Breaking News

అసోంలో బీజేపీ బిగ్ షాక్.. హ్యాండిచ్చిన మిత్రపక్షం


అసోం అసెంబ్లీ ఎన్నికల వేళ.. అధికార బీజేపీకి మిత్రపక్షం ఊహించని షాక్ ఇచ్చింది. బీజేపీతో ఐదేళ్లు అంటకాగిన బోడోల్యాండ్‌ పీపుల్స్‌ ఫ్రంట్‌.. ప్రతిపక్ష కాంగ్రెస్‌ నేతృత్వంలోని మహాకూటమిలో చేరింది. ఈ విషయాన్ని బీపీఎఫ్‌ పార్టీ అధినేత హగ్రామా మొహిలరీ శనివారం ఫేస్‌బుక్ ద్వారా వెల్లడించారు. ‘శాంతి, సమైక్యత, అభివృద్ధి సహా స్థిరమైన ప్రభుత్వం, అవినీతి రహిత అసోం కోసం మహాజాత్‌లో బీపీఎఫ్ చేరాలని నిర్ణయించింది.. బీజేపీతో ఎక్కువకాలం బీపీఎఫ్ కలిసి ఉండలేదు.. వచ్చే ఎన్నికల్లో మహాకూటమితో కలిసి పనిచేస్తాం’ అని హగ్రామా తన ఫేస్‌బుక్ అకౌంట్ ద్వారా ప్రకటించారు. ఇక, కోక్రాఝార్‌ ప్రాంతంలో బలంగా ఉన్న బీపీఎఫ్.. 2005లో ఏర్పాటయ్యింది. గత ఎన్నికల్లో ఈ పార్టీ 12 స్థానాల్లో విజయం సాధించింది. అనంతరం బీజేపీ ప్రభుత్వంలో చేరింది. అంతకు ముందు కూటమి నుంచి రెండుసార్లు పోటీచేసింది. అయితే, గత ఏడాది చివరలో కొత్త భాగస్వామిని చేర్చుకుని బోడో ఆధిపత్య ప్రాంతాల్లోని స్వయం పాలక సంస్థ బోడోలాండ్ టెరిటోరియల్ కౌన్సిల్ (బీటీసీ)ను బీజేపీ ఏర్పాటుచేసింది. బీజేపీ సంకీర్ణ ప్రభుత్వంలో బీపీఎఫ్ నుంచి ముగ్గురికి మంత్రి పదవులు దక్కాయి. గతేడాది డిసెంబరులో జరిగిన బీటీసీ ఎన్నికల్లో 40 స్థానాలకు గానూ 17 చోట్ల గెలిచి అతిపెద్ద పార్టీగా బీపీఎఫ్ అవతరించింది. ఈ ఎన్నికల్లో 12 సీట్లు సాధించిన యునైటెడ్ పీపుల్స్ పార్టీ లిబరల్ (యూపీపీఎల్)కు కేంద్ర హోం మంత్రి అమిత్ షా శుభాకాంక్షలు తెలిపారు. కొద్ది రోజుల తర్వాత యూపీపీఎల్ చీఫ్ ప్రమోద్ బోరోను బీటీసీ చీఫ్ ఎగ్జిక్యూటివ్ మెంబర్‌గా సీఎం శర్వానంద్ సోనోవాల్ ప్రకటించారు. అంతేకాదు, వచ్చే ఎన్నికల్లో బీపీఎఫ్‌తో కలిసి ఎన్నికల్లో పోటీచేయబోమని అసోం ఆర్ధిక మంత్రి హిమాంత బిస్వా స్పష్టం చేశారు. కేవలం ఐదేళ్లు మాత్రమే కలిసి ఉండాలని సంకీర్ణ ప్రభుత్వ ఏర్పాటు సమయంలోనే ఇరు పార్టీలూ ఏకాభిప్రాయానికి వచ్చాయని అన్నారు. గత ఎన్నికల్లో మొత్తం 126 అసెంబ్లీ స్థానాలకు గానూ 60 సీట్లతో బీజేపీ అతిపెద్ద పార్టీగా అవతరించింది. స్వతంత్రుల మద్దతుతో బీజేపీ ప్రభుత్వాన్ని ఏర్పాటుచేసింది. ఇక, అసోం అసెంబ్లీకి మూడు దశల్లో ఎన్నికలు జరగనుండగా.. ఫలితాలు మే 2న వెలువడనున్నాయి.


By February 28, 2021 at 11:54AM


Read More https://telugu.samayam.com/latest-news/india-news/assam-elections-bjp-ally-bpf-joins-congress-alliance-before-polls/articleshow/81254551.cms

No comments