మరోసారి ప్రపంచవ్యాప్తంగా క్లినికల్ ట్రయల్స్.. ఆస్ట్రాజెన్‌కా సంచలన నిర్ణయం
ఆక్స్‌ఫర్డ్‌తో కలిసి ఆస్ట్రాజెన్‌కా అభివృద్ధి చేసిన టీకా క్లినికల్ ట్రయల్స్ ఫలితాలపై గందరగోళం నెలకున్న విషయం తెలిసిందే. ఒక్క డోస్ తీసుకున్న వ్యక్తుల్లో 90 శాతం, రెండు డోస్‌లు తీసుకున్నవారిలో 62 శాతం ప్రభావవంతంగా పనిచేసినట్టు క్లినికల్ ట్రయల్స్ డేటాలో పేర్కొంది. దీనిపై నిపుణుల నుంచి విమర్శలు రావడంతో తయారీలో లోపం జరిగినట్టు ఆక్స్‌ఫర్డ్ ప్రకటించింది. ఈ నేపథ్యంలో మరోసారి క్లినికల్ ట్రయల్స్ నిర్వహించనున్నట్టు ఆస్ట్రాజెన్‌కా సీఈఓ పాస్కల్ సోరియట్ ప్రకటించారు. వ్యాక్సిన్ పనితీరును మరింత లోతుగా పరిశీలించేందుకు ప్రపంచవ్యాప్తంగా మరోమారు ట్రయల్స్ నిర్వహించాలని నిర్ణయించామని అన్నారు. వ్యాక్సిన్ ఫలితాల నివేదిక విడుదలైన తరువాత తొలిసారిగా మీడియాతో మాట్లాడిన ఆయన.. ప్రస్తుతం టీకాపై జరుగుతున్న అధ్యయనంలో కొన్ని ప్రశ్నలు ఉత్పన్నమయ్యాయని, అందువల్లే మరోసారి ట్రయల్స్‌కు వెళుతున్నామని పేర్కొన్నారు. ఆక్స్‌ఫర్డ్ వ్యాక్సిన్ తక్కువ డోస్ తీసుకున్న వారిలో ఎక్కువ రోగనిరోధక శక్తి పెరిగినట్టు నివేదికలు వచ్చాయని, దీని ఆధారంగానే మరింత లోతుగా విశ్లేషించనున్నామని పాస్కల్ వెల్లడించారు. అయితే, తాజా ట్రయల్స్ మాత్రం పరిమితంగా నిర్వహించి త్వరితగతినే పూర్తిచేస్తామని, చాలా దేశాల్లో ఇది జరుగుతుందని వ్యాక్సిన్ పనితీరుపై అంతర్జాతీయ అధ్యయనం తరువాత నివేదికను విడుదల చేస్తామని తెలిపారు. అదనపు ట్రయల్స్‌కు రెగ్యులేటరీలను మరోసారి అనుమతి కోరాల్సిన అవసరం లేదని వ్యాఖ్యానించారు. యూకే, యూరప్‌తో పాటు మరిన్ని దేశాల్లో ట్రయల్స్ జరుగుతాయని స్పష్టం చేశారు. కొన్ని దేశాల్లో క్లినికల్ ట్రయల్స్‌కు అనుమతులు ఈ ఏడాది చివర్లో వచ్చే అవకాశాలు ఉన్నాయని అన్నారు. అలాగే, అమెరికాలో టీకాకు ఎఫ్‌డీఏ నుంచి అంత త్వరగా అనుమతులు రావని, మరో దేశంలో జరిగిన ట్రయల్స్ ఫలితాలు ఆధారంగా ఆ దేశం నిర్ణయం తీసుకోబోదని ఆయన గుర్తు చేశారు. ప్రస్తుతం జరుగుతోన్న వ్యాక్సిన్ క్లినికల్ ట్రయల్స్ ఫలితాలు ఆశాజనకంగా ఉన్నాయని పేర్కొన్నారు. మోడెర్నా, ఫైజర్ వ్యాక్సిన్లు క్లినికల్ ట్రయల్స్‌ల బలమైన సామర్థ్యాన్ని చూపించగా, ఆస్ట్రాజెన్‌కా టీకాపై కూడా భారీ ఆశలు ఉన్నాయి. ఎందుకంటే ఆ రెండు టీకాలకు భిన్నంగా వేరే సాంకేతిక పరిజ్ఞానంపై ఆధారపడింది. సాధారణ రిఫ్రిజిరేటర్ ఉష్ణోగ్రత వద్ద దీనిని నిల్వ ఉంచి, రవాణా చేయవచ్చు. టీకా అభివృద్ధిలో ఆ రెండు వ్యాక్సిన్లతో పోలిస్తే తక్కువ ఖర్చువుతుంది.
By November 28, 2020 at 09:20AM
No comments