Breaking News

పాక్‌తో చర్చలు: మరోసారి చక్రం తిప్పిన అజిత్ దోవల్.. ఫలించిన మంత్రాంగం!


భారత్, పాకిస్థాన్ మధ్య నానాటికి సంబంధాలు దిగజారుతున్న వేళ.. అనూహ్యంగా ఇరు దేశాలూ చర్చలకు శ్రీకారం చుట్టడం శుభపరిణామం. బుధవారం హాట్‌లైన్ ద్వారా భారత్, పాకిస్థాన్ డైరెక్టర్ జనరల్స్ ఆఫ్ మిలటరీ ఆపరేషన్స్ (డీజీఎంవోలు) మధ్య కీలక చర్చలు జరిగిన విషయం తెలిసిందే. సంబంధాలను మెరుగుపరుచుకునే దిశగా ఈ చర్చలు జరిగాయి. ప్రధానంగా ఇరు దేశాల మధ్య నెలకున్న అపోహలను తొలగించుకోడానికి సమయానుకూలంగా చర్చలకు వీలుగా హాట్‌లైన్‌ అనుసంధాన వ్యవస్థను ఏర్పాటు చేసుకోవాలని నిర్ణయించాయి. సరిహద్దుల్లో కాల్పుల విరమణ ఉల్లంఘన, చొరబాట్లు తదితర సమస్యలను చర్చల ద్వారా పరిష్కరించుకోవాలనే విషయాలపై చర్చల్లో ప్రధానంగా డీజీఎంవోలు దృష్టిపెట్టారు. అయితే, ఈ చర్చల వెనుక జాతీయ భద్రత సలహాదారు కీలక పాత్ర పోషించినట్టు తెలుస్తోంది. చర్చల అనంతరం ఇరుదేశాల డీజీఎంవోలు సంయుక్త ప్రకటన విడుదల చేయడంలో అజిత్‌ దోవల్ అన్నీ తానై వ్యవహించినట్టు సమాచారం. ఈ విషయంలో కొన్ని నెలల ముందే పాక్‌ జాతీయ భద్రత సలహాదారు ముయీద్‌ డబ్ల్యూ యూసుఫ్‌తో దోవల్ రహస్యంగా చర్చలు జరిపారు. అంతేకాదు, విదేశీయ వేదికగా దోవల్‌-యూసుఫ్‌ మధ్య ప్రత్యక్ష సమావేశం కూడా జరిగిందని భోగట్టా. తెర వెనుక చర్చలు, మంతనాల వివరాలను హోంమంత్రి అమిత్‌ షా, రక్షణ మంత్రి రాజ్‌నాథ్‌ సింగ్‌కు దోవల్‌ ఎప్పటికప్పుడు చేరవేసినట్లు చెబుతున్నారు. ఇదిలా ఉండగా, నియంత్రణ రేఖ గుండా కాల్పుల విరమణ ఒప్పందాన్ని కఠినంగా అమలు చేసేందుకు భారత్‌-పాక్ నిర్ణయించడాన్ని జమ్మూ కశ్మీర్‌‌లోని రాజకీయ పార్టీలు స్వాగతించాయి. నేషనల్‌ కాన్ఫెరెన్స్‌ (జేకేఎన్‌సీ), పీపుల్స్‌ డెమోక్రటిక్‌ పార్టీ (పీడీపీ), వేర్పాటు వాద సంస్థ హురియత్‌ కాన్ఫరెన్స్‌‌లు హర్షం వ్యక్తం చేశాయి. కాల్పుల విరమణకు సంబంధించి ఇరు దేశాల సంయుక్త ప్రకటన ఆచరణలో పక్కాగా అమలు కాగలదన్న విశ్వాసాన్ని జేకేఎన్‌సీ వ్యక్తం చేసింది. ఇరు దేశాల మధ్య జరిగిన ఈ నిర్ణయంతో సరిహద్దు గ్రామాల్లోని ప్రజలకు కష్టాలు తీరి, అందరిలాగా సాధారణ జీవనానికి అలవాటు పడగలరని పీడీపీ వ్యాఖ్యానించింది. సరిహద్దుల్లో నివసిస్తున్న ప్రజలకు కాల్పుల విరమణ నిర్ణయం గొప్ప ఊరట అని హురియత్‌ నేత మిర్వాయిజ్‌ ఉమర్‌ ఫరూక్‌ ఒక ప్రకటనలో పేర్కొన్నారు.


By February 26, 2021 at 10:18AM


Read More https://telugu.samayam.com/latest-news/india-news/nsa-ajit-doval-led-secret-back-channels-talks-with-pak-for-months-before-dgmo-pact/articleshow/81222126.cms

No comments