మాయమాటలతో మైనర్‌ను తల్లిచేసిన యువకుడు.. బెయిల్ విషయంలో కోర్టు సంచలన నిర్ణయం

వివాహమైన విషయాన్ని దాచిపెట్టి మైనర్ బాలికను నమ్మించి, ఆమెతో శారీరక సంబంధం పెట్టుకుని 16 ఏళ్లకే తల్లిని చేశాడు ఓ యువకుడు. దీంతో అతడిని పోలీసులు అరెస్ట్ చేసి జైలుకు తరలించారు. తాజాగా, అతడికి న్యాయస్థానం బెయిల్ మంజూరు చేసింది. బాలికను తాను వివాహం చేసుకుంటానని నిందితుడు అంగీకరించడంతో ఈ నిర్ణయం తీసుకుంది. బాలిక మేజర్ అయిన తర్వాత తాను వివాహం చేసుకుంటానని నిందితుడు హామీ ఇచ్చాడు. పోలీసులు తెలిపిన వివరాల ప్రకారం.. నిందిత యువకుడు(25)తో బాలిక తండ్రికి పరిచయం ఉండటం వల్ల అతడు వారికి రాకపోకలు సాగించేవాడు. ఈ క్రమంలో బాలికతో సన్నిహితంగా మెలిగాడు. అప్పటికే తనకు వివాహమైనా.. ఆమెను పెళ్లి చేసుకుంటానని నమ్మించి, లోబరుచుకున్నాడు. బాధితురాలితో శారీరక సంబంధం నెరపడంతో ఆ బాలిక గర్భం దాల్చింది. ఈ విషయం తెలిసిన బాలిక తల్లిదండ్రులు అతడిపై పోలీసులకు ఫిర్యాదు చేశారు. తనతో సంబంధం గురించి బయటపెట్టవద్దని తమ కుమార్తెను బెదిరించినట్టు పేర్కొనడంతో అతడిపై అత్యాచారం కేసు నమోదయ్యింది. నిందితుడిని గతేడాది అక్టోబరు 23న అరెస్టు చేసిన పోలీసులు, జైలుకు పంపారు. రిమాండ్‌లో ఉన్నప్పుడు తొలుత నిందితుడు బెయిల్‌ కోసం ప్రయత్నించగా.. అతడి పిటిషన్‌ను కోర్టు కొట్టివేసింది. తాజాగా రెండోసారి పోక్సో కోర్టులో బెయిల్‌కు దరఖాస్తు చేసుకున్నాడు. విచారణ సందర్భంగా.. తాను ఆ బాలికకు 18 ఏళ్లు రాగానే పెళ్లి చేసుకుంటానని న్యాయమూర్తి ఎదుట అంగీకరించాడు. అంతేకాదు, యువకుడి మతం బహు భార్యాత్వానికి అంగీకరిస్తుందని అతడి తరఫు న్యాయవాది వాదించారు. తనకు పుట్టబోయే బిడ్డకు తండ్రి అతడేనని, తననే వివాహం చేసుకుంటానని తన కుమార్తె కూడా చెబుతుందని బాధితురాలి తల్లి అఫిడవిట్‌ సమర్పించింది. కానీ, అతడికి బెయిల్‌ మంజూరు చేయవద్దని పోలీసులు వాదించారు. అతడికి రెండో వివాహానికి మొదటి భార్య అంగీకరిస్తుందనడానికి ఎటువంటి ఆధారాలు లేవని పేర్కొన్నారు. అంతేకాదు, పరిణామాలను అర్థం చేసుకోలేకపోయిన మైనర్‌ బాలిక అతడి వలలో వ్యక్తి చిక్కుకుందని, ఇప్పుడు ఆమెను వివాహం చేసుకోవడానికి ముందుకొచ్చి పరిస్థితిని తనకు అనుకూలంగా ఉపయోగించుకోవాలని చూస్తున్నాడని పోలీసులు వివరించారు. ఇరు వర్గాల వాదనలు విన్న పోక్సో న్యాయస్థానం నిందితుడికి బెయిల్‌ మంజూరు చేసింది. ‘నిందితుడి మొదటి వివాహం గురించి తెలియదని చెప్పలేం.. మైనర్‌కు 18 ఏళ్లు నిండితన తర్వాత అతడు వివాహం చేసుకోవాలని భావిస్తున్నాడు..ఆమె కూడా అతడిని వివాహం చేసుకోవడానికి ఇష్టపడుతుంది.. ఈ వ్యవహారం ఏకాభిప్రాయ సంబంధానికి సంబంధించినది.. నిందితుడిని ఈ సమయంలో నిర్బంధంలో ఉంచాల్సిన అవసరం లేదు’ అని జడ్జ్ వ్యాఖ్యానించారు.

By January 29, 2021 at 11:33AM

Read More https://telugu.samayam.com/latest-news/crime/married-man-offers-to-marry-16-year-old-girl-he-impregnated-gets-bail-by-mumbai-pocso-court/articleshow/80560290.cms