అక్కలను హతమార్చిన కేసులో మరో ట్విస్ట్.. ఆ ఉన్మాది ఇకలేడు..
హైదరాబాద్‌: కుటుంబ కలహాలతో ఇద్దరు అక్కలను కిరాతకంగా హతమార్చిన వ్యక్తి ఆత్మహత్యకు పాల్పడ్డాడు. బార్కస్ సలాలా ఏరియాకు చెందిన అహ్మద్‌ బా ఇస్మాయిల్ (31) సోమవారం సాయంత్రం సొంత అక్కచెల్లెళ్లనే దారుణంగా నరికి చంపాడు. అతడి కోసం పోలీసులు గాలింపు చేపట్టగా.. ఇంట్లోనే ఉరి వేసుకొని ఆత్మహత్య చేసుకున్నట్లు గుర్తించారు. ఈ ఘటన వివరాల్లోకి వెళ్తే.. గతంలో బౌన్సర్‌గా పని చేసిన ఇస్మాయిల్ బార్కస్ సలాలా ప్రాంతంలో నివాసం ఉంటున్నాడు. అతడికి ఐదుగురు అక్కాచెల్లెళ్లు ఉన్నారు. గత ఏడాది మార్చిలో భార్యను హత్య చేసిన ఇస్మాయిల్.. ఇటీవలే బెయిల్ మీద బయటకు వచ్చాడు. చాలా కాలం నుంచి కుటుంబ తగాదాలు ఉండగా... సోమవారం సాయంత్రం ఇస్మాయిల్ అక్కాచెల్లెళ్లను విందుకు ఆహ్వానించాడు. రజియా బేగం, జకీరా బేగం మాత్రమే రాగా.. వారిద్దరూ మాట్లాడుతుండగానే ఇస్మాయిల్ దాడి చేసి హతమార్చాడు. అక్కడి నుంచి అర కిలోమీటర్ దూరంలో నివాసం ఉంటున్న మూడో అక్క నూరా బేగం ఇంటికి వెళ్లిన ఇస్మాయిల్ ఆమెపై దాడి చేశాడు. అడ్డొచ్చిన బావను కూడా కత్తితో పొడిచాడు. అనంతరం స్కూటీ మీద నాలుగో సోదరి ఇంటికి వెళ్లిన ఇస్మాయిల్.. ఆమెను హాస్పిటల్‌లో చేర్పించారని తెలుసుకొని అక్కడికి కూడా వెళ్లాడు. కానీ పోలీసులను చూసి వెనుదిరిగాడు. హాస్పిటల్ నుంచి వెనక్కి తిరిగొచ్చిన నిందితుడి ఆచూకీ కోసం పోలీసులు గాలిస్తున్నారు. ఈ క్రమంలోనే ఇస్మాయిల్ ఇంట్లో నుంచి దుర్వాసన వస్తున్న విషయాన్ని స్థానికులు పోలీసుల దృష్టికి తీసుకొచ్చారు. ఇంటికి బయటి నుంచే తాళం వేసి ఉండటంతో.. కిటికీ తెరచి చూడగా.. ఇస్మాయిల్ ఫ్యాన్‌కు ఉరి వేసుకొని కనిపించాడు. అతడు ఇంటి వెనుక ఉన్న మరో డోర్ నుంచి ఇంట్లోకి వెళ్లి ఉరేసుకొని ఉంటాడని భావిస్తున్నారు. డెడ్ బాడీ కుళ్లిపోయిన స్థితిలో ఉండటంతో... హత్య చేసిన రాత్రే అతడు ఆత్మహత్య చేసుకొని ఉంటాడని పోలీసులు భావిస్తున్నారు. మృతదేహాన్ని ఉస్మానియా మార్చురీకి తరలించారు.
By July 02, 2020 at 09:01AM
No comments