రాహుల్‌పై ఒబామా వ్యాఖ్యలకు శివసేన కౌంటర్.. భారత్ గురించి ఆయనకేం తెలుసంటూ ఆగ్రహం
అమెరికా మాజీ అధ్యక్షుడు తన పుస్తకం ‘ఏ ప్రోమిస్డ్ ల్యాండ్’లో రాహుల్ గాంధీని ఉద్దేశించి రాసిన వ్యాఖ్యలపై శివసేన సీనియర్ నేత తీవ్రంగా స్పందించారు. భారత్ గురించి ఆయనకు ఏం తెలుసని ఒబామాను ప్రశ్నించారు. భారత రాజకీయ నాయకుల గురించి ఓ విదేశీ నేత అటువంటి అభిప్రాయం వ్యక్తం చేయడం సరికాదని అన్నారు. ‘భారత రాజకీయ నాయకులపై ఒక విదేశీ రాజకీయ నేత అటువంటి అభిప్రాయాలను ఎలా వ్యక్తం చేస్తారు.. కాంగ్రెస్ నేతపై ఒబామా వ్యాఖ్యల తర్వాత దేశంలో రాజకీయ ప్రతిస్పందన అసహ్యంగా ఉంది. ‘ట్రంప్ ఓ పిచ్చివాడు’అని మేము అనం.. ఈ దేశం గురించి ఒబామాకు ఏం తెలుసు’ అని మండిపడ్డారు. ఓ విషయంలో పరిజ్ఞానం సాధించాలనే తపన రాహుల్‌లో లేదంటూ ఒబమా రాసిన పుస్తకంలో ప్రస్తావించినట్టు న్యూయార్క్ టైమ్స్ తన సమీక్షలో పేర్కొంది. ఈ వ్యాఖ్యలను కాంగ్రెస్ నేతలు ఖండిస్తూ.. రాహుల్ పట్ల ఒబామా వ్యక్తం చేసిన అభిప్రాయాన్ని తప్పుబడుతున్నారు. ‘అమెరికా అధ్యక్షుడి హోదాలో దాదాపు 8-10 ఏళ్ల కిందట భారత్‌కు వచ్చిన ఒబామాతో రాహుల్ కలిశారు.. ఒకటి రెండుసార్లు కలుసుకున్నప్పుడు ఓ వ్యక్తి గురించి అంచనా వేయడం కష్టం.. అంతేకాదు, అప్పటికి ఇప్పటికీ రాహుల్ వ్యక్తిత్వంలో చాలా మార్పు వచ్చింది.. ఆయన ఎంతో పరిణితి సాధించారు’ అని కాంగ్రెస్ నేత తారిఖ్ అన్వర్ వ్యాఖ్యానించారు. మహారాష్ట్రలో శివసేన-కాంగ్రెస్-ఎన్సీపీ కూటమి ప్రభుత్వం ఏర్పడి ఏడాది పూర్తయిన విషయం తెలిసిందే. దీనిపై కూడా సంజయ్ మాట్లాడుతూ.. ఉద్ధవ్ ఠాక్రే పాలనలో వచ్చే నాలుగేళ్లలో మహారాష్ట్ర మరింత శక్తివంతమవుతుందని అన్నారు. గతేడాది ఇదే సమయానికి ప్రభుత్వ ఏర్పాటు విషయంలో సమస్యలు ఎదుర్కొన్నాం.. శివసేన నేత ముఖ్యమంత్రి అవుతారని ఎవరూ ఊహించి ఉండరు.. ఏడాది కాలంగా ప్రకృతి వైపరీత్యాలు, కోవిడ్-19 మహమ్మారి వంటి అనేక సవాళ్లు ఎదుర్కొన్నాం.. ఎంతో సహనంతో, జాగ్రత్తగా వ్యవహరించాం’ అన్నారు. వచ్చే నాలుగేళ్లు 11 కోట్ల మంది ప్రజలలో విశ్వాసం కల్పించడమే లక్ష్యంగా పెట్టుకున్నాం.. ప్రజా సంక్షేమం, రాష్ట్రం మరింత శక్తివంతంగా అవతరించడానికి ప్రతిపక్షాలు తమ వంతు సహకారం అందజేయాలని రౌత్ సూచించారు.
By November 15, 2020 at 12:25PM
No comments