పాక్ కొత్త అత్యాచార చట్టం:నాలుగు నెలల్లో విచారణ.. నేరం రుజువైతే అది తీసేయడమే
మహిళలపై జరుగుతున్న అఘాయిత్యాలు, అత్యాచారాలను అరికట్టే కఠిన చట్టాన్ని పాకిస్థాన్ తాజాగా అమల్లోకి తీసుకొచ్చింది. ఈ చట్టం ప్రకారం అత్యాచారానికి పాల్పడినవారిని రసాయనాల సహాయంతో నపుంసకులుగా మార్చేస్తారు. గత నెలలో ఈ చట్టానికి ఇమ్రాన్‌ ఖాన్‌ నేతృత్వంలోని క్యాబినెట్ ఆమోదించగా.. దేశాధ్యక్షుడు ఆరిఫ్‌ అల్వీ మంగళవారం ఆమోద ముద్ర వేశారు. తాజా చట్టంలోని నిబంధనల ప్రకారం.. మహిళలు, చిన్నారులపై లైంగిక దాడుల కేసుల్లో సత్వర విచారణ చేపట్టేందుకుగాను ప్రభుత్వం ప్రత్యేక కోర్టులను ఏర్పాటుచేస్తుంది. ఈ ప్రత్యేక కోర్టులు నాలుగు నెలల్లోనే విచారణను పూర్తిచేస్తాయి. ఈ కేసుల్లో దోషులుగా నిర్ధారణ అయితే రసాయనాల వినియోగంతో వంధ్య వ్యక్తులుగా మార్చొచ్చు. లైంగిక దాడుల కేసుల దర్యాప్తులో నిర్లక్ష్యంగా వ్యవహరించే పోలీసులు, అధికారులకు మూడేళ్ల వరకు జైలు శిక్ష, జరిమానాలు విధించొచ్చు. తాజా చట్టం ప్రకారం.. ఘటన జరిగిన ఆరు గంటల్లోగా మెడికో-లీగల్ అంశాలను పూర్తిచేయాలి. అలాగే, నేషనల్ డేటాబేస్ అండ్ రిజిస్ట్రేషన్ అథారిటీ సహాయంతో లైంగిక నేరాలకు పాల్పడిన నేరస్థుల రిజిస్ట్రీ ఏర్పాటు చేయనున్నారు. బాధితుల వివరాలు వెల్లడించరాదు.. వాటిని బహిర్గతం చేయడం శిక్షార్హమైన నేరం. తప్పుడు సమాచారం ఇచ్చిన అధికారులకు కూడా జైలు శిక్ష, జరిమానా ఉంటాయి. మెడికో-లీగల్ పరీక్ష సమయంలో అత్యాచార బాధితులకు చేసే అమానవీయ, అవమానకరమైన రెండు వేళ్ల కన్యత్వ పరీక్షను ఈ చట్టం రద్దు చేసింది. అలాగే, బాధితురాలిని నిందితుడు క్రాస్ ఎగ్జామినేషన్ చేసే అవకాశం ఉండదు. కేవలం న్యాయమూర్తి, నిందితుడి తరఫు లాయర్‌ మాత్రమే బాధితులను క్రాస్ ఎగ్జామినేషన్ చేయవచ్చు. ఈ ఏడాది సెప్టెంబరులో పంజాబ్ ప్రావిన్సుల్లో ఓ మహిళపై ఆమె పిల్లల ముందే కామాంధులు సామూహిక అత్యాచారానికి పాల్పడిన ఘటన చోటుచేసుకోవడంతో దీనిపై తీవ్రంగా స్పందించిన ప్రధాని .. ఇటువంటి కేసుల్లో నిందితులను కఠినంగా శిక్షించేలా చట్టం తీసుకురావాలని న్యాయశాఖకు సూచించారు. అలాగే, సింధ్ ప్రావిన్సుల్లో ఉద్యోగం ఇప్పిస్తామని చెప్పి ఓ మహిళ, ఆమె కుమార్తెపై గ్యాంగ్ రేప్‌నకు పాల్పడిన ఘటనపై ప్రధాని తీవ్రంగా కలతచెందారు.
By December 16, 2020 at 08:51AM
No comments