రాజ్యసభ సమావేశాలు రీషెడ్యూల్.. తొలివిడత ముందే ముగింపు

పార్లమెంట్ బడ్జెట్ సమావేశాలు జనవరి 29న ప్రారంభం కాగా.. కోవిడ్-19 వ్యాప్తి నేపథ్యంలో రాజ్యసభ, లోక్‌సభలను వేర్వేరు సమయాలలో నిర్వహిస్తున్నారు. బడ్జెట్ సమావేశాలు ప్రారంభం రోజున రాష్ట్రపతి రామ్‌నాథ్ కోవింద్ ఉభయ సభలను ఉద్దేశించి ప్రసంగించారు. అనంతరం ఆర్ధిక సర్వేను కేంద్ర మంత్రి నిర్మలా సీతారామన్ ప్రవేశపెట్టారు. సోమవారం (ఫిబ్రవరి 1న) బడ్జెట్‌ను ఆర్ధిక మంత్రి ప్రవేశపెట్టనున్నారు. పార్లమెంట్ బడ్జెట్ సమావేశాలు రెండు విడతలలో ఏప్రిల్ 8 వరకు నిర్వహించనున్నారు. కోవిడ్-19 నేపథ్యంలో రాజ్యసభ ఉదయం 9 గంటల నుంచి మధ్యాహ్నం 2 గంటల వరకు, లోక్‌సభ సాయంత్రం 4 గంటల నుంచి రాత్రి 9 గంటల వరకు జరుగుతుంది. తొలి విడత జనవరి 29 నుంచి ఫిబ్రవరి 15 వరకు, రెండో విడత మార్చి 8 నుంచి ఏప్రిల్‌ 8వరకు జరగనున్నాయి. అయితే, రెండు దశలుగా జరుగుతున్న బడ్జెట్‌ సమావేశాల తొలి విడత నిర్ణీత షెడ్యూలు ప్రకారం ఫిబ్రవరి 15న కాకుండా ఫిబ్రవరి 13న ముగియనుంది. గ్రాంట్లకు సంబంధించిన డిమాండ్ల పరిశీలనకు వీలుగా రాజ్యసభ సమావేశాలను కుదించారు. రెండో దశ సమావేశాలు నిర్ణీత షెడ్యూలు ప్రకారం మార్చి 8న ప్రారంభమవుతాయి. రాజ్యసభ సమావేశాల నిర్వహణపై అఖిలపక్షం నేతలతో ఉపరాష్ట్రపతి, రాజ్యసభ చైర్మన్‌ ఎం.వెంకయ్యనాయుడు ఆదివారం సమావేశమయ్యారు. ఈ సందర్భంగా ఆయన మాట్లాడుతూ.. సమావేశాలు సజావుగా, అర్థవంతంగా జరిగేందుకు సహకరించాలని అఖిల పక్ష నేతలకు విజ్ఞప్తి చేశారు. సభలో జరిగే అన్ని చర్చలకూ హాజరు కావాలని కోరారు. ఈ భేటీకి ఆరుగురు కేంద్ర మంత్రులు, వివిధ పార్టీలకు చెందిన దాదాపు 25 మంది నేతలు హాజరయ్యారు. సమావేశాలు సజావుగా, అర్థవంతంగా జరిగేందుకు సహకరిస్తామని వారు వెంకయ్యనాయుడుకు హామీఇచ్చారు. అలాగే.. రాష్ట్రపతి ప్రసంగంపై ధన్యవాదాలు తెలిపే తీర్మానంపై, బడ్జెట్‌పై చర్చకు మరింత సమయాన్ని కేటాయించాల్సిందిగా నేతలు కోరారు. దీనికి సానుకూలంగా స్పందించిన వెంకయ్య.. తగిన ఏర్పాట్లు చేయాల్సిందిగా పార్లమెంటరీ వ్యవహారాల శాఖ మంత్రి ప్రహ్లాద్‌ జోషీకి సూచించారు. అయితే, సభ్యులు సమయ పాలన పాటించాలని, తమ ప్రసంగాలను వీలైనంత చిన్నగా ఉండేలా చూసుకోవాలని సూచించారు.

By February 01, 2021 at 07:13AM

Read More https://telugu.samayam.com/latest-news/india-news/budget-session-of-the-rajya-sabha-rescheduled-will-conclude-two-days-before-schedule/articleshow/80621430.cms