వ్యాక్సిన్పై విమర్శలొస్తున్నా వెనక్కు తగ్గని రష్యా.. తొలి బ్యాచ్ ఉత్పత్తి పూర్తి
వ్యాక్సిన్ విషయంలో విమర్శలు వెల్లువెత్తుతున్నా.. రష్యా మాత్రం వెనుకడుగు వేయడం లేదు. వ్యాక్సిన్ ఉత్పత్తి విషయంలో మరో ముందడుగు వేసిన రష్యా.. వ్యాక్సిన్ తొలి బ్యాచ్ని తయారు చేశామని ప్రకటించింది. రష్యా ఆరోగ్య మంత్రి మిఖాయిల్ మురాష్కో శనివారం ఈ మేరకు ఓ ప్రకటనలో తెలిపారు. ఈ నెలాఖరులోగా వ్యాక్సిన్ను వైద్యులు, ఆరోగ్య సిబ్బందికి అందజేస్తామని తెలిపినట్టు 'రాయిటర్స్' ప్రత్యేక కథనాన్ని ప్రచురించింది. ప్రపంచంలోనే కరోనాకు మొట్టమొదటి వ్యాక్సిన్ తామే తయారు చేశామని రష్యా అధ్యక్షుడు వ్లాదిమిర్ పుతిన్ ప్రకటించిన ఐదు రోజుల్లోనే తొలి బ్యాచ్ని తయారు చేసినట్టు ప్రకటించడం గమనార్హం. పూర్తిస్థాయిలో క్లినికల్ ట్రయల్స్, పరీక్షలు నిర్వహించకుండా వ్యాక్సిన్ విడుదల చేయడంపై పలు దేశాలు విమర్శిస్తుంటే, మరికొన్ని దేశాలు మాత్రం తమకు వ్యాక్సిన్ పంపాలని రష్యాను అడుగుతున్నాయి. వ్యాక్సిన్ కోసం రష్యాను సంప్రదిస్తున్న దేశాల్లో వియత్నాం, ఇజ్రాయిల్, సెర్బియా వంటి దేశాలున్నాయి. తొలి దశలో భాగంగా వచ్చే రెండు వారాల్లో ఉత్పత్తిచేసిన వ్యాక్సిన్ను ప్రాధాన్యతా క్రమంలో ఇస్తామని రష్యా ఆరోగ్య శాఖ వెల్లడించింది. కొన్ని విదేశీ సంస్థలు తమ టీకాపై అనుమానాలు వ్యక్తం చేయడం అర్థరహితమని మంత్రి మిఖాయిల్ వ్యాఖ్యానించారు. సమీప భవిష్యత్తులో వ్యాక్సిన్ను పెద్దఎత్తున ఉత్పత్తి చేయనున్నామని ప్రకటించారు. డిసెంబర్ లేదా జనవరి నాటికి నెలకు 50 లక్షల డోస్లను తయారు చేసి, ప్రజలకు అందజేయాలన్న లక్ష్యంతో ఉన్నామని తెలిపారు. వీలైనన్ని పరీక్షలు నిర్వహించకుండా వ్యాక్సిన్ను అందుబాటులోకి తేవడం ప్రమాదకరమని పశ్చిమ దేశాల శాస్త్రవేత్తలు హెచ్చరిస్తున్నారు. వీటిని మాత్రం రష్యా పట్టించుకోవడంలేదు. గమలేయా ఇన్స్టిట్యూట్ చీఫ్ అలెగ్జాండర్ గిండ్స్బర్గ్ మాట్లాడుతూ.. టీకా భద్రత, సమర్థతపై చివరి దశ పరీక్షలో పాల్గొనే వాలంటీర్లకు రెండు డోస్లు వేస్తారని తెలిపారు. సెప్టెంబరు నుంచి వ్యాక్సిన్ ఉత్పత్తి ప్రారంభిస్తామని అన్నారు.
By August 16, 2020 at 01:00PM
No comments