దేశంలో కరోనా వైరస్: మొత్తం కేసుల్లో 41 శాతం సెప్టెంబరులోనే నమోదు
దేశంలో యాక్టివ్ కేసులు గత రెండు రోజుల నుంచి తగ్గుముఖం పడుతున్నాయి. అయితే, భారత్‌లో మొదలైన తర్వాత సెప్టెంబరు నెలలోనే అత్యధిక కేసులు, మరణాలు చోటుచేసుకున్నాయి. బుధవారం దేశవ్యాప్తంగా 1,173 మంది ప్రాణాలు కోల్పోగా.. దేశంలో మొత్తం కరోనా మరణాలు 98,628కి చేరాయి. ఇక, సెప్టెంబరు నెలలో 33,255 మందిని మహమ్మారి బలితీసుకుంది. దేశం మొత్తం కరోనా మరణాల్లో ఇది 33.7 శాతం. ఆగస్టులో మొత్తం 28,859 మంది ప్రాణాలు కోల్పోగా.. ఆ రికార్డును సెప్టెంబరు అధిగమించింది. 19,122, జూన్‌లో 11,988, మేలో 4,267 మంది కరోనా కాటుకు బలయ్యారు. బుధవారం దేశంలో మరో 86వేల మందికిపైగా వైరస్ నిర్ధారణ అయ్యింది. దీంతో మొత్తం కరోనా కేసుల 63 లక్షలు దాటాయి. వీరిలో 52.70 లక్షల మంది కోలుకోగా.. మరో 9.40 లక్షల మంది ఆస్పత్రుల్లో చికిత్స పొందుతున్నారు. కర్ణాటకలో బుధవారం 8,856 మందికి కొత్తగా వైరస్ నిర్ధారణ అయ్యింది. దీంతో మొత్తం కేసుల సంఖ్య ఆరు లక్షలు దాటింది. మహారాష్ట్ర, ఆంధ్రప్రదేశ్ తర్వాత కోవిడ్-19 కేసులు ఆరు లక్షలు దాటిన మూడో రాష్ట్రంగా కర్ణాటక నిలిచింది. అటు, మహారాష్ట్రలో వరుసగా రెండో రోజు మరణాలు రికార్డు స్థాయిలో చోటుచేసుకున్నాయి. మంగళవారం 430 మంది చనిపోగా.. బుధవారం మరో 480 మంది ప్రాణాలు కోల్పోయారు. మహారాష్ట్రలో అత్యధికంగా 18,317 మందికి వైరస్ నిర్ధారణ కాగా.. ముంబయి నగరంలో మరోసారి మహమ్మారి విజృంభిస్తోంది. బుధవారం అత్యధికంగా 2,654 కేసులు నిర్ధారణ అయ్యాయి. సెప్టెంబరు 17న 2,411 కేసులు నమోదుకాగా.. బుధవారం అంతకు మించి కేసులు నమోదయ్యాయి. మరో 46 మంది ప్రాణాలు కోల్పోగా.. మొత్తం కరోనా మరణాలు ముంబయిలో దాదాపు 9వేలకు చేరుకున్నాయి. తెలుగు రాష్ట్రాల్లో కరోనా కేసుల తగ్గుదల కొనసాగుతోంది. మంగళవారం ఉదయం 9 నుంచి బుధవారం 9 గంటల మధ్య ఏపీలో 71,806 మందికి పరీక్షలు చేశారు. ఇందులో 6,133 (8.54%) మందికి వైరస్ నిర్ధారణ అయ్యింది. అత్యధికంగా తూర్పు గోదావరిలో 983 (16.02%) కేసులు నమోదయ్యాయి. ఇక, తెలంగాణలో కొత్తగా 2,103 కరోనా కేసులు నమోదయ్యాయి. దీంతో మొత్తం కొవిడ్‌ బాధితుల సంఖ్య 1,91,386కు పెరిగింది. కరోనాతో మంగళవారం 11 మంది మృత్యువాతపడగా.. రాష్ట్రంలో ఈ వ్యాధితో మొత్తం మరణించినవారి సంఖ్య 1,127కు చేరింది.
By October 01, 2020 at 07:58AM
No comments