, దర్యాప్తు కొనసాగుతోందని పేర్కొన్నారు. దుండగుడి కాల్పుల్లో పలువురు ప్రాణాలు కోల్పోయారని, వీరిలో ఓ పోలీస్ అధికారి ఉన్నారని విచారం వ్యక్తం చేశారు. కస్టమర్ మాదిరిగా దుండగుడు లోనికి ప్రవేశించడంతో అక్కడి వారు ప్రమాదాన్ని పసిగట్టలేకపోయారని అన్నారు. ఈ ఘటనపై కొలరాడో గవర్నర్‌ జేర్డ్‌ దిగ్బ్రాంతి వ్యక్తం చేశారు. ‘బౌల్డర్‌లో జరిగిన విషాదకర ఘటన పట్ల దిగ్బ్రాంతికి గురయ్యా. కింగ్‌ సూపర్స్‌ వద్ద చోటుచేసుకుంటున్న పరిణామాల్ని నేను నిశితంగా గమనిస్తున్నా’ అని జేర్డ్‌ ట్వీట్‌ చేశారు. బౌల్డర్ కౌంటీ డిస్ట్రిక్ట్ అటార్నీ మిచెల్ డౌఘర్టీ మాట్లాడుతూ.. ఎంతమంది చనిపోయారే తెలియరాలేదని, ప్రస్తుతం పరిస్థితి అదుపులో ఉందన్నారు. దుండుగుడికి సైతం గాయాలైనట్టు తెలిపారు. ఇటీవల అట్లాంటాలోని రెండు వేర్వేరు మసాజ్‌ పార్లర్లపై దుండగులు కాల్పులకు పాల్పడటం సంచలనం సృష్టించిన విషయం తెలిసిందే. ఈ దాడిలో 8 మంది మరణించగా వారిలో ఆరుగురు ఆసియన్‌ అమెరికన్లే కావడం గమనార్హం. ఈ కాల్పుల ఘటనపై అమెరికాలో భారీగా నిరసనలు వెల్లువెత్తాయి.


By March 23, 2021 at 08:34AM


Read More https://telugu.samayam.com/latest-news/international-news/us-ten-killed-and-several-injured-in-colorado-supermarket-shooting/articleshow/81643137.cms

No comments