‘కరోనా నుంచి ఆ దేవుడే కాపాడాలి’ ఆరోగ్య మంత్రి వ్యాఖ్యలపై దుమారం
కర్ణాటకలో గత రెండు వారాలుగా పాజిటివ్ కేసులు భారీగా నమోదవుతున్నాయి. ఈ నేపథ్యంలో కర్ణాటక ఆరోగ్య శాఖ మంత్రి శ్రీరాములు చేసిన వ్యాఖ్యలపై దుమారం రేగుతోంది. ఇప్పటికే కరోనా వైరస్ నియంత్రణలో రాష్ట్ర ప్రభుత్వం పూర్తిగా విఫలమైందని విమర్శలు వెల్లువెత్తుతున్న వేళ.. కోవిడ్ టాస్క్‌ఫోర్స్‌ హెడ్‌గా ఉన్న మంత్రి చేసిన వ్యాఖ్యలు బాధ్యతారహిత్యంగా ఉన్నాయని మండిపడుతున్నారు. ‘వైరస్ వ్యాప్తిని అడ్డుకోవడం ఎవరు చేతుల్లోనూ లేదు..దేవుడే కాపాడాలి’ అంటూ ఆయన వ్యాఖ్యానించారు. ప్రస్తుతం కర్ణాటకలో పాజిటివ్ కేసుల సంఖ్య 50వేల మార్క్‌కు చేరుకోగా.. 900 మంది ప్రాణాలు కోల్పోయారు. గత కొద్ది రోజులుగా దేశంలో అత్యధికంగా కరోనా వైరస్ కేసులు నమోదవుతున్న రాష్ట్రాల్లో కర్ణాటక మూడో స్థానంలో ఉంది. రాష్ట్రంలో వైరస్ వ్యాప్తి గురించి మీడియా అడిగిన ప్రశ్నకు సమాధానం ఇస్తూ.. ‘భగవంతుడు మాత్రమే మనల్ని రక్షించగలడు.. అయితే, మనం తప్పనిసరిగా జాగ్రత్తలు తీసుకోవాలి’అని మంత్రి వ్యాఖ్యానించారు. ప్రపంచం మొత్తాన్ని మహమ్మారి కమ్మేసింది.. కేసుల రెట్టింపు ఇబ్బడిముబ్బడిగా పెరుగుతోంది.. దీనికి పేద, గొప్ప, కులం, మతం భేదం లేదు.. ప్రస్తుతం కేసుల పెరుగుదల 100 శాతంగా ఉంది’ అని వ్యాఖ్యానించారు. అంతేకాదు, కేసుల పెరుగుదలతో ప్రభుత్వం, మంత్రుల బాధ్యాతారాహిత్యమా లేదా సమన్వయంలోపమా కాదని.. ఇది ఎవరి చేతుల్లోనే లేదన్నారు. నిర్వహణలో మంత్రుల మధ్య సమన్వయంలోపం, ముఖ్యమంత్రి తన బాధ్యతలను సక్రమంగా నిర్వర్తించకపోవడం వల్లే పాజిటివ్ కేసులు పెరుగుతున్నట్టు ప్రతిపక్షాలు విమర్శిస్తున్నాయి. కర్ణాటక ఆరోగ్య మంత్రి రెండు రోజుల కిందట చేసిన ట్వీట్‌పై కూడా సోషల్ మీడియాలో చర్చ జరిగింది. ‘ప్రతిరోజూ 2 వేలకుపైగా కరోనావైరస్ కేసులు వస్తున్నాయి. కర్ణాటకలో వచ్చే 15 నుంచి 30 రోజుల్లో కేసుల సంఖ్య రెట్టింపు అవుతుంది. రాబోయే రెండు నెలలు మాకు పెద్ద సవాలుగా మారబోతుంది’ అని ట్విట్టర్‌లో పేర్కొన్నారు. కరోనా వైరస్ కట్టడికి ప్రభుత్వం పటిష్టమైన చర్యలు తీసుకుంటుందని మంత్రి శ్రీరాములు అన్నారు. అయితే, బయటకు వచ్చేటప్పుడు జనం మాస్క్‌లు ధరించి, భౌతికదూరం నిబంధనలు పాటించాలని సూచించారు.
By July 16, 2020 at 10:51AM
No comments