నేడు బీహార్ అసెంబ్లీ ఎన్నికల షెడ్యూల్ విడుదల
బిహర్ శాసనసభ ఎన్నికల షెడ్యూల్‌‌ను కేంద్ర ఎన్నికల కమిషన్ శుక్రవారం మధ్యాహ్నం వెల్లడించనుంది. ప్రపంచవ్యాప్తంగా కరోనా వైరస్ మహమ్మారి విజృంభణ కొనసాగుతున్న వేళ తొలిసారి ఓ పెద్ద రాష్ట్రంలో ఎన్నికలను నిర్వహించనున్నారు. నవంబరు 29తో బిహార్ శాసనసభ గడువు ముగియనుండటంతో ఎన్నికల నిర్వహణకు ఈసీ సమాయత్తమవుతోంది. అక్టోబరు మధ్యలో ఎన్నికలు నిర్వహించే అవకాశం ఉంది. మొత్తం 243 స్థానాలున్న బిహార్ అసెంబ్లీకి.. కరోనా వ్యాప్తి నేపథ్యంలో రెండు లేదా అంతకంటే ఎక్కువ దశల్లో పోలింగ్ జరపనున్నారు. ఇప్పటికే అన్ని రాజకీయ పార్టీలు ఎన్నికల కోసం అస్త్రశస్త్రాలను సిద్ధం చేసుకుంటున్నాయి. నితీష్ కుమార్ సారథ్యంలోని సంకీర్ణ ప్రభుత్వంతో కూటమి ఢీకొట్టబోతుంది. 2005 ఎన్నికల్లో విజయం తరువాత వరుసగా మూడుసార్లు ముఖ్యమంత్రి పదవి చేపట్టిన జేడీయూ నేత నితీష్ కుమార్ అభివృద్ధి మంత్రాన్ని జపిస్తున్నారు. గత ఎన్నికల్లో ఆర్జేడీతో పొత్తుపెట్టుకుని అధికారంలోకి వచ్చిన నితీశ్.. అనంతరం పరిణామాలతో బీజేపీతో తిరిగి జట్టుకట్టారు. లాలూ తనయుడు, ఆయన మంత్రివర్గంలో సభ్యుడు తేజస్వీ యాదవ్‌పై అవినీతి ఆరోపణలు రావడంతో క్యాబినెట్ నుంచి తొలిగించారు. ఆ తర్వాత ముఖ్యమంత్రి పదవికి రాజీనామా చేశారు. అనంతరం బీజేపీ సహకారంతో ప్రభుత్వం ఏర్పాటుచేశారు. ఈసారి మాత్రం నీతీశ్‌కు విజయం నల్లేరుమీద నడకేం కాదు. ఎన్డీయే కూటమిలోని లోక్‌జన శక్తి పార్టీ ఒంటిరిగా పోటీచేయాలని భావిస్తోంది. ఇది నితీశ్ కొంత ఇబ్బందికర అంశమే. నితీశ్ మాత్రం మహిళల ఓట్లమీదే భారీ ఆశలు పెట్టుకున్నారు. రాష్ట్ర ఖజానాకు నష్టం వాటిళ్లినా సంపూర్ణ మద్యపాన నిషేధం అమలు చేస్తున్నారు. ఇది తనకు కలిసి వస్తుందని ఆయన భావిస్తున్నారు. గత ఎన్నికలకు ముందు తొలిసారిగా పంచాయితీల్లో మహిళలకు 50 శాతం రిజర్వేషన్లు కల్పించి వారి ఆదరణ చూరగొన్నారు. ప్రస్తుతం కూడా మద్యపాన నిషేధం తనను గట్టెక్కిస్తోందని గంపెడాశలు పెట్టుకున్నారు.
By September 25, 2020 at 09:10AM
No comments