సాధారణ రైళ్లు పునఃప్రారంభం ఇప్పట్లో లేనట్టేనా? రైల్వే బోర్డు ఛైర్మన్ కీలక వ్యాఖ్యలు

కరోనా వైరస్ మహమ్మారి నియంత్రణకు విధించిన లాక్‌డౌన్ సమయంలో నిలిచిపోయిన ఇంకా పునఃప్రారంభం కాలేదు. కరోనా నేపథ్యంలో నిలిచిపోయిన ఈ సర్వీసులను ఎప్పుడు పునఃప్రారంభించేది ఇప్పుడే చెప్పలేమని రైల్వే బోర్డు ఛైర్మన్‌ వీకే యాదవ్‌ శుక్రవారం పేర్కొన్నారు. ఆయన మీడియాతో మాట్లాడుతూ.. కొవిడ్‌ కారణంగా రైల్వేశాఖకు ఈ ఏడాది భారీ నష్టాలే వచ్చాయని, గతేడాదితో పోలిస్తే ప్రయాణికుల ఆదాయం 87శాతం తగ్గిందని అన్నారు. ప్రస్తుత ఆర్థిక సంవత్సరంలో ఇప్పటివరకు ప్రయాణికుల నుంచి రూ. 4,600 కోట్ల ఆదాయం వచ్చిందని తెలిపారు. ఆర్ధిక సంవత్సరం ముగిసే మార్చి నాటికి ఇది రూ.15వేల కోట్లకు చేరుతుందని అంచనా వేశామని, అయితే.. 2019-20 ఏడాదిలో ఈ ఆదాయం రూ.53 వేల కోట్లుగా ఉందని గుర్తు చేశారు. దేశవ్యాప్తంగా ప్రస్తుతం 1,089 ప్రత్యేక రైళ్లను నడుపుతున్నామని.. కరోనా భయంతో కేవలం 30-40 శాతమే ఆక్యుపెన్సీ నమోదవుతుందని యాదవ్‌ తెలిపారు. ప్రస్తుత పరిస్థితులను నిశితంగా పరిశీలిస్తున్నామని.. దశల వారీగా ప్యాసింజర్‌ రైళ్లను పునరుద్దరించేందుకు చర్యలు తీసుకుంటామని స్పష్టం చేశారు. అలాగే, మెరుగైన మౌలిక వసతులు, వ్యాపారాభివృద్ధి ప్రణాళిక చర్యల్లో భాగంగా 2030నాటికి సరకు రవాణా వాటాను 45 శాతానికి పెంచేందుకు చర్యలు తీసుకుంటామని వీకే యాదవ్ పేర్కొన్నారు. ప్యాసింజర్ రైళ్లు నిలిచిపోవడంతో కోల్పోయిన ఆదాయాన్ని సరకు రవాణా సర్వీసుల ద్వారా భర్తీచేయనున్నామని అన్నారు. గతేడాది వచ్చిన ఆదాయం ఈ ఆర్ధిక సంవత్సరంలో ఇప్పటికే దాటేశామని, డిసెంబరు నాటికి 97 శాతం లక్ష్యాన్ని చేరుకున్నామని తెలిపారు. సాధారణ రైలు సర్వీసుల పునఃప్రారంభించేది ఎప్పుడనేది కచ్చితంగా చెప్పలేమన్నారు. దీనిపై రాష్ట్ర ప్రభుత్వాలతో జనరల్ మేనేజర్లు చర్చించిన తర్వాత నిర్ణయం తీసుకుంటామని పేర్కొన్నారు. వీటిని ఇప్పుడే పునరుద్దరించడానికి ప్రస్తుత పరిస్థితులు సాధారణంగా లేవని అన్నారు. కోల్‌కతా మెట్రో 60 శాతం, ముంబయి సబర్బన్ 80 శాతం, చెన్నై సబర్బన్ 50 శాతం మేర సర్వీసులు నడుస్తున్నాయని వెల్లడించారు. దశలవారీగా సాధారణ రైళ్లను ప్రారంభించడానికి చర్యలు తీసుకుంటామని పేర్కొన్నారు.

By December 19, 2020 at 08:44AM

Read More https://telugu.samayam.com/latest-news/india-news/not-possible-to-give-definite-date-railway-board-chairmen-on-normal-train-services/articleshow/79807932.cms