విషాదం: పాడుబడ్డ బావిలో పడిపోయిన లేగదూడ.. కాపాడబోయి ఐదుగురు మృతి

పురాతన బావిలో పడిపోయిన లేగదూడను కాపాడబోయి ఐదుగురు ప్రాణాలు కోల్పోయిన విషాదకర ఘటన ఉత్తర్‌ప్రదేశ్‌లో మంగళవారం సాయంత్రం చోటుచేసుకుంది. పాడుబడిన బావిలోని విషవాయువును పీల్చడం వల్లే ఆ ఐదుగురు మృతిచెందడం బాధాకరం. గోండా జిల్లాలోని రాజా మొహల్లాలో ఈ దుర్ఘటన సంభవించింది. పురాతన బావి పాడుబడటంతో స్థానికులు అందులో చెత్తాచెదారం వేసేవారు. మంగళవారం సాయంత్రంం ఓ లేగదూడ ప్రమాదవశాత్తు ఆ బావిలో పడిపోయింది. దీన్ని గమనించిన ఓ వ్యక్తి..దూడను రక్షించేందుకు నిచ్చెన సాయంతో బావిలోకి దిగాడు. అందులో ఉన్న విషవాయువును పీల్చి మూర్ఛపోయాడు. దీంతో ఆయనను బయటకు తీయడానికి మరో నలుగురు బావిలోకి దిగి స్మృహకోల్పోయారు. ఈ విషయం గురించి అధికారులకు సమాచారం ఇవ్వడంతో అగ్నిమాపక దళం, మునిసిపాలిటీ సిబ్బంది అక్కడకు చేరుకున్నారు. ఐదుగుర్ని బావి నుంచి బయటకు తీసి ఆస్పత్రికి తరలించారు. అయితే, అప్పటికే వారు మృతిచెందినట్టు వైద్యులు ధ్రువీకరించారు. మృతుల్లో నలుగురు ఒకే కుటుంబానికి చెందినవారు. లేగదూడ తమది కాకపోయినా దానిని కాపాడి ఈ ఐదుగురూ ప్రాణాలు కోల్పోయారు. మృతులు మహారాజాగంజ్‌కు చెందిన వైభవ్ (18), దినేశ్ అకా చోటు (30), రవిశంకర్ అకా రింకు (36), విష్ణు దయాల్ (35), భదౌ తరాహర్ ప్రాంతానికి చెందిన మనూ సైనీ (35)లు. వీరిలో దినేశ్, రవిశంకర్ సోదరులు కాగా.. విష్ణు వీరికి బాబాయి కుమారుడు. వైభవ్ ఈ ముగ్గురికీ దూరపు బంధువు. ఇక, మను సైనీ వేరే గ్రామానికి చెందిన వ్యక్తి కాగా.. దూడను రక్షించడానికి ప్రయత్నించి చనిపోయాడు. ఈ ఘటనపై ముఖ్యమంత్రి యోగి ఆదిత్యనాథ్‌ తీవ్ర దిగ్భ్రాంతి వ్యక్తం చేశారు. గోండా జిల్లా ఎస్పీ రాజ్ కరణ్ నయ్యర్ మాట్లాడుతూ.. మృతులు పండ్లు, కూరగాయలు దుకాణం నడుపుతున్నట్టు తెలిపారు. కలెక్టర్ నితిన్ బన్సాల్ మాట్లాడుతూ.. మంగళవారం మధ్యాహ్నం 3.00 గంటల ప్రాంతంలో ఆవుదూడ బావిలో పడిపోవడంతో దాని అరుపులు విని విష్ణు తొలుత కాపాడేందుకు ప్రయత్నించాడు. బావిలోకి దిగిన తర్వాత మీథేన్ గ్యాస్ వల్ల మూర్ఛపోయాడు. దీంతో అతడిని బయటకు తీయడానికి వైభవ్ వెళ్లగా తను కూడా స్మృహకోల్పోగా.. రవి, దినేశ్, మనూలు ఒకరి తర్వాత ఒకరు ప్రయత్నించి, మృత్యువాతపడ్డారు.

By September 09, 2020 at 06:50AM

Read More https://telugu.samayam.com/latest-news/india-news/five-die-while-rescuing-calf-from-well-in-gonda-in-uttar-pradesh/articleshow/78007875.cms