ఐదు వేల ఏళ్ల కిందటే బీర్ తయారీ.. ఈజిప్టులో బయటపడ్డ ప్రాచీన ఫ్యాక్టరీ!

ప్రపంచంలోనే అత్యంత ప్రాచీన నాగరికతల్లో ఈజిప్టు ఒకటిగా పరిగణిస్తారు. నైలు నది పరివాహక ప్రాంతంలో వెలసిల్లిన ఈ నాగరికత.. ఎన్నో చారిత్రక ఆధారాలకు సాక్షీభూతంగా నిలిచింది. ప్రపంచ ప్రఖ్యాత పిరమిడ్లు నిర్మాణానికి మచ్చు తునక. ఇదిలా ఉండగా, ఈజిప్టులో గతకొంత కాలంగా పురావస్తు శాస్త్రవేత్తల తవ్వకాల్లో పలు ఆధారాలు బయటపడ్డాయి. ఇటీవలే ఓ శవపేటిక నుంచి మమ్మీని బయటకు తీశారు. అలాగే ఓ అస్థిపంజరానికి బంగారు నాలుక ఉన్న విషయం బయల్పడింది. తాజాగా, ప్రపంచంలోనే అత్యంత పురాతనమైన బీర్‌ ఫ్యాక్టరీని పురావస్తు నిపుణులు గుర్తించారు. రాజధాని కైరో నగరానికి దక్షిణాన 450 కిలోమీటర్ల దూరంలో నైలు నదికి పశ్చిమాన ఉత్తర అబిడోస్‌ వద్ద శ్మాశానం ప్రాంతంలో ఈ బీర్‌ ఫ్యాక్టరీ బయటపడిందని, ఇందులో ఎనిమిది యూనిట్లు ఉన్నాయని ఈజిప్టు పర్యాటక, పురావస్తు శాఖ తెలిపింది. 20 మీటర్ల పొడవు, 2.5 మీటర్ల వెడల్పున్న ఒక్కో యూనిట్‌లో దాదాపు 40 కుండలు ఉన్నాయని తెలిపారు. ఈ కుండల్లో బీర్‌ తయారీకి ఉపయోగించే పదార్థాలను వేసి వేడిచేసేవారని భావిస్తున్నారు. కనీసం 5వేల ఏళ్ల కిందట కింగ్‌ నార్మన్‌ అనే చక్రవర్తి హయాంలో ఈ ఫ్యాక్టరీ నిర్మాణం జరిగి ఉంటుందని పురావస్తు శాస్త్రవేత్తలు నమ్ముతున్నారు. క్రీస్తుపూర్వం 3,150-2,613 మధ్య తొలి ఐక్య ఈజిప్టు రాజ్యాన్ని పరిపాలించిన రాజుగా కింగ్‌ నార్మన్‌కు పేరుంది. ఒకసారి 22,400 లీటర్ల బీర్‌ను ఉత్పత్తిచేసే సామర్థ్యం ఈ ఫ్యాక్టరీకి ఉందని తవ్వకాల్లో పాల్గొన్న న్యూయార్క్ యూనివర్సిటీ పరిశోధకుడు మాథ్యూ ఆడమ్స్ పేర్కొన్నారు. ఈజిప్టు-అమెరికా శాస్త్రవేత్తలు సంయుక్తంగా ఈ తవ్వకాలు చేపట్టాయి. కుండల్లో చిరుధాన్యాలు, నీరుపోసి బీరు ఉత్పత్తి చేసినట్టు ఆధారాలు తెలుపుతున్నాయి. వ్యవసాయ విప్లవం ఫలితమే బీర్ ఉత్పత్తి అని చరిత్రకారులు భావిస్తుంటారు. అడవుల్లో లభించిన ధాన్యాలను సేకరించి, కిణ్వ ప్రక్రియ ద్వారా బీర్ తయారుచేసేవారని పేర్కొంటున్నారు. ఈజిప్షియన్లు బీరుగా అమితంగా ఇష్టపడతారు. ఇక, బీరు తయారుచేసే ఫ్యాక్టరీ ఉంటుందని బ్రిటిష్ పురావస్తు నిపుణులు 1900కి ముందే ఊహించిన తవ్వకాలు ప్రారంభించినా.. దానిని గుర్తించలేకపోయారు. పురాతన ఈజిప్షియన్లు జీవితంలో బీరు ఓ అంతర్భాగంగా ఉండేదని, దానిని ఓ ఆహారంగా వారు పరిగణించేవారని బలమైన నమ్మకం. కార్మికులకు గిజా పిరమిడ్లను నిర్మించిన వారిలాగే బీర్ కూడా అవసరం. ప్రతి వ్యక్తికి రోజుకు 10 పింట్లకు పైగా రేషన్ అందజేసేవారు. బీర్‌లను మగ్‌లతో కాకుండా స్ట్రాల సాయంతో తాగేవారు. బీర్ తయారీకి వాడే పదార్థాల అవక్షేపాలు వదిలేయడానికే ఇలా చేసేవారు. ఇక, ఆరేళ్ల కిందట టెల్ అవీవ్‌లోని ఇజ్రాయెల్ యాంటిక్విటీస్ అథారిటీ (ఐఏఏ) బీర్ కాయడానికి కుండలు ఉపయోగించినట్లు ఆధారాలను తొలుత కనుగొంది.

By February 16, 2021 at 11:41AM

Read More https://telugu.samayam.com/latest-news/international-news/historians-discover-the-worlds-oldest-beer-factory-in-egypt/articleshow/80968952.cms