ఆక్స్ఫర్డ్ టీకా వికటించింది.. రూ.5 కోట్ల చెల్లించండి: సీరంకి చెన్నై వాలంటీర్ లీగల్ నోటీస్
భారత్‌లో ఆక్స్ఫర్డ్-ఆస్ట్రాజెన్‌కా కరోనా వైరస్‌ వ్యాక్సిన్‌ ‘కొవిషీల్డ్’ క్లినికల్ ట్రయల్స్ ఆఫ్ ఇండియా నిర్వహిస్తోన్న విషయం తెలిసిందే. అయితే, ఈ ప్రయోగాల్లో పాల్గొన్న చెన్నైకు చెందిన ఓ వాలంటీరు (40).. తనకు దుష్ర్పభావాలు తలెత్తాయని పేర్కొంటూ నష్టపరిహారం చెల్లించాలని లీగల్ నోటీసులు పంపడం చర్చనీయాంశమయ్యింది. తనపై ప్రయోగించిన టీకా డోసుల కారణంగా పలు నాడీ సంబంధ సమస్యలు తలెత్తాయని.. ఇందుకు గాను సీరం ఇన్‌స్టిట్యూట్‌ ఆఫ్ ఇండియా (ఎస్ఐఐ) రూ. 5 కోట్లు చెల్లించాలని నోటీసుల్లో డిమాండ్ చేశాడు. టీకా ప్రయోగాల్లో పాల్గొన్న చెన్నైకి చెందిన బిజినెస్‌ కన్సల్టెంట్‌‌కు భార్య, ఇద్దరు పిల్లలు ఉన్నారు. సీరం ఇన్‌స్టిట్యూట్‌, ఐసీఎంఆర్‌, అస్ట్రాజెనికా, డ్రగ్స్‌ కంట్రోలర్‌ జనరల్‌ ఆప్‌ ఇండియా, ఆక్స్ఫర్డ్ వ్యాక్సిన్‌ ప్రయోగాలు జరుగుతున్న జెన్నర్‌ ఇన్‌స్టిట్యూట్‌ ల్యాబొరేటరీలకు లీగల్ నోటీసు పంపినట్టు అతడి తరపు న్యాయవాది వెల్లడించారు. నవంబర్‌ 21న తాము పంపిన నోటీసుకు ఇప్పటి వరకు ఎవరూ స్పందించలేదని పేర్కొన్నారు. కొవిషీల్డ్ మూడో దశ క్లినికల్ ట్రయల్స్‌లో పాల్గొనేందుకు వాలంటీర్లు కావాలంటూ.. చైన్నైలోని రామచంద్ర రిసెర్చ్ ఇన్‌స్టిట్యూట్‌ ఇచ్చిన ప్రకటన మేరకు తాను దరఖాస్తు చేసుకున్నట్టు బాధితుడు తన నోటీసులో పేర్కొన్నారు. అయితే, తమకు ఇచ్చిన సమాచార పత్రంలో దుష్పరిణామాల గురించి హెచ్చరించలేదని తెలిపారు. అక్టోబర్‌ 1న తనకు తొలి డోసు ఇవ్వగా మొదటి పది రోజులు సాధారణంగా ఉందన్నాడు. అక్టోబర్‌ 11న భరించలేని తలనొప్పి, వాంతులు, తల తిరగడం తదితర సమస్యలతో లేవలేని పరిస్థితి ఎదురయ్యింది... 16 రోజుల చికిత్స అనంతరం అక్టోబర్‌ 26న ఆస్పత్రి నుంచి డిశ్చార్జి అయినట్టు తెలిపారు. తాను అనుభవించిన యాతన, భవిష్యత్తులో తలెత్తగల ఆరోగ్య సమస్యలను దృష్టిలో ఉంచుకుని తనకు రూ.5 కోట్ల పరిహారాన్ని మంజూరు చేయాలని బాధితుడు కోరుతున్నారు. అంతేకాదు, సదరు టీకా తయారీ, పంపిణీ, ప్రయోగాలను కూడా నిలిపివేయాలని అతడు డిమాండ్ చేస్తున్నాడు. బాధితుడి డిశ్చార్జ్ షీట్‌ ప్రకారం.. అతడు ఎన్‌సెఫలోపతీతోపాటు విటమిన్ బీ12, డీ లోపం, కణజాల సమస్యతో బాధపడినట్టు తెలుస్తోంది. రామచంద్ర రిసెర్చ్ ఇన్‌స్టిట్యూట్‌లో టీకా ప్రయోగాలను పర్యవేక్షించే డాక్టర్ ఎస్ఆర్ రామకృష్ణన్ మాట్లాడుతూ.. ప్రస్తుతం బాధితుడు కోలుకున్నాడని, ఎటువంటి అనారోగ్య సమస్యలు లేవన్నారు. కానీ మరిన్ని అంశాల గురించి సీరమ్ అధికార ప్రతినిధికి నివేదించామన్నారు. బాధితుడికి నాడీ సంబంధ సమస్యలు టీకా వల్ల తలెత్తలేదని అన్నారు. అయితే, డీజీసీఐకి సమాచారం ఇచ్చామని తెలిపారు. బాధితుడి భార్య మాట్లాడుతూ.. సమాజ హితం కోసమే తన భర్త క్లినికల్ ట్రయల్స్ పాల్గొన్నారని తెలిపింది. సెప్టెంబరు 29న ప్రయోగాల్లో పాల్గొనడానికి అంగీకారం తెలియజేస్తూ సంతకం చేశారు. అనంతరం యాంటీబాడీ పరీక్షలు నిర్వహించి, అక్టోబరు 1న తొలి డోస్ ఇచ్చారని అన్నారు. పది రోజుల తర్వాత తీవ్ర అస్వస్థతకు గురయ్యారని, 16 రోజులు చికిత్స అనంతరం డిశ్చార్జ్ చేశారని ఆమె అన్నారు. ఇప్పటికీ ఆయన కోలుకోలేదని, అపోలో హాస్పిటల్‌లోని న్యూరాలజిస్ట్‌ను సంప్రదించామని తెలిపారు.
By November 29, 2020 at 03:16PM
No comments