వందేళ్ల వయసులోనూ కరోనాపై పోరాటం చేసిన ఆ లాక్డౌన్ హీరో ఇకలేరు
యుద్ధంలో శత్రువులపై పోరాటం చేసి.. కంటికి కనిపించని శత్రువు మహమ్మారితో వందేళ్ల వయసులోనూ అలుపెరగని పోరాటం చేసిన బ్రిటన్ లాక్డౌన్ హీరో ఇక లేరు. ఆయన మంగళవారం కన్నుమూసినట్టు మూరే కుటుంబం ప్రకటించింది. ఆయన అధికారిక ట్విట్టర్ ఖాతాలో ‘కెప్టెన్ సర్ టామ్ మూరే 1920-2021’ అంటూ పోస్ట్ చేశారు. కరోనా లాక్డౌన్ వేళ 100 ఏళ్ల వయసులోనూ ఆయన చేసిన పోరాటం బ్రిటన్ ప్రజలనే కాదు యావత్తు ప్రపంచం హృదయాలను గెలుచుకుంది. కరోనా మహమ్మారి బాధితులకు అండగా నిలబడేందుకు నేషనల్ హెల్త్ సర్వీసెస్కు విరాళాలు సేకరించాలని ధృఢంగా సంకల్పించిన కెప్టెన్ టామ్.. 100 ఏళ్ల వయసులో చక్రాల బండి సాయంతో బెడ్ఫోర్డ్శైర్లోని తన గార్డెన్లో నడక ప్రారంభించి దేశ ప్రజలందరినీ ఆకర్షించారు. మూరేకు మద్దతుగా మీమ్మున్నామంటూ బ్రిటన్ పౌరులు నిలవడంతో ఏకంగా 40 మిలియన్ డాలర్ల విరాళాలను సేకరించారు. కరోనాపై పోరులో సేకరించిన విరాళాల్లో టామ్ రికార్డు సాధించారు. సైన్యంలో ఉండగా తన పోరాట పటిమతో కెప్టెన్గా ఎదిగిన టామ్ చేసిన సేవలకుగానూ బ్రిటన్ ప్రభుత్వం ఆయనకు గతేడాది గౌరవ కల్నల్ హోదాను ఇచ్చింది. అంతేకాదు, కరోనాపై పోరులో దేశ ప్రజలకు అండగా కెప్టెన్ చేసిన పోరాట స్ఫూర్తికి గుర్తింపుగా అత్యున్నత పురస్కారం నైట్హుడ్కు బ్రిటన్ ఎంపిక చేసింది. టామ్ చూపిన దేశభక్తికి సాధారణ పౌరుల నుంచి బ్రిటన్ రాణి ఎలిజబెత్, ప్రధాని వరకు అందరూ ప్రశంసించారు. టామ్ నిధుల సేకరణ దేశవ్యాప్తంగా స్పూర్తినిచ్చిందని, కరోనా క్లిష్ట సమయంలో ఆయన ఒక వెలుగులా దారిచూపారని అప్పట్లో ప్రధాని బోరిస్ జాన్సన్ కొనియాడారు. కరోనా కారణంగా అతలాకుతలమైన యూకే ప్రజలకు చేయూతనివ్వడానికి వందేళ్ల వయసులోనూ ఆయన ముందుకు రావడం దేశం మొత్తం ఫిదా అయ్యింది. అందుకే గతేడాది ఆయన పుట్టినరోజు సందర్భంగా 1,25,000కు పైగానే గ్రీటింగ్ కార్డులను అందుకున్నారు. వీటిని తెరవడానికి కొంత మంది వాలంటీర్లు సహాయం చేశారంటే టామ్పై అభిమానం ఏ స్థాయిలో ఉందో అర్థం చేసుకోవచ్చు.
By February 03, 2021 at 09:56AM
No comments