కుక్కను కారుకు కట్టి ఈడ్చుకెళ్లిన ప్రబుద్ధుడు.. అరెస్ట్ చేసిన పోలీసులు
![](https://blogger.googleusercontent.com/img/b/R29vZ2xl/AVvXsEhr2RcoK5Nf9NTRnPrStQ3-ZEfWwNyAVOOY6PB6ANhCKZnZochRr_RqPaaDi69eUIGsDRKvoByMaFr3cDoUjes5s8YnYK1JmNBBqqCvhrWe7EYyAph699mJoYmlAtAa9N1iUdMDhRpkjdA/s1600/telugu+news.png)
![](https://telugu.samayam.com/photo/79691597/photo-79691597.jpg)
మూగజీవాల పట్ల అమానుషంగా ప్రవర్తించి, మానవత్వానికే మాయని మచ్చలాంటి ఘటన కేరళలో చోటుచేసుకుంది. కుక్కను కారుకు కట్టి ఈడ్చుకెళ్తున్న ఓ వీడియో సోషల్ మీడియాలో వైరల్ కావడంతో పోలీసులు స్పందించారు. ఈ ఘటనలో ఎర్నాకులానికి చెందిన ఓ వ్యక్తిని అరెస్ట్ చేశారు. పోలీసులు తెలిపిన వివరాల ప్రకారం.. అరెస్టుచేసిన వ్యక్తిని యూసఫ్గా గుర్తించారు. కారు అతడిదేనని, ఆ సమయంలో అతడే వాహనం నడిపాడని తెలిపారు. ‘తన ఇంటి పరిసరాల్లో ఇబ్బందులు సృష్టిస్తున్నందున పంపెడు కుక్కను అక్కడ నుంచి దూరంగా తీసుకెళ్లాలని యూసఫ్ భావించాడు.. కారుకు తాడుతో కుక్కను కట్టి ఈడ్చుకెళ్లాడు’ అని చెంగ్మండ్ పోలీసులు వెల్లడించారు. వీడియో ప్రారంభంలో కారుకు కట్టిన కుక్క నడుస్తున్నట్టు.. తరువాత రోడ్డుపై ఈడ్చుకెళ్లినట్టు కనిపిస్తుంది. శుక్రవారం ఉదయం 11 గంటల ప్రాంతంలో ఈ ఘటన చోటుచేసుకోగా.. బైక్పై వెళ్తోన్న అఖిల్ అనే యువకుడు వీడియో తీసి సోషల్ మీడియాలో పోస్ట్ చేశాడు. దూరం నుంచి చూస్తున్నప్పుడు కారును కుక్క తరముతున్నట్టు కనిపించిందని, దగ్గరికెళ్లగా తాడుతో కట్టి ఉందన్నాడు. గాయపడిన ఆ కుక్కను ఆస్పత్రికి తీసుకెళ్లి వైద్యం చేయించిన అఖిల్.. తర్వాత దానిని జంతు సంరక్షణ కేంద్రానికి అప్పగించాడు. ‘మేము అతడిని నిలదీస్తే తమ పట్ల అసభ్యంగా ప్రవర్తించాడు.. కుక్క చనిపోతే మనం ఎందుకు బాధపడాలి అని అడిగాడు.. అనంతరం కుక్కను విడిచి పారిపోయాడు.. దయా యానిమల్ వెల్ఫేర్ అసోసియేషన్ సహాయంతో తన స్నేహితుడు, తాను కుక్కను గుర్తించి, ఉత్తర పరవూర్లోని పశువైద్యశాలకు తరలించాం.. దానికి ఒళ్లంతా గాయాలయ్యాయి.. అయితే, ప్రస్తుతం బాగానే ఉంది’ అని అఖిల్ అన్నారు. సోషల్ మీడియాలో వైరల్ కావడంతో ఈ ఘటనపై స్పందించిన పోలీసులు కేసు నమోదు చేశారు. నిందితుడిపై ఐపీసీలోని వివిధ సెక్షన్ల కింద కేసు చేసినట్టు తెలిపారు. జంతు సంరక్షణ, క్రూరత్వం నిరోధించే చట్టం ప్రకారం.. జంతువులను చంపడం, విషప్రయోగం, దుర్వినియోగం, అంగవైకల్యానికి కారణమైనా శిక్షార్హులు. మూగ జీవిపట్ల అమానుషంగా ప్రవర్తించిన యూసఫ్ను అరెస్ట్ చేశామని, తర్వాత బెయిల్పై విడుదలయ్యాడని పేర్కొన్నారు.
By December 12, 2020 at 11:09AM
No comments