మోదీ గురించి ఒబామా తన పుస్తకంలో ప్రస్తావించలేదా? ఆయన వ్యాఖ్యలు నిజమేనా?
‘ఏ ప్రామిస్డ్‌ ల్యాండ్‌’ పేరుతో అమెరికా మాజీ అధ్యక్షుడు ఓ పుస్తకం రాసిన విషయం తెలిసిందే. ఈ పుస్తకంలో ప్రపంచంలోని వివిధ దేశాధినేతలు, రాజకీయ నాయకుల గురించి ఒబామా ప్రస్తావించారు. ఒబామా తన సంగ్రహ చరిత్రలో భారత రాజకీయ నేతల గురించి ఆసక్తికర అంశాలను వెల్లడించారు. ప్రధాని నరేంద్ర మోదీని ప్రధాన సంస్కర్త అంటూ అభివర్ణించారని మీడియాలో కథనాలు వెలువడ్డాయి. అయితే, ఇందులో ఒక్కసారి కూడా ప్రధాని మోదీ పేరును ప్రస్తావించలేదని కాంగ్రెస్‌ ఎంపీ శశిథరూర్ సంచలన వ్యాఖ్యలు చేశారు. ఆ పుస్తక ప్రతిని తాను ముందుగానే చదివానన్న .. మోదీ ప్రస్తావనే చేయలేదన్నారు. ‘902 పేజీల పుస్తక ప్రతి ముందుగానే నేను చదివాను. అందులో ఒబామా మాజీ ప్రధాని మన్మోహన్‌ను ఘనంగా ప్రస్తుతించారు. మన్మోహన్‌ వివేకశీలి, సభ్యత ఉన్నవారు. ఆయనతో నా జ్ఞాపకాలు ఎన్నో. నిర్మాణాత్మకమైన, సౌహార్ధ్రంతో కూడిన వ్యక్తిగత బంధం మాది’ అని ఒబామా పేర్కొన్నట్లు శశి థరూర్ వివరించారు. అలాగే, పెరుగుతున్న హింస, అవినీతి, అత్యాశ, జాతీయవాదం, జాత్యంహకారం, మత విద్వేషాలపై ఒబామా ఆందోళన వ్యక్తం చేశారని పేర్కొన్నారు. ఒకప్పుడు తండ్రికి సాయం చేసేందుకు, కుటుంబానికి అండగా ఉండేందుకు టీ అమ్మిన వ్యక్తి.. నేడు ప్రపంచంలోనే అతి పెద్ద ప్రజాస్వామ్య దేశానికి నాయకుడు అని కొనియాడారని, భారత్‌ చైతన్యవంతంగా, సమర్థంగా ఎదిగిందని చెప్పడానికి పేదరికం నుంచి ప్రధానిగా ఎదిగిన మోదీ జీవితమే నిదర్శనమని ఒబామా తన పుస్తకంలో అభిప్రాయపడినట్టు ప్రచారం జరుగుతోంది. అలాగే, 2015లో టైమ్‌ పత్రికకు ఇచ్చిన ఇంటర్వ్యూలో మోదీ గురించి ప్రస్తావనతోపాటు పేదరిక నిర్మూలన, మెరుగైన విద్య, బాలికలు-మహిళల సాధికారత వంటివాటిపై మోదీకి స్పష్టమైన లక్ష్యాలున్నాయని ఒబామా ప్రశంసించినట్టు పేర్కొన్నాయి. వాతావరణ మార్పులను ఎదుర్కొంటూనే దేశ ఆర్థిక వ్యవస్థను పటిష్ఠం చేసేందుకు పాటుపడుతున్నారన్నారు. మోదీ.. యోగాకు భక్తుడని అభివర్ణించారని ప్రచారం జరిగింది. అయితే, శశిథరూర్ మాత్రం మోదీ గురించి ఒబామా ఎక్కడా ప్రస్తావించలేదని చెప్పడం గమనార్హం. థరూర్ వ్యాఖ్యల్లో నిజమెంతా మరి కొద్ది గంటల్లోనే తెలిసిపోనుంది. పుస్తకాన్ని ఒబామా నేడు విడుదల చేయనున్నారు.
By November 17, 2020 at 09:17AM
No comments