ప్రపంచంలోనే అత్యధికంగా SO2 ఉద్గారాలు వెలువరించే జాబితాలో విశాఖ, రామగుండం

ప్రపంచవ్యాప్తంగా పెద్ద సంఖ్యలో గతేడాది సల్ఫర్ డయాక్సైడ్ (SO2) ఉద్గారాలు వెలువరించే బొగ్గు ఆధారిత థర్మల్ పవర్ స్టేషన్‌లలో ఆంధ్రప్రదేశ్, తెలంగాణ‌ నుంచి రెండు ఉన్నాయని గ్రీన్‌పీస్ ఇండియా, సెంటర్ ఫర్ రిసెర్చ్ ఆన్ ఎనర్జీ అండ్ క్లీన్ ఎయిర్ నివేదిక వెల్లడించింది. అంతేకాదు, ప్రపంచంలోనే భారీగా సల్ఫర్ డయాక్సైడ్ ఉద్గారాలు వెలువరించే దేశాల జాబితాలో వరుసగా ఐదో ఏడాది భారత్ ముందు వరుసలో నిలిచింది. బొగ్గు అధారిత సల్ఫర్ డయాక్సైడ్ ఉద్గారాలు వెలువరించే టాప్-50 జాబితాలో విశాఖపట్నం థర్మల్ పవర్ స్టేషన్ 11వ స్థానంలోనూ, రామగుండం 31వ స్థానంలోనూ నిలిచాయి. ఇక, 2019లో ప్రపంచవ్యాప్తంగా విడుదలైన సల్ఫర్ డయాక్సైడ్ ఉద్గారాల్లో 21 శాతం భారత్ విడుదల చేయగా.. రెండో స్థానంలో ఉన్న రష్యా కంటే ఇది రెట్టింపు. ఈ జాబితాలో చైనా మూడో స్థానంలో నిలిచింది. అయితే, 2018తో పోల్చితే 2019లో సల్ఫర్ డయాక్సైడ్ ఉద్గారాలు 6 శాతం తక్కువగా నమోదయ్యాయని, గత నాలుగేళ్లలో తగ్గడం ఇదే తొలిసారని నివేదిక పేర్కొంది. తాజా నివేదిక ప్రకారం.. సల్ఫర్ డయాక్సైడ్ ఉద్గారాలకు థర్మల్ పవర్ స్టేషన్‌లు హాట్‌స్పాట్స్‌గా మారాయి. ఇక, 2019లో రామగుండం థర్మల్ పవర్ స్టేషన్ నుంచి 102 కిలో టన్నుల SO2 ఉద్గారాలు విడుదలయ్యాయి. 2018లో 130 కిలో టన్నులు విడుదల కాగా.. 21.1 శాతం మేర తగ్గాయి. విశాఖపట్నం థర్మల్ పవర్ స్టేషన్ నుంచి 2019లో SO2 ఉద్గారాలు 172 కిలో టన్నులు విడుదల కాగా.. 2018లో ఇది 155 కిలోటన్నులగా ఉంది. అంతకు ముందు ఏడాదితో పోల్చితే 10.8 శాతం ఎక్కువ. యాదృచ్ఛికంగా, బొగ్గుతో పాటు ఇతర వనరుల నుంచి అన్ని SO2 ఉద్గారాల ర్యాంకింగ్స్‌లో విశాఖపట్నం 27 వ స్థానంలో నిలిచింది. దేశంలో మరో హాట్‌స్పాట్‌గా మధ్యప్రదేశ్‌లోని సింగ్రౌలి ఈ జాబితాలో చేరింది. ‘SO2 ఒక ఆమ్ల వాయువు.. ఇది పదార్థాలను క్షీణింపజేస్తుంది.. విద్యుత్ ప్లాంట్లు SO2ను 1.5 కిలోమీటర్ల ఎత్తు వరకు విడుదల చేయగలవు.. ఇటువంటి కాలుష్య కారకాలు రోజుకు 500 కిలోమీటర్లు ప్రయాణించగలవు’అని దక్షిణాసియా పీపుల్స్ యాక్షన్ ఆన్ క్లైమేట్ క్రైసిస్ కో-కన్వీనర్ సాగర్ ధారా అన్నారు. జీవావరణంపై పశ్చిమ కనుమల వరకు కూడా SO2 ప్రభావం ఉంటుందని ధారా చెప్పారు. ఈ ప్రాంతంలో ఇప్పటికే ఆమ్లం మట్టిలో కలిసిపోయింది.. ఒక దశాబ్దంలో అడవులు అంతరించపోవడం ప్రారంభమవుతాయి.. వాయువులు నిక్షేపమైన చోట వృక్షసంపద కోల్పోవడం, మానవ ఆరోగ్యంపై హానికర ప్రభావాలు ఉంటాయి అని అన్నారు.

By October 09, 2020 at 08:15AM

Read More https://telugu.samayam.com/latest-news/india-news/ramagundam-vizag-among-worst-so2-emitters-in-world-says-greenpeace-india-report/articleshow/78565505.cms