దారుణం..లిఫ్ట్ ఇస్తామని నమ్మబలికి బాలికను బంధించి 22 రోజులు గ్యాంగ్ రేప్
17 ఏళ్ల బాలికను కిడ్నాప్ చేసి 22 రోజులపాటు బంధించి కామాంధులు గ్యాంగ్ రేప్‌నకు పాల్పడిన ఘటన ఒడిశాలో వెలుగుచూసింది. గత నెలలో తల్లిదండ్రులతో గొడవపడి ఇంటి నుంచి బయటకు వెళ్లిపోయిన బాధితురాలిని నిందితుడు మాయమాటలు చెప్పి అపహరించి, ఓ ప్రాంతంలో బంధించిన మరో వ్యక్తితో కలిసి అత్యాచారానికి పాల్పడ్డాడు. పోలీసుల కథనం ప్రకారం.. జగత్‌సింగ్‌పూర్ జిల్లాలోని త్రితాల్‌కు చెందిన బాలిక తల్లిదండ్రులతో గొడవ జరగడంతో ఇంటి నుంచి వెళ్లిపోయింది. కటక్ చేరుకున్న బాధితురాలు ఇంటికి వెళ్లిపోవాలని మనసు మార్చుకుంది. తన స్వగ్రామానికి వెళ్లేందుకు కటక్‌లోని ఓఎంపీ స్క్యేర్ వద్ద బస్టాప్‌లో ఉండగా.. బైక్‌పై వచ్చిన ఓ వ్యక్తి ఆమెకు లిఫ్ట్ ఇస్తానని చెప్పి నమ్మించాడు. ఇది నిజమేనని నమ్మిన బాలిక.. అతడి బైక్‌ ఎక్కింది. అక్కడ నుంచి బాలికను త్రితాల్‌కు తీసుకెళ్లకుండా గాటిరూట్‌పట్నా గ్రామ శివార్లలోని పౌల్ట్రీ వద్దకు తీసుకెళ్లి అక్కడ ఓ గదిలో బంధించాడు. బాలికను 22 రోజుల పాటు బంధించి, మరో వ్యక్తితో కలిసి అత్యాచారం చేశాడు. పౌల్ట్రీ వద్ద అసాంఘిక కార్యకలాపాలు జరుగుతున్నట్టు అనుమానించిన గ్రామస్థులు స్థానిక పోలీసులకు సమాచారం ఇవ్వడంతో ఘటన వెలుగులోకి వచ్చింది. దీంతో ఓ వ్యక్తిని అదుపులోకి తీసుకున్న పోలీసులు.. మరో నిందితుడి కోసం గాలిస్తున్నారు. బాలికను జిల్లా శిశు సంక్షేమ అధికారులకు అప్పగించారు. నిందితులపై అత్యాచారం, కిడ్నాప్ కేసులను నమోదుచేశారు. ఈ ఘటనపై నవీన్ సర్కారును టార్గెట్ చేస్తూ ప్రతిపక్ష బీజేపీ, కాంగ్రెస్‌లు విమర్శలు గుప్పించాయి. మహిళలకు రక్షణ కల్పించడంలో బీజేడీ ప్రభుత్వం పూర్తిగా విఫలమయ్యిందని బీజేపీ రాష్ట్ర ప్రధాన కార్యదర్శి లేఖాశ్రీ సమంతిగర్ మండిపడ్డారు. ఈ ఘటనపై పూర్తిస్థాయి దర్యాప్తు జరిపించి, బాధితురాలి కుటుంబానికి రూ.25 లక్షల ఆర్ధిక సాయం చేయాలని కాంగ్రెస్ పార్టీ డిమాండ్ చేసింది.
By October 15, 2020 at 08:56AM
No comments