ఎన్నికల ప్రక్రియపై ట్రంప్ తప్పుడు ప్రకటనలు.. ఒళ్లు మండి ప్రసారాన్ని మధ్యలో ఆపేసిన మీడియా!
రెండోసారి అధ్యక్ష పీఠంపై భారీ అశలు పెట్టుకున్న డొనాల్డ్ ట్రంప్నకు ఫలితాలు నిరాశకు గురిచేశాయి. జార్జియా, పెన్సిల్వేనియా సహా ఐదు రాష్ట్రాల్లో లెక్కింపు కొనసాగుతుండగా.. ఇక్కడ కూడా ట్రంప్ ఆధిక్యం తగ్గుతూ వస్తోంది. మెయిల్-ఇన్ ఓటింగ్ వల్ల లెక్కింపు ఆలస్యమవుతోంది. పోస్టల్ బ్యాలెట్లలో బైడెన్కు భారీగా ఓట్లుపడ్డాయి. దీంతో ట్రంప్ ఆధిక్యానికి గండిపడుతోంది. అయితే, మెయిల్-ఇన్ ఓటింగ్ పద్ధతి అవినీతితో కూడుకున్న ప్రక్రియని, వారు గెలవడానికి ఎన్ని ఓట్లు కావాలో చూసుకొని మరీ ఓటేస్తున్నారని ట్రంప్ ఆరోపించారు. అకస్మాత్తుగా బ్యాలెట్లు వచ్చి పడుతున్నాయని, రిపబ్లికన్ల ఎన్నికల పరిశీలకులు లేకుండానే కౌంటింగ్ జరుపుతున్నారని ధ్వజమెత్తారు. కౌంటింగ్ టేబుళ్లపై ఏం జరుగుతుందో తెలుసుకునేందుకు రిపబ్లికన్లను అనుమతించడం లేదని ఎన్నికల వ్యవస్థ, కౌంటింగ్ ప్రక్రియపై ట్రంప్ ఆరోపణలు గుప్పించారు. లీగల్ ఓట్లు లెక్కిస్తే విజయం తమదేనని ట్రంప్ ప్రకటించారు. ఇదిలా ఉండగా.. దాదాపు 17 నిమిషాల పాటు మాట్లాడిన ట్రంప్.. ప్రశ్నలడిగేందుకు మీడియా ప్రతినిధులకు అవకాశం ఇవ్వలేదు. అయితే, మెజారిటీ మీడియా సంస్థలు ట్రంప్ ప్రసంగాన్ని మధ్యలోనే నిలిపివేశాయి. అధ్యక్షుడు తన ప్రసంగంలోనే అవాస్తవాలు వల్లెవేస్తున్నారని.. ఎన్నికల విధానంపై అసంబద్ధమైన ఆరోపణలు గుప్పిస్తున్నారని పేర్కొన్నాయి. ఏబీసీ, సీబీఎస్, ఎన్బీసీ నెట్వర్క్స్ ఆయన ప్రసంగిస్తుండగా ప్రసారాలను మధ్యలో ఆపేశాయి. ‘మేము ప్రసారం నిలిపివేస్తున్నాం.. ఎందుకంటే అధ్యక్షుడు మోసపూరిత ఓటింగ్ జరిగిందనే భావనతో సహా అనేక తప్పుడు ప్రకటనలు చేశారు’ అని ఎన్బీసీ నైట్లీ న్యూస్ యాంకర్ లెస్టేర్ హోల్ట్ అన్నారు. అంతేకాదు, ఆయనకు ఎటువంటి ఆధారాల్లేకుండా మాట్లాడుతున్నారని పేర్కొన్నారు. ఏబీసీలో యాంకర్ డేవిడ్ ముయిర్ మాట్లాడుతూ.. ఇక్కడ వెల్లడించిన చాలా విషయాలను, నిజాలను పరిశీలించాల్సి ఉంది అని లైవ్లోచెప్పారు. సీబీఎస్ కరస్పాండెంట్ నాన్సీ కోర్డెస్.. ట్రంప్ నిరాధారమైన ప్రకటనలపై 90 సెకెన్లు మాట్లాడారు. సీఎన్ఎన్, ఫాక్స్ న్యూస్ ట్రంప్ ప్రసంగాన్ని ప్రసారం చేసినప్పటికీ, బ్రాడ్క్యాస్ట్ నెట్వర్క్లు నిలిపివేయడంతో ఎక్కువ మంది వీక్షించే అవకాశం లేకుండా పోయింది.
By November 06, 2020 at 10:52AM
No comments