Breaking News

కూతురికి టైఫాయిడ్ జ్వరం.. తల్లి ఆత్మ పట్టిందని పూజలు.. చివరకు దారుణం


ప్రపంచం టెక్నాలజీ వైపు పరుగులు తీస్తోంది. ప్రస్తుతం ప్రపంచమంతా ఆధునికత వైపు అడుగులు వేస్తోంది. అయితే కొన్నిచోట్ల మాత్రం మూఢనమ్మకాల్లో ప్రజలు ఇంకా మగ్గిపోతునే ఉన్నారు. మనిషికి రోగం వస్తే... చికిత్స అందించకుండా.. ఇంకా మంత్రాలు పూజలు అంటూ... ప్రాణాలతో చెలగాటం ఆడుతున్నారు. మూఢనమ్మకాల పేరుతో ఓ కన్నతండ్రి తన బిడ్డ ప్రాణం తీశాడు. కూతరుకు టైఫాయిడ్ జ్వరం వస్తే.. చనిపోయిన తన భార్యే ఆత్మగా కూతుర్ని పట్టుకుందని నమ్మాడు. పూజల పేరుతో కన్నబిడ్డను చిత్రహింసలకు గురి చేశాడు. చివరకు ఆమె చావుకు కూడా కారణం అయ్యాడు. ఈ ఘటన తమిళనాడు రాష్ట్రంలో చోటు చేసుకుంది. కోరవల్లి గ్రామానికి చెందిన వీరసెల్వం, కవిత దంపతులు. వీరికి గోపినాథ్‌ అనే కుమారుడు, తారణి అనే కుమార్తె వున్నారు. తొమ్మిది నెలల క్రితం కవిత ఆత్మహత్యకు పాల్పడింది. కూతురు తారణి కీళక్కరైలోని ఓ ప్రైవేటు కళాశాలలో డిగ్రీ మూడవ సంవత్సరం చదువుతోంది. కొంతకాలం క్రితం వీరసెల్వం సంరక్షిస్తున్న ఆవులు, మేకలు మృతిచెందాయి. అయితే ఇందుకు కారణం ఆత్మహత్య చేసుకున్న కవిత అని చుట్టుపక్కల వారు అతనికి తెలిపారు. ఈ క్రమంలో తారణి ఒకరోజు తల్లి సమాధి వద్దకు వెళ్లి వచ్చింది. అయితే అప్పట్నుంచి తారణి అనారోగ్యానికి గురైంది. దీంతో కూతుర్ని కూడా తల్లి కవిత ఆత్మ పట్టిందని చుట్టుపక్కల వారు చెప్పడం ప్రారంభించారు. దీంతో తండ్రి తారణిని వాణి గ్రామంలో ఓ మహిళా పూజారి వద్దకు తీసుకెళ్లాడు. అక్కడ ఆమె పూజ చేసే సమయంలో కొరడా, కర్రతో తారణి తల, మెడ భాగాల్లో గట్టిగా కొట్టింది. దీంతో కూతురు అక్కడే స్పృహ తప్పి పడిపోయింది. వెంటనే ఆమెను ఆస్పత్రికి తరలించారు. టైఫాయిడ్‌ జ్వరం లక్షణాలున్నాయని డాక్టర్లు తెలిపారు. డాక్టర్ల మాట వినకుండా కుమార్తెను ఆస్పత్రి నుంచి ఇంటికి తీసుకెళ్లి దెయ్యం వదిలించేలా పూజలు చేసేందుకు సిద్ధమయ్యాడు తండ్రి సెల్వం. అలా వెళ్లిన కొంతసేపటికే తారణి జ్వరం అధికం కావడంతో మృతిచెందింది. దీంతో కుమారుడు పోలీసులకు ఫిర్యాదు చేయడంతో పోలీసులు కేసు నమోదు చేసి దర్యాప్తు చేస్తున్నారు.


By February 21, 2021 at 10:27AM


Read More https://telugu.samayam.com/latest-news/india-news/superstitious-father-kill-his-daughter-at-tamilnadu/articleshow/81133487.cms

No comments