ఆ ప్రశ్న అడుగుతున్నవారికి ఇదే సమాధానం.. ఆక్స్‌ఫర్డ్ టీకాపై సీరమ్ సీఈఓ స్పందన
ప్రయోగ దశలో ఉన్న ఆక్స్‌ఫర్డ్ వ్యాక్సిన్ యువత, వృద్ధుల్లో ఒకేరకమైన రోగనిరోధక ప్రతిస్పందనను కలిగిస్తున్నట్లు ప్రాథమిక ఫలితాల్లో వెల్లడయినట్టు ఆస్ట్రాజెన్కా ప్రకటించింది. భారత్‌లో‌నూ క్లినికల్ ట్రయల్స్‌ను పుణేకు చెందిన ఆఫ్ ఇండియా నిర్వహిస్తోన్న విషయం తెలిసిందే. దీనిపై సీరమ్ ఇనిస్టిట్యూట్ సీఈఓ స్పందిస్తూ.. ప్రాథమికంగా ఇది చాలా మంచి వార్తంటూ ఆయన ఆశాభావం వ్యక్తం చేశారు. ‘వృద్ధులు, వైరస్ కారణంగా తీవ్ర ముప్పు ఎదుర్కొంటున్న వ్యక్తుల్లో ఈ ప్రారంభ టీకాలు పనిచేస్తాయా? అంటూ చాలా మంది నన్ను ఆశ్చర్యంగా ప్రశ్నిస్తున్నారు. ఇక్కడ వారికి ప్రాథమికంగా మంచి శుభవార్త ఉంది’ అని ట్వీట్ చేస్తూ బ్లూబర్గ్ కథనాన్ని షేర్ చేశారు. వృద్ధుల్లో కూడా టీకా ఆశాజనంగా ఉందంటూ ఆస్ట్రాజెనికా చేసిన ప్రకటనను బ్లూబర్గ్ కథనం నివేదించింది. కరోనా వైరస్ వ్యాక్సిన్ ఉత్పత్తి నిమిత్తం ఆస్ట్రాజెనికా, నోవావ్యాక్స్‌తో కలిపి సుమారు ఐదు ఫార్మా సంస్థలతో సీరమ్ ఇన్‌స్టిట్యూట్ ఒప్పందం కుదుర్చుకుంది. అలాగే ఈ సంస్థ కొవిషీల్డ్ టీకా రెండు, మూడు దశ ప్రయోగాలు నిర్వహిస్తోంది. అంతేకాకుండా ఈ ఏడాది చివరికి టీకా సిద్ధంగా ఉండొచ్చని, 2021 మార్చి నాటికి మార్కెట్‌లోకి అందుబాటులోకి రావొచ్చని ఆశిస్తున్నట్లు గతంలో వెల్లడించింది. ఆక్స్‌ఫర్డ్ టీకా వృద్ధుల్లోనూ బలమైన రోగనిరోధక ప్రతిస్పందనను ఉత్పత్తి చేసినట్టు ఆస్ట్రాజెన్కా తెలిపింది. వృద్ధుల్లోనూ యాంటీబాడీలు, టి-కణాలను టీకా ప్రేరేపించినట్టు కనుగొన్నారని నివేదిక వివరించింది. కరోనా వైరస్ ముప్పు తీవ్రత ఎక్కువగా ఉన్న వృద్ధుల్లో టీకా సమర్ధవంతంగా పనిచేస్తున్నట్టు గుర్తించామని పరిశోధనలో పాల్గొన్న శాస్త్రవేత్తలు చెప్పినట్టు నివేదిక తెలిపింది. 18-55 ఏళ్ల మధ్య వయస్సు గల ఆరోగ్యవంతుల్లో టీకా బలమైన రోగనిరోధక ప్రతిస్పందనలను ఉత్పత్తి చేసినట్లు జులైలో విడుదల చేసిన ఫలితాలు తెలిపాయని, ఇమ్యునోజెనిసిటీ పరీక్షల ఫలితాల గురించి ఇప్పటికే తెలుసని చెప్పింది. కాగా, తొలి బ్యాచ్ వ్యాక్సిన్ కోసం సిద్ధంగా ఉండాలని తమకు ఆదేశాలు అందాయని లండన్‌లోని ఓ మేజర్ హాస్పిటల్ స్టాఫ్ వెల్లడించినట్టు సన్ దినపత్రిక సోమవారం వెల్లడించింది. నవంబరు 2 నుంచి ప్రారంభమయ్యే వారానికి సిద్ధంగా ఉండాలని హాస్పిటల్‌కు ఆదేశాలు అందినట్టు సన్ పత్రిక వివరించింది.
By October 28, 2020 at 08:41AM
No comments