సీఎం పదవి నాకే ఇవ్వాలని కోరడం లేదు.. ఎన్‌డీఏ నిర్ణయం తీసుకుంటుంది: నితీశ్ సంచలన వ్యాఖ్యలు
బిహార్ శాసనసభ ఎన్నికల్లో ప్రభుత్వ ఏర్పాటుకు అవసరమైన సాధారణ మెజార్టీని సాధించిన విషయం తెలిసిందే. అయితే, బీజేపీకి కంటే జేడీయూకి తక్కువ స్థానాలు రావడంతో నితీశ్ కుమార్‌నే సీఎంగా నియమిస్తారా? అనే సందేహాలు వ్యక్తమయ్యాయి. తాజాగా, దీనిపై ఆసక్తికర వ్యాఖ్యలు చేశారు. సీఎం పదవి కావాలని నేను పట్టుబట్టడంలేదు, నిర్ణయం ఎన్‌డీఏ తీసుకుంటుందని గురువారం వ్యాఖ్యానించారు. కొత్తగా ఎన్నికైన ఎమ్మెల్యేలతో సమావేశం నిర్వహించిన అనంతరం నితీశ్ మీడియాతో మాట్లాడుతూ.. పై విధంగా స్పందించారు. ‘బిహార్‌లో ఎన్‌డీఏ ప్రభుత్వం కొలువుదీరుతుంది, నాలుగు పార్టీలతో కూడిన తమ కూటమికే ప్రజల పట్టం కట్టారు.. అయితే, సీఎం పదవి నాకు కావాలని అడగటం లేదు’ అన్నారు. ఇదిలా ఉండగా, బిహార్ అసెంబ్లీ సహా వివిధ రాష్ట్రాల్లో జరిగిన ఉప-ఎన్నికల్లో బీజేపీ విజయం సాధించడంతో ఈ సందర్భంగా బుధవారం ఢిల్లీలో విజయోత్సవ సభను నిర్వహించారు. ఈ సభలో ప్రధాని నరేంద్ర మోదీ మాట్లాడుతూ.. నితీశ్ నాయకత్వంలో బిహార్ ప్రజలకు చేసిన వాగ్దనాలను తప్పకుండా నెరవేరస్తామని అన్నారు. దీంతో నవంబరు 17న నితీశ్ కుమార్ ముఖ్యమంత్రిగా ప్రమాణస్వీకారం చేయనున్నారనే ప్రచారం జోరుగా సాగుతోంది. కానీ, ఇంత వరకు ప్రమాణస్వీకారంపై ఎటువంటి నిర్ణయం తీసుకోలేదు. ఎన్నికల్లో విజయం తర్వాత తొలిసారి మీడియాతో గురువారం మాట్లాడారు. ‘ప్రమాణస్వీకారంపై శుక్రవారం జరిగే ఎన్‌డీఏ పక్షాల సమావేశంలో నిర్ణయం తీసుకుంటాం.. ఇప్పటి వరకు నిర్ణయం తీసుకోలేదు.. దీపావళి లేదా ఛట్ పూజ తర్వాతే ఈ కార్యక్రమం ఉంటుంది’అని అన్నారు. ఎన్‌డీఏలోకి తిరిగి ఎల్జేపీని చేర్చుకుంటారా? అన్న ప్రశ్నకు నితీశ్ స్పందిస్తూ.. దీనిపై నిర్ణయం తీసుకుంటుందని సమాధానం ఇచ్చారు. దీపావళి నవంబరు 14 కాగా.. నాలుగు రోజుల ఛట్ పూజ బిహార్‌లో నవంబరు 21న ముగియనుంది. గత ఎన్నికల్లో విజయం తర్వాత 2015 నవంబరు 20 నితీశ్ సీఎంగా ప్రమాణం చేశారు. ప్రభుత్వ ఏర్పాటు సహా కీలకమైన అంశాలపై తమ పార్టీ ప్రత్యేకంగా సమావేశమై నిర్ణయం తీసుకుంటుందని బిహార్ బీజేపీ అధికార ప్రతినిధి ప్రేమ్ రంజన్ పటేల్ వ్యాఖ్యానించారు.
By November 13, 2020 at 11:53AM
No comments