కోవిడ్ మరణాల్లో బ్రిటన్ను దాటేసిన భారత్.. ప్రపంచంలో నాలుగో స్థానం!
దేశంలో మహమ్మారి తీవ్రత ఏమాత్రం తగ్గడంలేదు. గత వారం రోజుల నుంచి రోజుకు సగటున 60వేలకుపైగా పాజిటివ్ కేసులు నమోదవుతున్నాయి. ప్రస్తుతం దేశంలో కరోనా వైరస్ కేసుల సంఖ్య 24 లక్షలకు చేరవయ్యింది. మరణాలు సంఖ్య 47,149గా నమోదయ్యింది. ఇప్పటి వరకూ కరోనా నుంచి దాదాపు 17 లక్షల మంది కోలుకోగా.. మరో 6.52 లక్షల మంది ఆస్పత్రుల్లో చికిత్స పొందుతున్నారు. ఇక, ప్రపంచంలోనే అత్యధికంగా కోవిడ్ మరణాలు చోటుచేసుకున్న దేశాల జాబితాలో భారత్ నాలుగో స్థానానికి ఎగబాకింది. ఇప్పటి వరకూ 46,705 మరణాలతో నాలుగో స్థానంలో ఉన్న బ్రిటన్ను వెనక్కు నెట్టింది. కోవిడ్ మరణాల్లో ఐదో స్థానంలో ఉన్న ఇటలీని భారత్ 13 రోజుల కిందట అధిగమించింది. అత్యధికంగా కరోనా మరణాలు నమోదయిన దేశాల జాబితాలో అమెరికా, బ్రెజిల్, మెక్సికోల తర్వాతి భారత్ నిలిచింది. మరోవైపు, దేశంలో ఒక్క రోజులో కరోనా నుంచి 56,000 మంది కోలుకున్నారు. ఇంత పెద్ద సంఖ్యలో ఒక్క రోజు అత్యధికంగా బాధితులు కోలుకోవడం ఇదే తొలిసారి. వైద్యఆరోగ్యశాఖ వెల్లడించిన గణాంకాల ప్రకారం భారత్లో రికవరీ రేటు 70 శాతానికి చేరుకుంది. గడచిన 24 గంటల్లో నమోదైన అత్యధిక రికవరీ రేటు సమర్థవంతమైన వైద్య విధాన ఫలితమని వైద్య ఆరోగ్యశాఖ పేర్కొంది. దేశంలో కోలుకుంటున్న బాధితుల సంఖ్య క్రమంగా పెరుగుతోంది. జూలై మొదటి వారంలో రోజుకు సగటున 15 వేల మంది కోలుకోగా, ఆగస్టు మొదటి వారంలో ఈ సంఖ్య 50 వేలు దాటింది. దేశంలో యాక్టివ్ కేసుల సంఖ్య 6,52,948 కాగా.. మొత్తం కేసులలో 27 శాతం మాత్రమే. ఈ సందర్భంగా ఢిల్లీలోని మూల్చంద్ హాస్పిటల్ మెడిసిన్ విభాగం సీనియర్ కన్సల్టెంట్ డాక్టర్ శ్రీకాంత్ శర్మ మాట్లాడుతూ.. కరోనా నివారణకు ఇప్పుడు ఎక్కువ మందులు, సహాయక చికిత్సా విధానాలు అందుబాటులోకి వచ్చాయని తెలిపారు. క్లినికల్ నైపుణ్యాలను మెరుగుపరచడంతో పాటు, అంబులెన్స్ సేవలు సత్వరమే లభించడం వల్ల బాధితునికి తగిన చికిత్స అందజేస్తున్నారు. ఈ కారణంగానే కరోనా మరణాల రేటు తగ్గడంతోపాటు రికవరీ రేటు పెరిగిందని వివరించారు. మరణాల రేటు (సీఎఫ్ఆర్) ప్రపంచ సగటు కంటే తక్కువగా ఉంది. ఇది ప్రస్తుతం 1.98శాతంగా ఉంది. దేశంలో కరోనా టెస్టుల సంఖ్య కూడా పెరుగుతోంది.
By August 13, 2020 at 10:43AM
No comments