డొనాల్డ్ ట్రంప్ కుటుంబంలో విషాదం.. అనారోగ్యంతో సోదరుడు మృతి

అమెరికా అధ్యక్షుడు సోదరుడు హాస్పిటల్‌లో చికిత్స పొందుతూ శనివారం రాత్రి కన్నుమూశారు. ట్రంప్ చిన్న తమ్ముడు రాబర్ట్ ఎస్. ట్రంప్ (71) మన్‌హట్టన్‌లోని న్యూయార్క్-ప్రెస్‌బైటేరియన్ ఆస్పత్రిలో తుదిశ్వాస విడిచారు. అయితే, ఆయన మరణానికి గల కారణాలను అమెరికా అధ్యక్ష భవనం వెల్లడించలేదు. సోదరుడి మరణంపై డొనాల్డ్ ట్రంప్ స్పందిస్తూ.. తను నాకు కేవలం తమ్ముడు మాత్రమే కాదు, మంచి స్నేహితుడు అని ఆవేదన వ్యక్తం చేశారు. ఈ మేరకు ఓ ప్రకటన విడుదల చేసిన ట్రంప్.. రాబర్ట్ మమ్మల్ని విడిచివెళ్లిపోతున్నాడు.. కానీ, మళ్లీ తనను మేము కలుసుకుంటామని ఉద్వేగానికి గురయ్యారు. రాబర్ట్ ట్రంప్‌ మెదడులో రక్తం గడ్డుకట్టుకుపోవడంతో అనారోగ్యానికి గురయ్యాడని కుటుంబానికి సన్నిహితుడు వెల్లడించారు. ఇటీవల పడిపోవడంతో రక్తస్రావం అయ్యిందని, దీంతో చికిత్స కోసం హాస్పిటల్‌కు తరలించారన్నారు. గత కొన్ని వారాలుగా ఫోన్‌లో మాట్లాడే పరిస్థితిలేదని పేర్కొన్నారు. ఇక, 2016 అధ్యక్ష న్నికల్లో డొనాల్డ్ ట్రంప్‌తో కలిసి రాబర్ట్ ప్రచారంలో పాల్గొన్నారు. అప్పటి నుంచి ఆయన అంతగా మీడియాలో కనిపించలేదు. కానీ, ఈ ఏడాది డొనాల్డ్ ట్రంప్‌పై ఆయన మేనకోడలు మ్యారీ ట్రంప్.. ‘ప్రపంచంలో అత్యంత ప్రమాదకరమైన వ్యక్తి’ పేరుతో పుస్తకం రాయగా.. దానిని ప్రచురించుకుండా ఆపాలని న్యాయస్థానంలో రాబర్ట్ పిటిషన్ వేశారు. దీంతో రాబర్ట్ మరోసారి వార్తల్లో నిలిచారు. రాబర్ట్ స్టీవర్ట్ ట్రంప్ 1948 ఆగస్టు 26న న్యూయార్క్‌లో జన్మించారు. తల్లిదండ్రులు ఫ్రెడ్ ట్రంప్, మేరీ అన్నే మాక్లియోడ్. వీరి ఐదుగురి సంతానంలో రాబర్ట్ చిన్నవాడు. డొనాల్డ్ ట్రంప్ అన్నయ్య ఫ్రెడ్ జూనియర్ తీవ్ర అనారోగ్యంతో 1981 లో మరణించాడు.

By August 16, 2020 at 10:52AM

Read More https://telugu.samayam.com/latest-news/international-news/us-president-donald-trumps-younger-brother-robert-s-trump-dies-at-71/articleshow/77570471.cms