US Election Results: ఆయన జోస్యమే నిజమవుతోంది.. వైరల్ అవుతోన్న వీడియో!
అమెరికా ఎన్నికల ఫలితాలు ఇంకా ఓ కొలిక్కి రాకపోవడంతో అధ్యక్ష పీఠాన్ని ఎవరు అధిరోహిస్తారు? విజేత ఎవరు? అనే ఉత్కంఠ కొనసాగుతోంది. ప్రస్తుతానికి జో బిడెన్ ఆధిక్యంలో కొనసాగుతుండగా.. లెక్కింపు ప్రక్రియపై అనుమానాలు వ్యక్తం చేస్తూ ప్రస్తుత అధ్యక్షుడు కోర్టు మెట్లెక్కుతున్నారు. అయితే, ఇదే విషయాన్ని డెమొక్రాటిక్ పార్టీ సెనేటర్ రెండు వారాల కిందటే కళ్లకు కట్టినట్టు చెప్పారు. ముఖాముఖి ఇంటర్వ్యూలో ఎన్నికల ఫలితాలు ఎలా ఉంటాయని వ్యాఖ్యాత జిమ్మీ ఫాలన్ అడిగిన ప్రశ్నకు బెర్నీ స్పందిస్తూ.. పోస్టల్ ఓట్లు భారీ సంఖ్యలో పోలవుతాయని.. దీని వల్ల ఎన్నికల ప్రక్రియ, ఫలితాల ఆలస్యమవుతాయని సమాధానం ఇచ్చారు. ‘డెమొక్రాట్లు ఎక్కువగా పోస్టల్ బ్యాలెట్ ద్వారా ఓటేస్తే, రిపబ్లికన్లు నేరుగా పోలింగ్ బూత్లకు వచ్చి ఓట్లేస్తారు. కొన్ని కారణాల వల్ల పెన్సిల్వేనియా, మిచిగన్, విస్కాన్సిన్ తదితర రాష్ట్రాల్లో ఎన్నికల ప్రక్రియ ఆలస్యమవుతోందని, ఇందుకు లక్షల సంఖ్యలో వచ్చిపడే పోస్టల్ బ్యాలెట్లు కారణం కావచ్చని అన్నారు. నవంబరు 3న పోలింగ్ రోజు రాత్రి సుమారు 10 గంటలకు ట్రంప్.. కొన్ని రాష్ట్రాల్లో విజయం సాధిస్తాడని, ఇంకా పూర్తి ఫలితాలు వెలువడకుండానే ‘తనను అధ్యక్షుడిగా ఎన్నుకున్నందుకు కృతజ్ఞతలు’ అంటూ ప్రకటనలు చేస్తాడన్నారు. అంతేకాదు, తాను గెలవని కొన్ని కీలక రాష్ట్రాల్లో అక్రమాలు జరిగాయని ఆరోపణలు గుప్పించి, న్యాయవ్యవస్థ సరిగా పనిచేయాలనే డిమాండ్ లేవనెత్తుతాడని పేర్కొన్నారు. ఓటింగ్ ప్రక్రియను వెంటనే నిలిపివేయాలని, ఫలితాలపై తాను సుప్రీం కోర్టుకు కూడా వెళతానంటాడు. ఆ తర్వాతి రోజు లేదా ఆపై రోజు పోస్టల్ బ్యాలెట్ల లెక్కింపు పూర్తయి బైడెన్ విజయం సాధించినట్టు ప్రకటిస్తారు. అప్పుడు కూడా.. పోస్టల్ బ్యాలెట్ విధానం లోపభూయిష్టమైనదనే తన వాదన రుజువైందని ట్రంప్ మళ్లీ ప్రకటిస్తాడు’ అని వెల్లడించారు. కాగా, బెర్నీ చెప్పినట్టే అన్నీ జరుగుతుండటం విశేషం. బెర్నీ అన్నట్టుగానే ట్రంప్ తానే విజయం సాధించానని చెప్పుకోవడమే కాదు, కొన్ని రాష్ట్రాల్లో ఫలితాలపై కోర్టులను ఆశ్రయించారు. మిచిగన్, విస్కాన్సిన్, పెన్సిల్వేనియాలో బైడెన్ ఆధిక్యంలోకి రావడంపై అనేక అనుమానాలు వ్యక్తం చేస్తున్నారు. ప్రస్తుతం ఈ వీడియో సోషల్ మీడియాలో తెగ వైరల్ అవుతోంది. ప్రపంచ వ్యాప్తంగా కోట్లాది మంది ఈ వీడియోను వీక్షించారు. కేవలం 24 గంటల్లోనే 27 మిలియన్ల మంది చూశారు.
By November 06, 2020 at 09:16AM
No comments