విధి నిర్వహణలో ఉన్న పోలీస్‌పై దాడి.. మహిళా మంత్రికి మూడు నెలల జైలు
విధి నిర్వహణలో ఉన్న పోలీసులపై దాడి చేసిన ఘటనలో ఓ మంత్రికి న్యాయస్థానం మూడు నెలల జైలు శిక్ష, జరిమానా విధించింది. మహారాష్ట్ర మహిళ, శిశు అభివృద్ధి శాఖ మంత్రి యశోమతీ ఠాకుర్‌కి అమరావతి జిల్లా సెషన్సు కోర్టు శిక్ష ఖరారు చేస్తూ తీర్పు వెలువరించింది. కేసు వివరాల్లోకి వెళితే.. ఎనిమిదేళ్ల కిందట యశోమతీ ఠాకూర్ తన వాహనాన్ని ఆపినందుకు విధుల్లో ఉన్న పోలీసుపై దాడి చేయడంతో ఆమెకు ఈ శిక్ష ఖరారయ్యింది. ఠాకుర్‌తో పాటు ఆమె కారు డ్రైవర్, మరో ఇద్దరికి సైతం మూడు నెలల కఠిన జైలు శిక్ష, రూ.15,500 జరిమానా విధించింది. జరిమానా చెల్లించని పక్షంలో నేరస్థులు మరో నెల పాటు జైలు శిక్ష అనుభవించాల్సి ఉంటుందని స్పష్టం చేసింది. అమరావతి జిల్లా తివ్సా నియోజవర్గానికి ప్రాతినిధ్యం వహిస్తోన్న .. 2012 మార్చి 24న ఓ ఆలయానికి వెళ్తుండగా.. మార్గమధ్యంలో ఉల్హాస్ రౌరాలే అనే స్థానిక పోలీస్ కానిస్టేబుల్ ఆమె వాహనాన్ని ఆపారు. దీనికి ఆగ్రహించిన యశోమతి ఆయనపై దాడి చేశారు. కారు డ్రైవర్ కూడా పోలీసుపై దౌర్జన్యానికి పాల్పడ్డాడు. మంత్రిని దోషిగా న్యాయస్థానం నిర్దారించి, శిక్ష ఖరారుచేసినందున పదవి నుంచి తప్పుకోవాలని ప్రతిపక్ష బీజేపీ డిమాండ్ చేస్తోంది. అయితే, ఈ కేసులో తాను బాంబే హైకోర్టును ఆశ్రయిస్తానని మంత్రి యశోమతి పేర్కొన్నారు. హైకోర్టులో తనకు న్యాయం జరుగుతుందనే నమ్మకం ఉందని, నాగ్‌పూర్ బెంచ్‌లో పిటిషన్ దాఖలు చేయనున్నట్టు పేర్కొన్నారు. ఇక, మంత్రి యశోమతి ఠాకూర్‌కు కాంగ్రెస్‌లో ఫైర్ బ్రాండ్ నేతగా గుర్తింపు ఉంది. గతంలోనూ ఆమె అనేక వివాదాల్లో చిక్కుకున్నారు. ‘తన రాజీనామా కోరే హక్కు బీజేపీకి లేదు.. మహిళా శిశు సంక్షేమ శాఖలో పాల్పడిన అక్రమాలు బయటకు వస్తాయనే భయంతో తనపై విమర్శలు చేస్తున్నారు.. నా రాజకీయ జీవితాన్ని నాశనం చేయడానికి ప్రయత్నిస్తున్నారు’ అని ఆరోపించారు. దేవేంద్ర ఫడ్నవీస్ నాయకత్వంలోని గత బీజేపీ ప్రభుత్వం జలయుక్త శివార్ అభియాన్ పథకం కింద రూ.9వేల కోట్లు దుర్వినియోగం చేసినట్టు కంప్ట్రోలర్ అండ్ ఆడిటర్ జనరల్ (కాగ్) నివేదిక బయటపెట్టింది. దీనిపై విచారణకు సిట్ ఏర్పాటుచేయాలని తాజాగా ఉద్ధవ్ సర్కారు నిర్ణయించింది.
By October 16, 2020 at 06:55AM
No comments