రైతుల ఆందోళనపై కంగనా ‘రూ.100’ ట్వీట్.. లీగల్ నోటీసు పంపిన సిక్కు కమ్యూనిటీ
కేంద్ర ప్రభుత్వం తీసుకొచ్చిన కొత్త వ్యవసాయ చట్టాలకు వ్యతిరేకిస్తూ ఢిల్లీలో రైతులు చేస్తున్న ఆందోళనపై బాలీవుడ్‌ నటి కంగనా రనౌత్‌ మరోసారి నోరుజారి విమర్శలను ఎదుర్కొంటున్నారు. రైతుల ఆందోళనలో పాల్గొన్న ఓ పెద్దావిడను అవమానించేలా కంగనా ట్వీట్ చేశారు. రూ.100 ఇస్తే ఇలాంటివారు చాలా మంది దొరుకుతారని కించపరుస్తూ ట్వీట్ చేసిన కంగనా.. నిరసనలు చేపట్టిన రైతులను దేశ వ్యతిరేకులతో పోల్చారు. దీనిపై ఢిల్లీ సిక్కు గురుద్వారా మేనేజ్‌మెంట్ కమిటీ తీవ్రంగా స్పందించింది. ఈ విషయంలో కంగనా క్షమాపణలు చెప్పాలని చీఫ్ మంజీదర్ సింగ్ సిర్సా డిమాండ్ చేశారు. రైతుల ఉద్యమాన్ని కించపరిచిన కంగనా బేషరుతుగా క్షమాపణలు చెప్పాలని కోరుతూ లీగల్ నోటీసు పంపింది. ‘వృద్ధురాలైన ఓ రైతు తల్లిని రూ.100లు ఇస్తే నిరసనలో పాల్గొనడానికి వచ్చారని అవమానకరమైన ట్వీట్ చేసిన కంగనా టీంకి లీగల్ నోటీసు పంపాం.. ఆమె ట్వీట్లు రైతుల నిరసనను దేశ వ్యతిరేక చర్యగా చిత్రీకరిస్తున్నాయి.. రైతుల నిరసనపై ఆమె బుద్ధిలేని వ్యాఖ్యలు చేసినందుకు బేషరతుగా క్షమాపణ చెప్పాలని మేము కోరుతున్నాం’అని మంజీదర్ ట్వీట్ చేశారు. రాజధాని ఢిల్లీలో సిక్కు కమ్యూనిటీకి శక్తివంతమైన ప్రతినిధిగా ఉన్న డీఎస్జీఎంసీని సిక్కు గురుద్వారా చట్టం 1971 ప్రకారం ఏర్పాటయ్యింది. సిక్కులకు సంబంధించిన అన్ని అంశాలను ఇది పర్యవేక్షిస్తుంది. ఇదిలా ఉండగా.. రైతులకు మద్దతు తెలియజేయడానికి వచ్చిన పౌరసత్వ సవరణ చట్టానికి వ్యతిరేకంగా షీహీన్‌బాగ్‌ ఆందోళనల్లో పాల్గొని, టైమ్ జాబితాలో చోటుదక్కించుకున్న వృద్ధురాలు బిల్కిస్ బానోను పోలీసులు మంగళవారం అడ్డుకున్నారు. ఓ వృద్ధ మహిళ ఫోటోను ట్వీట్ చేసిన కంగనా.. ఆమే మరో బానో అని నొక్కి చెబుతూ.. నిరసనలకు హాజరు కావడానికి ఆమెను "నియమించుకోవచ్చు" అని సూచించింది. ఇక, రైతులకు మద్దతుగా పంజాబీ నటుడు దీప్‌ సింధు నిరసనలో పాల్గొనడం సిగ్గుపడాల్సిన విషయమని కంగన ట్వీట్ చేశారు. రైతుల పేరుతో కొందరు ప్రయోజనం పొందాలనుకుంటున్నారని ఆరోపించారు. ఆమె వ్యాఖ్యలకు నటి హిమాషీ ఖురానా స్పందిస్తూ.. ‘నీ ఆలోచనల పరంగా ఓ వ్యక్తి ప్రభుత్వాన్ని భద్రత అడగొచ్చు.. కానీ వాళ్లు తమ హక్కుల గురించి ప్రశ్నించకూడదా..?’ అని కౌంటర్‌ ఇచ్చారు. ‘నీ పట్ల సిగ్గు పడుతున్నా సోదరి.. ప్రజలకంటే ప్రధానమైంది ఏదీ లేదు. కావాలంటే నీ చుట్టూ ఉన్న వృద్ధులతో మాట్లాడు పరిస్థితి అర్థం అవుతుంది. ముంబయిలోని నీ కార్యాలయాన్ని కూల్చినందుకు కోపంతో అందరిపై చిందులేశావు. ఇక్కడ ప్రభుత్వం మా హక్కుల్ని చంపేస్తోంది’అని పంజాబీ గాయకుడు అమీ విర్క్‌.. కంగన అభిప్రాయాల్ని తప్పుపట్టారు. పంజాబీ నటి సర్గున్ మెహతా కూడా కంగనపై మండిపడ్డారు. ‘అభిప్రాయాల్ని, ఆలోచనల్ని వ్యక్తపరిచే హక్కు నీకు ఉన్నట్లే.. వారికీ ఆ హక్కు ఉంది. కానీ ఇక్కడ ఒక్కటే తేడా.. నువ్వు ఎటువంటి లాజిక్‌ లేకుండా పిచ్చిగా మాట్లాడుతావు. కానీ వాళ్లు తమకు కావాల్సిన దాని కోసం అర్థవంతంగా పోరాడుతున్నారు’ అని సర్గున్ పేర్కొన్నారు.
By December 05, 2020 at 10:56AM
No comments