బహిరంగ సభలో మాట్లాడుతూ బోరున విలపించిన ఉత్తర కొరియా అధినేత.. కారణం ఇదే
నియంత వ్యవహారశైలి ఎవరికీ అంతుబట్టదు. ప్రపంచంలోనే అత్యంత క్రూరుడిగా పేరున్న కిమ్.. ఏడుస్తాడంటే ఎవరైనా నమ్ముతారా? కానీ అటువంటి దృశ్యానికి అధికార వర్కర్స్‌ పార్టీ ఆఫ్ కొరియా వార్షికోత్సవం వేదికగా నిలిచింది. పార్టీ 75వ వార్షికోత్సవం సందర్భంగా జరిగిన పరేడ్‌లో కిమ్ ఉద్వేగానికి గురయ్యారు. తన ప్రసంగం మధ్యలో ఆయన కన్నీరు పెట్టుకున్నారు. దేశ ప్రజల కష్టాల గురించి చెబుతున్నప్పుడు, సైనికులకు కృతజ్ఞతలు చెబుతున్నప్పుడు కిమ్ భావోద్వేగానికి గురైనట్లు కనిపించారు. నరరూప రాక్షసుడగా తనకున్న చెడ్డ పేరును చెరుపుకోడానికి లేదా తన పాలనతో విసిగిపోయి ఉన్న ప్రజలను కాస్త మచ్చిక చేసుకోడానికి ఆయన అలా ప్రవర్తించి ఉండవచ్చని నిపుణులు అభిప్రాయపడుతున్నారు. అస్తవ్యస్తంగా ఉన్న ఆర్థిక పరిస్థితి, పరిపాలన విషయంలో కిమ్‌పై నెలకొన్న ఒత్తిడికి కూడా ఆ కన్నీరుకు కారణం కావచ్చంటున్నారు. కాగా, శనివారం నిర్వహించిన పరేడ్‌లో భారీ ఖండాంతర బాలిస్టిక్‌ క్షిపణుల్ని(ఐసీఎంబీ)లను ఉత్తర కొరియా ఆవిష్కరించింది. ఐసీఎంబీలను ఏకంగా 11 యాక్సిల్‌ ఉన్న భారీ వాహనంపై ప్రదర్శించారు. ఈ క్షిపణి వినియోగంలోకి వస్తే ప్రపంచంలోనే అతి పెద్ద ఐసీఎంబీల్లో ఒకటిగా నిలుస్తుందనేది నిపుణుల అంచనా వేస్తున్నారు. అమెరికాలోని అన్ని ప్రాంతాలను లక్ష్యంటా చేసుకుని, దాడి చేసేలా ఈ ఐసీబీఎంను రూపొందించినట్లు తెలుస్తోంది. అలస్కాలోని అమెరికా రక్షణ వ్యవస్థే లక్ష్యంగా దీనిని రూపొందించారని మిడల్‌బ్యురే ఇన్‌స్టిట్యూట్ ఆఫ్ ఇంటర్నేషనల్ స్టడీస్‌‌కి చెందిన జెఫ్రీ లూయిస్ అన్నారు. ఈ సందర్భంగా ప్రసంగించిన దేశాధ్యక్షుడు కిమ్ జోంగ్ ఉన్‌.. తమ దేశ రక్షణ వ్యవస్థను మరింత పటిష్ఠం చేస్తానని వాగ్దానం చేశారు. మన దేశ రక్షణ శక్తిని, స్వీయరక్షణను బలోపేతం చేయడాన్ని కొనసాగిస్తామని అన్నారు. అంతర్జాతీయ ఆంక్షలు, తుఫాన్లు, కరోనా వైరస్‌ కారణంగా ఆర్థిక ప్రగతిపై ఇచ్చిన వాగ్దానాలు నెరవేర్చలేకపోయానని ఆవేదన వ్యక్తం చేశారు. మీరు నాపై ఉంచిన అపారమైన నమ్మకానికి తగ్గట్టుగా ఏమీ చేయలేకపోయినందుకు సిగ్గు పడుతున్నానని అన్నారు. మన ప్రజల్ని కష్టాల నుంచి బయటికి తీసుకొచ్చేందుకు నా ప్రయత్నాలు, అంకిత భావం సరిపోలేదన్నారు. అయితే.. దేశంలో ఒక్కరు కూడా కరోనా బారిన పడకపోవడంపై నాకు సంతోషంగా ఉందని వ్యాఖ్యానించారు. కరోనా మహమ్మారి ప్రపంచం నుంచి పూర్తిగా అంతరించి పోయిన తర్వాత ఉత్తర కొరియా, దక్షిణ కొరియా మళ్లీ చేయి చేయి కలుపుతాయని ఆశిస్తున్నానని కిమ్ తన ప్రసంగాన్ని ముగించారు. దాదాపు అరగంట సేపు ప్రసంగించిన ఆయనకు, అర్ధరాత్రి చల్లటి వాతావరణంలోనూ చెమటలు పట్టడం ఆసక్తికరం. ప్రసంగం మొత్తంలో అమెరికా గురించి కిమ్ ఏమాత్రం ప్రస్తావించకపోవడం విశేషం.
By October 12, 2020 at 08:12AM
No comments