సరిహద్దుల్లో ఉద్రిక్తత.. చైనాకు చెక్ పెట్టడానికి ఆ నౌకా స్థావరంపై దృష్టిసారించిన భారత్

హిందూ మహాసముద్ర ప్రాంతం (ఐఓఆర్)లో విస్తరిస్తున్న చైనాను సమర్ధంగా అడ్డుకునేందుకు అండమాన్ నికోబార్ దీవుల్లోని వ్యూహాత్మక స్థావరంలో మరిన్ని మౌలిక సదుపాయాలు అభివృద్ధితో పాటు అదనపు సైనిక దళాలను ఏర్పాటుచేయడానికి భారత్ వేగంగా ప్రణాళికలు రూపొందిస్తోంది. సరిహద్దుల్లో వాస్తవాధీన రేఖ వెంబడి 3,488 కిలోమీటర్ల మేర భారత భూభాగం, హిందూ మహాసముద్ర ప్రాంతంలోని ప్రాదేశిక జలాల్లోకి చొచ్చుకొచేందుకు చైనా ప్రయత్నిస్తోందని, ఈ నేపథ్యంలో దీర్ఘకాలంగా పెండింగ్‌లో ఉన్న అండమాన్ నికోబార్ కమాండ్‌లో మౌలిక సదుపాయాలు అభివృద్ధితో పాటు అదనపు దళాల మోహరింపు ప్రక్రియను ప్రారంభిస్తామని రక్షణ శాఖ వర్గాలు వెల్లడించాయి. ఇక, అండమాన్ నికోబార్ కమాండ్‌ను 2001లో ఏర్పాటుచేశారు. దేశంలోనే భూ, జల, వాయు తొలి థియేటర్ కమాండ్ ఇదే కావడం విశేషం. అంతేకాదు, భూ, సముద్ర, వైమానిక దళాల కలిగిన ఒకే ఒక కార్యాచరణ కమాండర్ ఇది. అయితే, ఈ కమాండ్ దీర్ఘకాలంగా నిధుల లేమి, సాధారణ ఉదాసీనత, మౌలిక సదుపాయాలను నిర్మాణానికి పర్యావరణ అనుమతుల్లో ఆటంకాలు తదితర సమస్యలను ఎదుర్కొంటోంది. అయితే, ఇవన్నీ గతం.. ప్రస్తుతం తూర్పు లడఖ్‌లో చైనాతో ఉద్రిక్తత నెలకున్న వేళ ఏఎన్సీ పాత్ర కీలకం కాబోతుంది. ఈ నేపథ్యంలో అండమాన్ నికోబార్ కమాండ్‌ను తక్షణమే అభివృద్ధిచేసి, పెద్ద సంఖ్యలో సైనికులను తరలించాలని రక్షణ శాఖ నిర్ణయానికి వచ్చినట్టు తెలుస్తోంది. మలాకా జలసంధి ద్వారా ముడి చమురు దిగుమతులు, ఇతర వాణిజ్య కాలాపాలను చైనా సాగిస్తోంది. అవసరమైతే ఈ చోక్ పాయింట్ ఏఎన్సీ నుంచి భారత యుద్ధనౌకలు, విమానాలను మోహరించి చైనాకు అడ్డుకట్టవేయవచ్చు. ఇప్పటికే దీనికి సంబంధించిన కీలక అంశాలు ఖరాయ్యాయని, మరికొన్ని తుది దశలో ఉన్నాయని రక్షణ శాఖ వర్గాలు పేర్కొన్నాయి. ఉత్తర అండమాన్‌లోని షిబిపూర్ వద్ద ఐఎన్ఎస్ కోహసా ఎయిర్ స్టేషన్ రన్‌వే విస్తరణకు భూ కేటాయింపులు, అనుమతులు ఇటీవలే పూర్తయినట్టు తెలిపాయి. ఐఎన్ఎస్ కోహసాతోపాటు దక్షిణ అండమాన్ క్యాంప్‌బెల్ తీరం వద్ద ఐఎన్ఎస్ బాజ్‌ను భారీ యుద్ధ విమానాల నిర్వహణకు అనుగుణంగా 10,000 అడుగుల మేర విస్తరించనున్నారు. (ఏఎన్సీ)లో మౌలిక సదుపాయాల అభివృద్ధికి పదేళ్ల ప్రణాళికను భారత్ రూపొందించింది. దీని ప్రకారం అదనపు యుద్ధ నౌకలు, విమానాలు, క్షిపణి వ్యవస్థుల, పదాతిదళం కోసం రూ. 5,650 కోట్ల ఖర్చుచేయనుంది. కమోర్టా ద్వీపంలో 10,000 అడుగుల రన్‌వేతో కూడిన ఎయిర్ ఎన్‌క్లేవ్ కూడా ఇందులో ఉంది. ఇక, 2027 నాటికి ఏఎన్సీ వద్ద దశలవారీగా సైనిక శక్తి సామర్థ్యం పెంపు కోసం ఓ ప్రణాళికను ఖరారు చేయనుంది.

By July 04, 2020 at 08:06AM

Read More https://telugu.samayam.com/latest-news/india-news/india-china-border-row-ladakh-triggers-andamans-build-up/articleshow/76779735.cms