నితీశ్ సీఎం అయితే మాకే థాంక్స్ చెప్పుకోవాలి.. బిహార్ ఫలితాలపై శివసేన వ్యాఖ్యలు!
బిహార్ శాసనసభ ఎన్నికల ఫలితాలపై శివసేన నేత ఆసక్తికర వ్యాఖ్యలు చేశారు. బీజేపీ కంటే జేడీయూ తక్కువ సీట్లు గెలుచుకున్నప్పటికీ ముఖ్యమంత్రి పదవిలో నితీశ్‌ను కొనసాగిస్తే శివసేనకు ఆయన కృతజ్ఞతలు చెప్పుకోవలని వ్యాఖ్యానించారు. మహారాష్ట్రలో గతేడాది ఏం జరిగిందో నితీశ్ గుర్తుకు తెచ్చుకోవాలని, ఎన్నికల ముందు తమకు ఇచ్చిన వాగ్దానం విషయంలో బీజేపీ ఏం చేసిందో గుర్తుచేసుకోవాలని మాజీ మిత్రుడిపై సంజయ్ మండిపడ్డారు. గతేడాది జరిగిన మహారాష్ట్ర అసెంబ్లీ ఎన్నికల్లో బీజేపీ-శివసేన కలిసి పోటీచేసి విజయం సాధించగా.. అధికారాన్ని చేరిసగం కాలం పంచుకోడానికి కాషాయ పార్టీ అంగీకరించలేదు. ఎన్నికల ముందే ఒప్పందం చేసుకున్నామని, ఇప్పుడు బీజేపీ మాట తప్పుతోందని ఆరోపిస్తూ ఎన్‌డీఏ నుంచి శివసేన బయటకు వచ్చిన విషయాన్ని సంజయ్ గుర్తుచేశారు. ‘నితీశ్ బాబే మళ్లీ ముఖ్యమంత్రి అవుతారని బీజేపీ నేతలు అంటున్నారు.. ఒకవేళ అదే జరిగితే శివసేనకు ఆయన కృతజ్ఞతలు చెప్పాలి.. వాగ్దానాలు అమలు చేయకపోవడం బీహార్‌లో జరగదు ఎందుకంటే అలా పాటించకపోతే ఏమి జరుగుతుందో శివసేన చూపించింది’ అని సంజయ్ అన్నారు. ‘అందువల్ల బీజేపీ కంటే తక్కువ స్థానాలు సాధించిన నితీశ్ ఒకవేళ సీఎం అయితే మాకు కృతజ్ఞతలు చెప్పుకోవాలి’ అని వ్యాఖ్యానించారు. ఇదే సమయంలో ప్రతిపక్ష నేత, మహాకూటమి సీఎం అభ్యర్థి తేజస్వీ యాదవ్‌పై కూడా రౌత్ ప్రశంసలు కురిపించారు. ప్రతికూల పరిస్థితుల్లోనూ తేజస్వీ అసమాన పోరాటం చేశారని, దీని వల్ల ప్రతిపక్షం ముఖ్యంగా కాంగ్రెస్‌కు లబ్ది చేకూరిందన్నారు. పరిస్థితులు అనుకూలించకపోయినా పోరాట పటిమను ప్రదర్శించిన తేజస్వీకే మ్యాన్ ఆఫ్ ది మ్యాచ్ దక్కుతుందని కితాబిచ్చారు. ‘విపత్కర పరిస్థితుల్లోనూ ప్రధాని నరేంద్ర మోదీ, సీఎం , ఇతర కేంద్ర మంత్రులను ఎదుర్కొని అన్నాతానై యువనేత ఒంటరి పోరాటం చేశారు.. దేశం, బిహార్ రాజకీయాల్లో అటువంటి వ్యక్తిని చూశామని’ ప్రశంసించారు.
By November 11, 2020 at 07:32AM
No comments