పాకిస్థాన్‌కు చైనా ఝలక్.. ఆ వంకతో సీపెక్ నిధులపై యూటర్న్

అవసరానికి వాడుకుని వదిలేయడం చైనాకు వెన్నతో పెట్టిన విద్య. తాజాగా, పాకిస్థాన్ విషయంలోనూ అదే చేసింది. పాకిస్థాన్‌కు నిధుల విషయంలో డ్రాగన్ యూటర్న్ తీసుకుంది. చైనా పాకిస్థాన్ ఎకనమిక్ కారిడార్ (సీపీఈసీ) ప్రాజెక్టులో భాగంగా మౌలిక వసతుల నిర్మాణాల కోసం పాక్‌కు 60 బిలియన్ డాలర్లు అందజేస్తామని తొలుత ప్రకటించింది. కానీ, ప్రస్తుతం ఈ హామీని వెనక్కు తీసుకుంది. పాకిస్థాన్‌లోని చైనా ఇంజినీర్లపై ఉగ్రదాడులు, అవినీతి ఆరోపణల నేపథ్యంలో డ్రాగన్ ఈ నిర్ణయం తీసుకుంది. తన అనుంగు మిత్రుడే హ్యాండివ్వడంతో పాక్‌‌కు ఏంచేయాలో పాలుపోవడం లేదు.‌ చైనా ఇంజనీర్లు, ఇతరులపై ఉగ్రవాద దాడుల మధ్య తమ దేశంలో పెట్టుబడులు మరింత సురక్షితంగా ఉంటాయని మిత్రుడికి భరోసా ఇవ్వడానికి పాక్ సైన్యం సిపెక్ ప్రాజెక్ట్ మొత్తం తన నియంత్రణలోకి తీసుకుంటుందని ఆసియా టైమ్స్ తెలిపింది. చైనా తన వాగ్దానాల నుంచి నెమ్మదిగా వెనక్కి తగ్గుతున్నట్లు నివేదికలు సూచించిన సమయంలో ఈ కొత్త బిల్లు తెరపైకి వస్తోంది. చైనా డెవలప్‌మెంట్ బ్యాంక్, ఎక్స్‌పోర్ట్-ఇంపోర్ట్ బ్యాంక్ ఆఫ్ చైనా మొత్తం రుణాలు 2016లో 75 బిలియన్ డాలర్ల గరిష్ట స్థాయి నుంచి గతేడాది కేవలం 4 బిలియన్ డాలర్లకు పడిపోయాయి. అమెరికాలోని బోస్టన్ యూనివర్సిటీ పరిశోధకుల ప్రకారం.. 2020లో పాకిస్థాన్‌కు చైనా మూడు బిలియన్ డాలర్లు మాత్రమే చెల్లించింది. అస్పష్టత, అవినీతి, పేద దేశాలకు అతిగా రుణాలు ఇవ్వడం వంటి నిర్మాణాత్మక బలహీనతలు, సామాజిక, పర్యావరణ ప్రతికూల ప్రభావాల నేపథ్యంలో ఒక్క ట్రిలియన్ డాలర్లు బీఆర్ఐ ప్రాజెక్ట్ విషయంలో చైనా పునరాలోచనలో ఉన్నట్టు తెలుస్తోందని బోస్టన్ విశ్వవిద్యాలయ పరిశోధకులు చెప్పారు. ప్రధాని ఇమ్రాన్ ఖాన్ ప్రభుత్వం పాక్ సైన్యం కనుసన్నల్లోనే నడుస్తోందని విమర్శలు ఎదుర్కొంటున్నప్పటికీ, అక్కడ పెద్ద ఎత్తున మౌలిక వసతుల పెట్టుబడులకు ప్రాధాన్యత ఇవ్వకపోవడం, జాప్యం కూడా జరుగుతోందని ఆసియా టైమ్స్ నివేదించింది. గత ప్రభుత్వం అవినీతికి పాల్పడిందని ఆరోపిస్తూ సీపెక్ ప్రాజెక్టులను ప్రధాని ఇమ్రాన్ నిలిపివేశారు. ఏదేమైనా, అధికారంలోకి వచ్చిన రెండేళ్ల తరువాత, దేశంలోని విద్యుత్ ప్రాజెక్టుల్లో జరిగిన కుంభకోణాలలో ఇమ్రాన్ క్యాబినెట్‌లోని సభ్యులలో చాలామంది ఉన్నట్టు బయటపడింది. పాక్ విద్యుత్ ప్రాజెక్టుల్లో మూడింట ఒక వంతు మంది సీపెక్ క్రింద చైనా ప్రాజెక్టులలో పాలుపంచుకుంటున్నారు. సెక్యూరిటీస్ అండ్ ఎక్స్ఛేంజ్ కమీషన్ ఆఫ్ పాకిస్తాన్ (ఎస్‌ఈసీపీ) విచారణ నిర్వహించి, ఏప్రిల్‌లో ఇమ్రాన్ ఖాన్‌కు సమర్పించిన నివేదిక ప్రకారం.. 16 స్వతంత్ర విద్యుత్ ఉత్పత్తిదారులు (ఐపీపీ)కు ఇచ్చిన సబ్సిడీలో 1.8 బిలియన్ డాలర్ల విలువైన అవకతవకలను గుర్తించారు. ఇందులో ఇమ్రాన్ ఖాన్ సలహాదారులు రజాక్ దావూద్, నదీమ్ బాబర్ కూడా ఉన్నట్టు ఆసియా టైమ్స్ తెలిపింది. చైనా విద్యుత్ సంస్థలు ఆర్జించిన లాభాలపై కూడా ఎస్సీఈపీ దర్యాప్తు చేసింది. హువాంగ్ షాన్డాంగ్ రుయి పాకిస్థాన్ లిమిటెడ్ (హెచ్ఎస్ఆర్), పోర్ట్ ఖాసిమ్ ఎలక్ట్రిక్ పవర్ కో లిమిటెడ్ (పిక్యూఇపీసీఎల్) కలిసి మూడు బిలియన్ డాలర్లు అధికంగా చెల్లించాయని నివేదిక వెల్లడించింది.

By December 25, 2020 at 01:35PM

Read More https://telugu.samayam.com/latest-news/international-news/china-backing-away-from-promises-to-pak-under-economic-corridor/articleshow/79952972.cms