కమ్ముకుంటోన్న యుద్ధ మేఘాలు.. లడఖ్ నుంచి అరుణాచల్ వరకు సైన్యాన్ని పటిష్టం చేసిన భారత్
తూర్పు లడఖ్ సహా అరుణాచల్ ప్రదేశ్ వరకు ఇతర ప్రాంతాల్లోని స్థావరాలను సైన్యం మరింత బలోపేతం చేస్తోంది. గతవారం పాంగోంగ్ సరస్సు-చూషుల్ ప్రాంతంలోకి చొరబడ్డ చైనా సైన్యానికి భారత్ గట్టిగా సమాధానం ఇచ్చిన విషయం తెలిసిందే. దీంతో మరోసారి సరిహద్దుల్లో ఉద్రిక్తతలు తారాస్థాయికి చేరుకున్నాయి. చైనా ఎటువంటి దుస్సాహసానికి ఒడిగట్టినా తగిన గుణపాఠం చెప్పాలని కృతనిశ్చయంతో ఉన్న భారత్.. పాంగాంగ్ సరస్సు ఉత్తర తీరంలోని ఫింగర్-2, 3లో సైన్యాన్ని మోహరించింది. మే నెల ప్రారంభంలో ఫింగర్-4 నుంచి 8 వరకు తూర్పువైపున 8 కిలోమీటర్ల మేర చొచ్చుకొచ్చిన చైనా.. అక్కడ నుంచి వెనక్కు తగ్గడానికి నిరాకరిస్తోంది. ‘ ఉద్రిక్తతలు అధికంగా ఉన్నందున.. పీపుల్స్ లిబరేషన్ ఆర్మీ (పిఎల్ఎ) ఆక్రమించిన శిఖరానికి ఎదురుగా ఉన్న ఫింగర్-4 తూర్పున వైపున సైన్యాన్ని మోహరించామని’ ఓ సీనియర్ అధికారి వెల్లడించారు. ‘ముందస్తు జాగ్రత్తల్లో భాగంగా సరస్సు వద్ద సైన్యాన్ని వ్యూహాత్మకంగా మోహరించాల్సిన అవసరం ఉంది. ఈ ప్రాంతంలో 14,000 నుంచి 17,000 అడుగుల వరకు రిడ్జ్లైన్ ఉంటుంది. పర్వతాలపై యుద్ధం అనేది ఆధిపత్య నియంత్రించడమేనని’ ఆయన అన్నారు. ఉత్తరాన వ్యూహాత్మకంగా ఉన్న దెప్సాంగ్-దౌలత్ బేగ్ ఓల్డీ (డీబీఓ) వద్ద పీఎల్ఏ నిర్మాణాలను కూడా భారత్ నిశితంగా గమనిస్తోంది. క్లిష్టమైగన కరాకోరం కనుమ దగ్గరగా ఉన్న టేబుల్-టాప్ పీఠభూమి.. దెప్పాంగ్ వాస్తవానికి, పాంగాంగ్ సరస్సు కంటే సైనికపరంగా చాలా ముఖ్యమైంది. కానీ, ప్రస్తుతం చుషుల్ వద్ద పరిస్థితి ఉద్రిక్తంగా ఉంది. బ్రిగేడ్ కమాండర్-స్థాయి చర్చలు మూడు రోజుల నుంచి కొనసాగుతున్నాయి.. ఆగస్టు 29, 30 తేదీలలో పాంగాంగ్ సరస్సు దక్షిణ తీరం, రెజాంగ్ లా, రెకిన్ లా, స్పాంగ్గూర్ సమీపంలోని పలు ప్రాంతాలను స్వాధీనం చేసుకునేందుకు భారత్ ప్రయత్నించగా.. పీఎల్ఏ ఆగ్రహం వ్యక్తం చేసినట్లు అధికారులు పేర్కొన్నారు. పీఎల్ఏ సైన్యం ఆగ్రహానికి చాలా కారణాలు ఉన్నాయి. ఇంతకు ముందు పాంగాంగ్ సరస్సుకు దక్షిణ తీరంలో భారత సైనికులు స్వాధీనం చేసుకోవడం.. అదే సమయంలో భారత భూభాగంలోకి మరింతగా చొచ్చుకొచ్చేందుకు పీఎల్ఏ చేసిన ప్రయత్నాన్ని తిప్పికొట్టారు.
By September 03, 2020 at 11:32AM
No comments