ఆంధ్రాలో మరో దుబ్బాక.. తిరుపతిపై బీజేపీ కన్ను.. కాషాయ ‘పవనాలు’ వీచేనా?

చిత్తూరు ఎంపీ బల్లి దుర్గాప్రసాద్ కరోనా కారణంగా సెప్టెంబర్లో మరణించిన సంగతి తెలిసిందే. వైఎస్సార్సీపీ ఎంపీ మరణంతో ఆ స్థానానికి ఉప ఎన్నిక అనివార్యమైంది. నిబంధనల ప్రకారం ఆరు నెలల్లోగా ఉప ఎన్నిక నిర్వహించాల్సి ఉంటుంది. ఇప్పటికే ఆ స్థానం ఖాళీ అయ్యి రెండు నెలలు కావొస్తోంది. దీంతో ఈ ఏడాది చివర్లో లేదా వచ్చే ఏడాది ఆరంభంలో ఉప ఎన్నిక జరగనుంది. సిట్టింగ్ ప్రజాప్రతినిధి మరణిస్తే.. ఆ కుటుంబానికి చెందిన వ్యక్తికి టికెట్ ఇవ్వడం.. ప్రతిపక్షాలు పోటీకి దూరంగా ఉండటం ఇంతకు ముందు జరిగేది. ఒకవేళ ప్రత్యర్థి పార్టీ అభ్యర్థిని రంగంలోకి దింపినా సానుభూతి కారణంగా ప్రజలు మరణించిన నేత కుటుంబానికి చెందిన వ్యక్తికే ఓటేసేవారు. కానీ గత కొన్నేళ్లుగా రాజకీయం మారింది. ఇటీవల తెలంగాణలో దుబ్బాక ఉప ఎన్నికలో సానుభూతి అస్త్రం పని చేయలేదు. సిట్టింగ్ ఎమ్మెల్యే సోలిపేట రామలింగారెడ్డి చనిపోతే.. టీఆర్ఎస్ ఆయన భార్యకు టికెట్ ఇచ్చింది. కానీ ఇక్కడ బీజేపీ విజయం సాధించింది. దుబ్బాకలో గెలిచిన ఉత్సాహంతో బీజేపీ దుబ్బాక ఉప ఎన్నిక ఇచ్చిన కిక్‌తో తిరుపతి లోక్ సభ స్థానాన్ని సైతం దక్కించుకోవడం కోసం బీజేపీ వ్యూహ రచన చేస్తోంది. దుబ్బాకలో అధికార పార్టీని మట్టికరిపించిన విధంగానే.. తిరుపతిలోనూ వైఎస్సార్సీపీని ఓడించేందుకు కమలనాథులు కసరత్తులు చేస్తున్నారు. తిరుపతి లోక్ సభ టికెట్‌ను బీజేపీకి కేటాయిస్తారా లేదంటే జనసేనకు కేటాయిస్తారా అనే విషయంలో స్పష్టత లేదు. కానీ బీజేపీ మాత్రం ఇప్పటికే గ్రౌండ్ వర్కర్ ప్రిపేర్ చేస్తోంది. తెలుగు రాష్ట్రాల్లో అధికారం సాధించడమే లక్ష్యంగా బీజేపీ.. దుబ్బాకలో గెలవడం ద్వారా తెలంగాణలో తాము బలపడ్డామనే సంకేతాలు పంపింది. తిరుపతిని దక్కించుకోవడం ద్వారా ఆంధ్రాలోనూ వైఎస్సార్సీపీకి ప్రత్యామ్నాయం తామేనని నిరూపించుకునేందుకు తహతహలాడుతోంది. బీజేపీ ఏపీ వ్యవహారాల సహ ఇంఛార్జ్ సునీల్ దేవ్‌ధర్ ఇప్పటికే తిరుపతిలో మకాం వేశారు. అధికార వైఎస్సార్సీపీపై విమర్శల దాడిని మొదలుపెట్టారు. సెంటిమెంట్‌తో.. తిరుపతి హిందువుల ఆధ్యాత్మిక కేంద్రం కావడంతో... హిందూ ధర్మ పరిరక్షణ, సనాతన ధర్మం, రాష్ట్రంలో హిందూ ఆలయాలపై దాడులు తదితర అంశాలను బీజేపీ తెరపైకి తీసుకొస్తోంది. ఈ ఉప ఎన్నికలో గట్టి పోటీనిచ్చే అభ్యర్థి కోసం ఆ పార్టీ వెతుకులాట మొదలుపెట్టింది. గత ఎన్నికల్లో టీడీపీ తరఫున పోటీ చేసిన పనబాక లక్ష్మీ బీజేపీ అభ్యర్థిగా బరిలో దిగే అవకాశం ఉందనే ప్రచారం జరుగుతోంది. మరి జనసేన? ఉప ఎన్నికలో బీజేపీ అభ్యర్థి బరిలో దిగుతాడా లేదంటే జనసేన