గట్టిగానే దెబ్బకొట్టిన కరోనా.. తలసరి జీడీపీలో బంగ్లాదేశ్ వెనుక భారత్!

ప్రస్తుత ఆర్ధిక సంవత్సరంలో భారత స్థూల జాతీయోత్పత్తి (జీడీపీ) 10.3 శాతం మేర పతనం అవుతుందని అంతర్జాతీయ ద్రవ్య నిధి (ఐఎంఎఫ్) అంచనా వేసింది. కోవిడ్ 19 కారణంగానే ఈ పరిస్థితులు నెలకున్నాయని పేర్కొంది. వాస్తవానికి జూన్‌లోనే జీడీపీ పతనం 4.5 శాతంగా ఉంటుందని ఐఎంఎఫ్ వెల్లడించింది. తాజా అంచనాల ప్రకారం తలసరి జీడీపీలో బంగ్లాదేశ్‌ కంటే భారత్‌ దిగువన ఉండటం గమనార్హం. కరోనా మహమ్మారి, లాక్‌డౌన్‌ నేపథ్యంలో భారత్‌ ఆర్థిక వ్యవస్థ దెబ్బతినడంతో తలసరి జీడీపీలో భారీ కోత తప్పదని ఐఎంఎఫ్‌, వరల్డ్‌ ఎకనమిక్‌ అవుట్‌లుక్‌ (డబ్ల్యూఈఓ) నివేదిక స్పష్టం చేసింది. ఇక, 2020లో బంగ్లాదేశ్‌లో తలసరి జీడీపీ 1888 డాలర్లతో 4 శాతం వృద్ధి నమోదుచేస్తే, భారత్‌లో తలసరి జీడీపీ నాలుగేళ్ల కనిష్టానికి 10.5 శాతం తగ్గి 1877 డాలర్లకు పడిపోతుందని ఐఎంఎఫ్‌ అంచనా వేసింది. ఈ గణాంకాల ఆధారంగా చూస్తే దక్షిణాసియలో భారత్‌ మూడో అత్యంత పేద దేశంగా నిలవనుంది. భారత్‌ తర్వాతి స్థానంలో పాకిస్థాన్, నేపాల్‌లు ఉండగా...బంగ్లాదేశ్‌, భూటాన్‌, శ్రీలంక, మాల్దీవులు మన కంటే ముందున్నాయి. దక్షిణాసియాలో శ్రీలంక తర్వాత భారత ఆర్థిక వ్యవస్థ దారుణంగా దెబ్బతిందని డబ్ల్యూఈఓ గణాంకాలు చెబుతున్నాయి. కాగా నేపాల్‌, భూటాన్‌లు ఈ ఏడాది ఆర్థిక వృద్ధిని సాధిస్తాయని పేర్కొంది. కానీ, 2020పాకిస్థాన్‌కు సంబంధించిన గణాంకాలు, అంచనాలను ఐఎంఎఫ్‌ వెల్లడించలేదు. ఇదిలా ఉండగా 2021-22 ఆర్థిక సంవత్సరంలో 8.8 శాతం వృద్ధితో భారత్ తిరిగి అభివృద్ధి పథంలోకి వస్తుందని అంచనా వేసింది. జూన్‌లో ఈ అంచనా ఆరు శాతంగా ఐఎంఎఫ్ పేర్కొంది. ఇదే సమయంలో చైనా జీడీపీ వృద్ధి రేటు 8.2 శాతంగా ఉంటుందని తెలిపింది. వచ్చే ఏడాది భారత్‌లో ఆర్థిక రికవరీ చోటుచేసుకుంటుందని ఐఎంఎఫ్‌ అంచనా వేసింది. అదే జరిగితే 2021లో తలసరి జీడీపీలో బంగ్లాదేశ్‌ను భారత్‌ అధిగమించే అవకాశం ఉంది అభివృద్ధి చెందుతున్న మార్కెట్లు సహా ఇటలీ, స్పెయిన్ మినహా ఏ పెద్ద ఆర్థిక వ్యవస్థలోనైనా తిరోగమనం అతిపెద్దది. బ్రిక్స్ గ్రూపులోని బ్రెజిల్ ఆర్థిక వ్యవస్థ 5.8 శాతం, రష్యా 4.1 శాతం, దక్షిణాఫ్రికా 8.0 శాతం వద్ద స్థిరపడగా.. చైనా 1.9 శాతం మేర వృద్ధి చెందుతుందని తెలిపింది. దేశ జీడీపీ విషయంలో ఐఎంఎఫ్ వెల్లడించిన అంచనాలను ప్రస్తావిస్తూ కేంద్రం కాంగ్రెస్ నేత రాహుల్ గాంధీ మరోసారి విమర్శలు గుప్పించారు. ‘ఈ ఆరేళ్లలో బీజేపీ విద్వేషపూరిత సాంస్కృతిక జాతీయవాదం సాధించిన ఘన విజయం. భారత్‌ను అధిగమించడానికి బంగ్లాదేశ్ సిద్ధంగా ఉంది’ అని వ్యంగ్యాస్త్రాలు సంధించారు.

By October 14, 2020 at 01:07PM

Read More https://telugu.samayam.com/latest-news/india-news/india-set-to-drop-below-bangladesh-in-per-capita-growth-says-imf-report/articleshow/78656255.cms