చిరుతదాడిలో మరో మహిళ మృతి.. రెండు నెలల్లో 10 మంది మృత్యువాత

ఉత్తరాఖండ్‌లో ఘటనలు వరుసగా చోటుచేసుకుంటున్నాయి. కేవలం రెండు నెలల్లోనే చిరుత దాడి ఘటనలో 10 మంది ప్రాణాలు కోల్పోయారు. తాజాగా, చిరుత దాడి చేసిన ఘటనలో మరో మహిళ మృత్యువాత పడిన ఘటన వెలుగులోకి వచ్చింది. గడ్డి కోసం అడవుల్లోకి వెళ్లిన 40 ఏళ్ల మహిళపై చిరుతపులి దాడి చేసిన ఘటన పితోర్‌గఢ్ జిల్లాలో జరిగింది. బుధవారం సాయంత్రం జరిగిన ఈ ఘటనలో 40 ఏళ్ల మహిళ మృతిచెందినట్టు డివిజనల్ ఫారెస్ట్ ఆఫీసర్ వినయ్ భార్గవ తెలిపారు. ‘పాపిడియో వాన్ పంచాయితీ పరిధిలోని అటవీ ప్రాంంతంలో గడ్డి కోస్తున్న మహిళపై ఓ చిరుతపులి దాడి చేసి నోట కరచుకొని 50 మీటర్ల దూరంలోని పొదల్లోకి లాక్కెళ్లింది. ఆమె అరుపులు విన్న తోటి మహిళలు వెళ్లి చూడగా అప్పటికే చనిపోయింది’అని వినయ్ భార్గవ్ వెల్లడించారు. మహిళ మృతదేహాన్ని స్వాధీనం చేసుకుని పోస్టుమార్టం కోసం తరలించామని, నెలరోజుల్లో చిరుతపులి దాడి చేయడం ఇది ఐదోసారి అని పేర్కొన్నారు. అక్టోబరు 11న తెహ్రీ-గర్వాల్ జిల్లాలో ఓ ఏడేళ్ల బాలిక ఇంటి బయట ఉన్న వాష్ రూం కోసం రాత్రివేళ రాగా చిరుతపులి దాడి చేసింది. ఈ దాడిలో బాలిక ప్రాణాలు కోల్పోయింది. అక్టోబరు 7న మరో ఏడేళ్ల బాలిక చిరుతదాడిలో చనిపోయింది. అక్టోబరు 1న ఓ 14 ఏళ్ల బాలిక పొలం గడ్డి కోస్తుండగా చిరుత దాడిచేసి ప్రాణాలు తీసింది. సెప్టెంబరు 24న 11 ఏళ్ల బాలిక ఇంటి బయట ఆడుకుంటున్న సమయంలో చిరుత దాడి చేసి చంపింది. సెప్టెంబరు 19న అల్మోరాలో మరో బాలిక చిరుతకు చిక్కి బలైంది. సెప్టెంబరు 22న ఓ మహిళను చిరుత పొట్టనబెట్టుకుంది. ఇలా వరుస దాడులతో ప్రజలు భయాందోళనలు చెందుతున్నారు. చిరుతపులిని పట్టుకునేందుకు చర్యలు తీసుకుంటున్నామని డీఎఫ్ఓ చెప్పారు.

By October 15, 2020 at 08:16AM

Read More https://telugu.samayam.com/latest-news/india-news/woman-killed-by-leopard-in-pithoragarh-in-uttarakhand-five-incidents-occured-past-one-month/articleshow/78672584.cms