యువకుడు ఆత్మహత్యాయత్నం.. సకాలంలో స్పందించి ప్రాణాలు కాపాడిన ఫేస్బుక్
కరోనా వైరస్ కట్టడికి విధించిన లాక్డౌన్ కారణంగా ఉద్యోగం కోల్పోయిన ఓ యువకుడు.. తీవ్ర మనో వేదనకు గురయ్యాడు. ఆత్మహత్యే శరణ్యమని భావించిన ఆ యువకుడు తన ఫేస్బుక్ ఖాతాలో ఓ వీడియోను పోస్ట్ చేశాడు. ఈ వీడియోను చూసి, సకాలంలో స్పందించిన సిబ్బంది పోలీసులకు సమాచారం ఇవ్వడంతో యువకుడి ప్రాణాలు నిలబడ్డాయి. పోలీసులు కూడా సమయస్ఫూర్తితో వ్యవహరించి యువకుడి ఆత్మహత్యాయత్నాన్ని ఆపగలిగారు. ఈ ఘటన పశ్చిమ్ బెంగాల్లోని నాడియా జిల్లాలో సోమవారం చోటుచేసుకుంది. పోలీసులు తెలిపిన వివరాల ప్రకారం.. భీంపూర్ గ్రామానికి చెందిన ఓ యువకుడు ఆత్మహత్య చేసుకుంటున్నానంటూ సోమవారం మధ్యాహ్నం 1:30 గంటలకు ఫేస్బుక్లో ఓ వీడియో స్టేటస్ పెట్టాడు. దీనిపై పోలీసులకు ఈ-మెయిల్ ద్వారా ఫేస్బుక్ సిబ్బంది సమాచారం అందజేశారు. ఫేస్బుక్ ప్రొఫైల్ ద్వారా లొకేషన్ను గుర్తించిన ఉన్నతాధికారులు పోలీసులను అప్రమత్తం చేశారు. ఇదే సమయంలో యువకుడి తండ్రి మొబైల్ నంబరును తెలుసుకుని, ఆయనకు సమాచారం చేరవేశారు. దీంతో, ఆయన వెంటనే తన ఇంటికి వెళ్లి గదిలో అపస్మారక స్థితిలో పడి ఉన్న కుమారుడిని ఆస్పత్రికి తరలించాడు. అక్కడ చికిత్స అనంతరం డిశ్చార్జి చేశారు. కోవిడ్-19 కారణంగా ఉద్యోగం కోల్పోవడంతోనే యువకుడు డిప్రెషన్లోకి వెళ్లి.. ఆత్మహత్యాయత్నం చేసినట్టు పోలీసులు తెలిపారు. చేతి మణికట్టుపై కత్తితో కోసుకుని ఆత్మహత్యకు ప్రయత్నించాడు. దీనినే వీడియో తీసి ఫేస్బుక్ స్టేటస్గా పెట్టడంతో సిబ్బంది అప్రమత్తమై పోలీసులకు సమాచారం ఇచ్చారు. ఫేస్బుక్ ప్రొఫైల్లో ఫోన్ నెంబర్ ఆధారంగా అది నాడియా ప్రాంతానికి చెందినదిగా గుర్తించారు.. తక్షణమే ఆ ఫోన్ను సంప్రదించగా అతడి కుమారుడే వీడియోను పోస్ట్ చేసినట్టు తెలుసుకున్నామని ఓ పోలీస్ అధికారి తెలిపారు. దేశంలో కరోనా వైరస్ వ్యాప్తి ప్రారంభం కావడానికి ముందు తన కుమారుడు వేరే రాష్ట్రంలో ఉద్యోగం చేసేవాడని, లాక్డౌన్ కారణంగా ఉపాధి పోవడంతో ఇంటికొచ్చేశాడన్నారు. అయితే, నాడియాలోని ఓ దుకాణంలో ఉద్యోగం దొరికినా జీతం తక్కువ కావడంతో మానసిక ఒత్తిడికి గురవుతున్నాడని అన్నారు.
By September 09, 2020 at 09:12AM
No comments