అభ్యర్థి పోటీలో ఉంటాడా అనేది ఇంకా తేలలేదు. ఈ విషయంలో పవన్ కళ్యాణ్‌తో చర్చించి ఓ నిర్ణయానికి వస్తామని ఏపీ బీజేపీ అధ్యక్షుడు సోము వీర్రాజు ప్రకటించారు. కానీ పవన్ మౌనం చూస్తుంటే.. బీజేపీనే బరిలో దిగే అవకాశం కనిపిస్తోంది. వాస్తవానికి తిరుపతిలో జనసేన బలంగానే ఉంది. గతంలో ప్రజారాజ్యం తరఫున చిరంజీవి తిరుపతి నుంచి ఎమ్మెల్యేగా గెలుపొందారు. ఇక్కడ ఎస్సీ జనాభా ఎక్కువ కావడంతో.. దళితుల ఓట్లను పొందడం కోసం గత లోక్ సభ ఎన్నికల్లో పొత్తులో భాగంగా జనసేన బీఎస్పీకి ఈ సీటును కేటాయించింది. కానీ బీఎస్పీ కేవలం 20,971 ఓట్లకే పరిమితమైంది. బీజేపీ ఓసారి విజయం ఇక్కడి నుంచి బీజేపీ ఓసారి గెలుపొందింది. 1999 ఎన్నికల్లో బీజేపీ అభ్యర్థి వెంకటస్వామి తిరుపతి నుంచి ఎంపీగా ఎన్నికయ్యారు. ఆ ఎన్నికల్లో బీజేపీ టీడీపీ మధ్య పొత్తు ఉంది. 2014 ఎన్నికల్లో బీజేపీ అభ్యర్థి కారుమంచి జయరామ్‌పై వైఎస్సార్సీపీకి చెందిన వెలగపల్లి వరప్రసాద్ 37 వేలకుగా ఓట్ల ఆధిక్యం సాధించారు. టీడీపీ పోటీ చేస్తుందా? మరోవైపు టీడీపీ సైతం తిరుపతి బరిలో నిలిచే అవకాశం ఉంది. కానీ ఆ పార్టీ పరోక్షంగా బీజేపీకి సహకరించే అవకాశం ఉందనే గుసగుసలు మొదలయ్యాయి. వచ్చే అసెంబ్లీ ఎన్నికల నాటికి చంద్రబాబు బీజేపీతో పొత్తు కోరుకుంటున్నారని.. అందుకే ఈ ఉప ఎన్నికలో బీజేపీ విజయానికి ఆయన తెర వెనుక నుంచి సహకరించే అవకాశం ఉందని ప్రచారం జరుగుతోంది. మరోవైపు వైఎస్సార్సీపీ ఓటు బ్యాంకును చీల్చడం కోసం కాంగ్రెస్ అభ్యర్థిని బరిలోకి దింపుతారని టాక్ వినిపిస్తోంది. జగన్ వేరు.. కేసీఆర్ వేరు తెలంగాణలో టీఆర్ఎస్ అధికారంలోకి వచ్చి ఆరేళ్లు దాటింది. అక్కడ కేసీఆర్ సర్కారుపై కొంత వ్యతిరేకత ఉండటంతోపాటు.. పొరుగున ఉన్న సిరిసిల్ల, గజ్వేల్, సిద్ధిపేట నియోజకవర్గాలతో పోలిస్తే.. తమ నియోజకవర్గం వెనుకబడిందనే భావన దుబ్బాక ప్రజల్లో ఉంది. అదీగాక అక్కడ బీజేపీకి రఘునందన్ రావు రూపంలో బలమైన అభ్యర్థి ఉన్నాడు. గత ఎన్నికల్లో ఓటమి నేపథ్యంలో ఆయనపై కొంత సానుభూతి ఉంది. కానీ తిరుపతి విషయానికి వస్తే జగన్ అధికారంలోకి వచ్చి ఎంతో కాలం కాలేదు. అదీగాక సంక్షేమ పథకాలు, సిట్టింగ్ ఎంపీ మరణంతో సానుభూతి ఎలాగో ఉండనే ఉన్నాయి. గత రెండు పర్యాయాలు ఇక్కడ వైఎస్సార్సీపీ గెలుపొందింది. ఇలాంటి పరిస్థితుల్లో జగన్ పార్టీ అభ్యర్థిపై బీజేపీ-జనసేన విజయం సాధిస్తే.. ఏపీ రాజకీయాల్లో అది పెనుమార్పుగానే భావించొచ్చు.

By November 13, 2020 at 11:32AM

Read More https://telugu.samayam.com/andhra-pradesh/news/after-victory-in-dubbaka-bypoll-now-bjp-eys-on-tirupati-ls-byelection/articleshow/79204938.cms