కరోనా భయం.. ఆ నగరాల్లోని ప్రజలు ఇళ్ల నుంచి బయటకు రాకుండా చైనా కఠిన ఆంక్షలు
వుహాన్ నగరంలో కఠిన ఆంక్షలు విధించి కరోనా వైరస్‌‌ను కట్టడి చేసిన చైనా.. పలు నగరాల్లోనూ అటువంటి చర్యలనే చేపడుతోంది. హెబీ ప్రావిన్సు పరిధిలోని షిజియాజువాంగ్ నగరంలో కఠిన ఆంక్షలు విధిస్తూ అధికారులు ఆదేశాలు జారీ చేసింది. కోవిడ్-19 వ్యాప్తిని అరికట్టడానికి షిజియాజువాంగ్ ప్రజలు ఇళ్ల నుంచి బయటకు రావద్దని ఆదేశించారు. జనవరి 19 వరకు ఇంట్లోనే ఉండాలని సూచించారు. షిజియాజువాంగ్ పొరుగున ఉన్న జింగ్తాయ్ నగరంలోని ప్రజలందరికీ వారం రోజుల కిందట న్యూక్లియిక్ యాసిడ్ పరీక్షలు నిర్వహించారు. వారందరినీ ఏడురోజుల పాటు ఇళ్ల నుంచి బయటకు రానీయలేదు. జింగ్తాయ్, నాంగోంగ్‌లలో మినహా పలు నగరాల్లో ప్రజలు శనివారం నుంచి తిరిగి సాధారణ జీవితం ప్రారంభించడానికి అనుమతించారు. హెబీ ప్రావిన్సులోని షిజియాజువాంగ్, జింగ్తాయాలలో 553 మందికి వైరస్ నిర్ధారణ అయ్యింది. దీంతో ఈ నగరాల్లోని ప్రజలు ఏడు రోజుల పాటు ఇళ్లలో నుంచి బయటకు రావద్దని చైనా సర్కారు ఆదేశాలు జారీ చేసింది. దీంతో మొత్తం 22 మిలియన్ల మంది ప్రజలు ఇళ్లకే పరిమితమయ్యారు. ప్రజా రవాణాను పూర్తిగా నిలిపివేసి, వివాహాలు, అంత్యక్రియలను రద్దు చేసింది. బీజింగ్ సమీపంలోని లాంగ్‌ఫాంగ్, ఈశాన్య ప్రావిన్సులు హిలాంగ్జియాంగ్‌ను కూడా అధికారులు దిగ్బంధం చేశారు. తొలిసారి వుహాన్‌లో వెలుగుచూసిన తర్వాత చైనా అధికారులు ప్లేబుక్‌ను రూపొందించారు. మహమ్మారి పొరుగు ప్రావిన్సులకు వ్యాప్తిచెందకుండా కఠిన ఆంక్షలు విధించి, పెద్ద ఎత్తున నిర్దారణ పరీక్షలు నిర్వహించారు. పాజిటివ్‌గా నిర్దారణ అయినవారిని క్వారంటైన్‌కు తరలించడం, అవసరమైన వ్యక్తులను చికిత్స కోసం ఆస్పత్రిలో చేర్పించడం వంటి చర్యలు తీసుకుంటున్నారు. ‘అంటు వ్యాధుల నివారణ, నియంత్రణ ప్రక్రియలో వాస్తవాలను గుర్తించడం.. వైరస్ సమాచారాన్ని బహిరంగంగా, పారదర్శకంగా విడుదల చేయాలి. వివరాలను కప్పిపుచ్చడానికి లేదా తక్కువగా నివేదించడానికి ఎప్పుడూ అనుమతించరాదు’ అని చైనా క్యాబినెట్ కార్యదర్శి లీ కికియాంగ్ అన్నారు. గత వారం రోజులుగా చైనాలో రోజుకు సగటున 109 కేసులు నిర్ధారణ అవుతున్నట్టు న్యూయార్క్ టైమ్స్ పత్రిక తెలిపింది. అయితే, కొత్తగా కరోనా వైరస్‌‌తో ఎవరూ చనిపోయినట్టు చైనా వెల్లడించలేదు.
By January 16, 2021 at 12:10PM
No comments