పోక్సో కేసులో వివాదాస్పద తీర్పులు.. బాంబే హైకోర్టు జడ్జికి సుప్రీం కొలీజియం షాక్!

పోక్సో చట్టం కేసులో ఇటీవల నాగ్‌పూర్ బెంచ్ ఇచ్చిన తీర్పులు వివాదాస్పదమైన విషయం తెలిసిందే. 12 ఏళ్ల బాలికపై 39 ఏళ్ల వ్యక్తి లైంగిక వేధింపుల కేసులో జనవరి 19న, ఐదేళ్ల చిన్నారిపై ఓ యాభై ఏళ్ల వ్యక్తి లైంగిక వేధింపుల కేసులో జనవరి 28న న్యాయమూర్తి జస్టిస్ ఇచ్చిన తీర్పులపై సర్వత్రా విమర్శలు వెల్లువెత్తాయి. ఈ నేపథ్యంలో సుప్రీంకోర్టు కొలీజియం సంచలన నిర్ణయం తీసుకుంది. జస్టిస్ పుష్పా గనేడివాలాకు హైకోర్టు శాశ్వత న్యాయమూర్తి హోదా కల్పించే ప్రతిపాదనలను వెనక్కు తీసుకోవాలని నిర్ణయించింది. కొన్ని సందర్భాల్లో ‘ఎక్కువ అవగాహన’కు అవసరాన్ని బట్టి శాశ్వత హోదా ఇవ్వకూడదనే నిర్ణయం ఉంటుంది అని సుప్రీంకోర్టు వర్గాలు వ్యాఖ్యానించాయి. ‘ఆమెపై వ్యక్తిగతంగా ఎటువంటి వ్యతిరేకతలేదు.. ఆమెకు అవగాహన అవసరం.. న్యాయవాదిగా ఉన్నప్పుడు ఈ తరహా కేసులను వాదించి ఉండకపోవచ్చు...అమెకు అవగాహన, శిక్షణ అవసరం’ అని సుప్రీం వర్గాలు పేర్కొన్నాయి. శాశ్వత న్యాయమూర్తులను నియమించడం లేదా న్యాయమూర్తులను శాశ్వతంగా చేసే విధానంలో భాగంగా కొలీజియం తన సిఫార్సులను కేంద్ర ప్రభుత్వానికి పంపడం, దానిని ఆమోదించడం.. కొన్నిసార్లు ఈ సిఫార్సులపై సందేహాలు వ్యక్తం చేస్తూ కేంద్రం తిప్పి పంపుతుంది. ఇదిలా ఉండగా.. జస్టిస్ పుష్పా గనేడివాలాను బాంబే హైకోర్టు నాగ్‌పూర్ బెంచ్ శాశ్వత న్యాయూమర్తిగా ప్రతిపాదిస్తూ జనవరి 20న సుప్రీంకోర్టు కొలీజియం సిఫార్సు చేసింది. అయితే, ఇటీవల ఆమె వివాదాస్పద తీర్పులను ఇవ్వడంతో శాశ్వత న్యాయమూర్తి హోదా అవకాశాలు సన్నగిల్లాయి. శరీరంపై దుస్తులు తొలగించకుండా బాలికను ఛాతిని తాకితే లైంగిక వేధింపులుగా పరిగణించలేమంటూ జనవరి 19న తీర్పు ఇచ్చారు. దీనిని అటార్నీ జనరల్ కేకే వేణుగోపాల్ సుప్రీంకోర్టు దృష్టికి తీసుకెళ్లడంతో సర్వోన్నత న్యాయస్థానం స్టే విధించింది. ఇక, జనవరి 28న ఇచ్చిన తీర్పు పోక్సోచట్టం కింద మైనర్‌ బాలిక చేతులు పట్టుకోవడం, ప్యాంటు జిప్‌ తెరవడం వంటి చర్యలు నేరాలుగా పరిగణించలేమని వ్యాఖ్యానించారు. అయితే భారత శిక్షాస్మృతి 354-ఏ(1)(i) సెక్షన్‌ కింద వీటిని లైంగిక వేధింపులుగా పరగణించవచ్చని అన్నారు. ఐదేళ్ల చిన్నారిపై ఓ యాభై ఏళ్ల వ్యక్తి లైంగిక వేధింపులకు పాల్పడినట్టు బాధితురాలి తల్లి పోలీసులకు ఫిర్యాదు చేయగా.. అతడిపై పోక్సో చట్టం కింద కేసు నమోదయ్యింది. ఈ కేసులో నిందితుడికి సెషన్స్ కోర్టు ఐదేళ్ల జైలు శిక్ష ఖరారు చేసింది. దీంతో నిందితుడు బాంబే హైకోర్టును ఆశ్రయించగా.. కేసు విచారణ సందర్భంగా జస్టిస్‌ పుష్ప గనేడివాలా ఈ మేరకు వ్యాఖ్యలు చేశారు. వరుసగా పది రోజుల వ్యవధిలోనే జస్టిస్ పుష్పా గనేడివాలా వివాదాస్పద తీర్పులను ఇవ్వడంతో కొలీజియం ఈ నిర్ణయం తీసుకున్నట్టు విశ్వసనీయ వర్గాలు పేర్కొన్నాయి. సుప్రీంకోర్టు కొలీజియం ప్రభుత్వానికి చేసిన సిఫారసులను ఉపసంహరించుకోవడం చాలా అరుదుగా జరుగుతుంది.

By January 30, 2021 at 12:37PM

Read More https://telugu.samayam.com/latest-news/india-news/supreme-court-collegium-acts-after-bombay-high-court-judges-controversial-sex-assault-orders/articleshow/80598939.cms