షాకింగ్ వీడియో.. ప్రభుత్వ ఆస్పత్రిలోకి చొరబడి మృతదేహాన్ని పీక్కుతిన్న కుక్క
ప్రభుత్వ ఆస్పత్రుల్లో సిబ్బంది నిర్లక్ష్య వైఖరికి నిదర్శనంగా నిలిచిన మరో ఘటన వెలుగులోకి వచ్చింది. ఆస్పత్రిలోకి చొరబడ్డ వీధి కుక్క స్ట్రెచర్‌పై ఉన్న యువతి ఓ మృతదేహాన్ని పీక్కుతినేందుకు ప్రయత్నించింది. ఈ దృశ్యాలను ఓ వ్యక్తి తన మొబైల్‌లో వీడియో తీసి సోషల్ మీడియాలో పోస్ట్ చేశారు. దీంతో ఆసుపత్రి సిబ్బందిపై తీవ్ర విమర్శలు వెల్లువెత్తుతున్నాయి. ఉత్తరప్రదేశ్‌లోని సంభాల్ జిల్లా ఆసుపత్రిలో ఈ ఘటన చోటు చేసుకుంది. దీనికి సంబంధించిన వీడియోను ట్విట్టర్‌లో పోస్ట్ చేసిన సమాజ్ వాదీ పార్టీ.. యూపీలోని ఆసుపత్రుల్లో సౌకర్యాలు, వైద్య సిబ్బంది నిర్లక్ష్యంపై తీవ్ర విమర్శలు గుప్పించింది. ఇందుకు బాధ్యులపై చర్యలు తీసుకోవాలని డిమాండ్ చేసింది. సంభాల్ జిల్లాలో జరిగిన రోడ్డు ప్రమాదంలో తీవ్ర గాయాలపాలైన ఓ యువతిని ఆసుపత్రికి తీసుకురాగా, అప్పటికే ఆమె మృతి చెందినట్లు వైద్యులు ధ్రువీకరించారు. దీంతో ఆమె మృతదేహంపై తెల్లని వస్త్రం కప్పిన ఆసుపత్రి సిబ్బంది స్ట్రెచర్‌పైనే వదిలేశారు. ఆస్పత్రిలోకి చొరబడిన ఓ వీధి కుక్క అక్కడికి వచ్చి ఆ యువతి మృతదేహాన్ని కొరుక్కుతినేందుకు ప్రయత్నించింది. ఈ దృశ్యాలను ఓ వ్యక్తి వీడియో తీయడంతో వెలుగులోకి వచ్చింది. ఇదిలా ఉండగా ఆసుపత్రి సిబ్బంది నిర్లక్ష్యం కారణంగానే తమ కుమార్తె మృతి చెందిందని ఆమె తండ్రి చరణ్‌ సింగ్ ఆరోపించారు. రోడ్డు ప్రమాదంలో తీవ్రంగా గాయపడిన తన కూమర్తెను చికిత్సి కోసం ఆసుపత్రికి తీసుకొచ్చినా.. గంటన్నరపాటు ఒక్క వైద్యుడు కూడా స్పందించలేదని వాపోయాడు. చికిత్స అందజేయడంలో జాప్యం వల్లే తన కుమార్తె మృతి చెందిందని ఆరోపించాడు. అంతేకాదు, వీధి కుక్కలు ఇలా ఆసుపత్రి లోపలికి చొరబడుతున్నా సిబ్బంది పట్టించుకోవడం లేదని ధ్వజమెత్తారు. అయితే, ఆ యువతి మృతదేహాన్ని ఇప్పటికే ఆమె కుటుంబ సభ్యులకు అప్పగించామని చెబుతున్న అధికారులు.. తమ తప్పేమీ లేదని చెప్పుకొచ్చే ప్రయత్నం చేశారు. ఆసుపత్రిలో అధిక సంఖ్యలో మృతదేహాలు ఉన్నాయని, ఈ నేపథ్యంలో సిబ్బంది అందుబాటులో లేకుండా పోయారని తెలిపారు. ఈ ఘటనపై పూర్తిస్థాయిలో విచారణ జరిపిస్తామని పేర్కొన్నారు. ఈ ఘటనపై స్పందించిన ముఖ్యమంత్రి కార్యాలయం అధికారిణి అమిత్ సింగ్.. విచారణకు ఓ కమిటీ నియమించినట్టు తెలిపారు. విచారణ తర్వాత దీనికి బాధ్యులైనవారిపై చర్యలు తీసుకుంటామని ఆమె పేర్కొన్నారు.
By November 27, 2020 at 01:31PM
No comments