ప్రముఖ నిర్మాత, రాయలసీమ రారాజు వి.దొరస్వామి రాజు కన్నుమూత
వీఎంసీ ఆర్గనైజేషన్స్ అధినేత, ప్రముఖ నిర్మాత, డిస్ట్రిబ్యూటర్ వి.దొరస్వామి రాజు కన్నుమూశారు. బంజారాహిల్స్‌లోని కేర్ హాస్పిటల్‌లో సోమవారం ఉదయం ఆయన తుదిశ్వాస విడిచారు. గుండెపోటుతో ఆయన ప్రాణాలు విడిచినట్టు కుటుంబ సభ్యులు వెల్లడించారు. వీఎంసీ ప్రొడక్షన్స్, వీఎంసీ పిక్చర్స్, వీఎంసీ ఫిలింస్, వీఎంసీ1 కంపెనీ, వీఎంసీ ఫిలిం డిస్ట్రిబ్యూటర్, వీఎంసీ పిక్చర్ ప్యాలెస్ సంస్థల ద్వారా దొరస్వామి రాజు తెలుగు చిత్ర పరిశ్రమకు తన సేవలు అందించారు. సినీ నిర్మాతగానే కాకుండా రాజకీయాల్లోనూ తన ప్రభావం చూపించారు. చిత్తూరు జిల్లా నగిరి ఎమ్మెల్యేగా పనిచేశారు. ఆర్.చెంగారెడ్డి వంటి ఉద్దండ నాయకునిపై భారీ మెజారిటీతో గెలుపొందారు. అంతేకాదు, టీటీడీ బోర్డ్ మెంబర్‌గా, ఫిలిం ఛాంబర్ ప్రెసిడెంట్‌గా, డిస్ట్రిబ్యూషన్ కౌన్సెల్ ప్రెసిడెంట్‌గా, ఎగ్జిబిటర్స్ అసోసియేషన్ ప్రెసిడెంట్‌గా పనిచేశారు. తెలుగులో బ్లాక్ బస్టర్ సినిమాలతో పాటు టెలీ ఫిలింస్, టెలీ సీరియల్స్‌, తమిళ్ డబ్బింగ్, హిందీ డబ్బింగ్ సినిమాలను దొరస్వామి రాజు నిర్మించారు. వీఎంసీ ఆర్గనైజేషన్‌ను 1978లో దొరస్వామి రాజు ప్రారంభించారు. దిగ్గజ నటుడు యన్.టి.రామారావు చేతుల మీదుగా తన సంస్థను ప్రారంభింపజేశారు. అక్కినేని నాగేశ్వరరావుతో ‘సీతారామయ్య గారి మనవరాలు’ వంటి బ్లాక్ బస్టర్ మూవీని దొరస్వామి రాజు నిర్మించారు. ఈ చిత్రం జాతీయ పురస్కారాన్ని సొంతం చేసుకుంది. అలాగే, ఏఎన్నార్‌తో ‘మాదవయ్య గారి మనరాలు’ సినిమా కూడా నిర్మించారు. అలాగే, అక్కినేని నాగార్జునతో ‘అన్నమయ్య’ లాంటి గొప్ప ఆధ్యాత్మిక చిత్రాన్ని రూపొందించి టాలీవుడ్ చరిత్రలో చిరస్థాయిగా నిలిచిపోయారు. అంతేకాదు, నాగార్జునతో ఆయన మూడు చిత్రాలను నిర్మించారు. ‘కిరాయి దాదా’తో నాగార్జున-దొరస్వామి కలయిక మొదలైంది. ఆ తరవాత ‘ప్రెసిడెంట్ గారి పెళ్లాం’, ‘అన్నమయ్య’ చిత్రాలు వచ్చాయి. ఇక యంగ్ టైగర్ ఎన్టీఆర్‌తో ‘సింహాద్రి’ వంటి బ్లాక్ బస్టర్ మూవీని నిర్మించి సెన్సేషన్ క్రియేట్ చేశారు దొరస్వామి. సినిమాలు నిర్మించడమే కాకుండా ఆంధ్రప్రదేశ్, తెలంగాణలో సుమారు 750 సినిమాలను డిస్ట్రిబ్యూట్ చేశారు. ముఖ్యంగా రాయలసీమ ప్రాంతంలో ఎక్కువ చిత్రాలను దొరస్వామి డిస్ట్రిబ్యూట్ చేశారు. అందుకే ఆయన్ని రాయలసీమ రారాజు అని పిలుస్తుంటారు.
By January 18, 2021 at 09:37AM
No comments