Breaking News

చైనాపై వీసా ఆంక్షలు.. అమెరికా సంచలన నిర్ణయం


అమెరికా, చైనాల మధ్య సంబంధాలు రోజు రోజుకూ క్షీణిస్తున్నాయి. ఇరు దేశాల మధ్య ఏడాదిన్నర పాటు సాగిన వాణిజ్య యుద్ధానికి ఈ ఏడాది జనవరిలో జరిగిన ఒప్పందంతో ముగింపు పలికినా.. అది మూన్నాళ్ల ముచ్చటగా మిగిలిపోయింది. ఒప్పందం జరిగిన కేవలం రెండు నెలల్లోనే కరోనా మహమ్మారి కారణంగా అమెరికా, చైనాల మధ్య వ్యవహారం బెడిసికొట్టింది. అప్పటి నుంచి ఇరు దేశాలూ ఒకరిపై ఒకరు కారాలు మిరియాలు నూరుకుంటున్నాయి. తాజాగా, టిబెట్‌లో మానవహక్కుల ఉల్లంఘనలకు చైనా పాల్పడుతుందని ఆరోపిస్తూ ఆ దేశానికి చెందిన అధికారులపై విధించింది. దీంతో, మాటల యుద్ధం తారాస్థాయికి చేరింది. టిబెట్ ప్రాంతంలో చైనా మానవహక్కుల ఉల్లంఘనలకు పాల్పడుతోందని అమెరికా విదేశాంగ మంత్రి మైక్‌ పాంపియో మంగళవారం ఆరోపించారు. ఈ సందర్భంగా చైనా అధికారులపై వీసా ఆంక్షలు విధిస్తున్నట్లు ఆయన ప్రకటించారు. టిబెట్ సందర్శనకు అనుమతించాలని చైనాకు స్పష్టం చేసిన ఆయన.. అమెరికా చట్టం ప్రకారం, అధికార కమ్యూనిస్ట్ పార్టీతో సహా పలువురు అధికారులపై చర్యలు తీసుకుంటున్నట్లు చెప్పారు.‘టిబెట్‌లో విదేశీయులు పర్యటించకుండా అడ్డుకుంటున్న చైనా అధికారులపై వీసా ఆంక్షలు విధిస్తున్నాం.. ఆ దేశంలో మేము సంబంధాలను కొనసాగించాలని కోరుకుంటున్నాం’ అని పాంపియో అన్నారు. అమెరికా దౌత్యవేత్తలు, ఇతర అధికారులు, జర్నలిస్టులు, పర్యాటకులను టిబెట్‌ అటానమస్ రీజియన్ (టీఏఆర్), ఇతర ప్రాంతాలకు వెళ్లకుండా అడ్డుకోవడానికి బీజింగ్ వ్యూహాత్మకంగా ముందుకెళుతోంది.. అయితే చైనా అధికారులు, పౌరులు అమెరికాలో ఎక్కువ ప్రాధాన్యత పొందుతున్నారని ఆయన అన్నారు. అమెరికాతో పాటు ఇతర దేశాలకు చెందిన దౌత్యవేత్తలు, జర్నలిస్టులపై చైనా ఆంక్షలకు ప్రతిచర్యగా చైనా అధికారులను అమెరికా లక్ష్యంగా చేసుకొన్నట్లు అంతర్జాతీయ నిపుణులు అభిప్రాయపడుతున్నారు. అయితే చైనా మాత్రం ఎప్పటిలానే తన వాదనను సమర్థించుకుంది. టిబెట్‌ ఎల్లప్పుడూ తెరిచే ఉంటుందని, విదేశీయులు ఆ ప్రాంతంలో పర్యటించడంపై ఎలాంటి ఆంక్షలు లేవని తెలిపింది. టిబెట్ భౌగోళికంగా ప్రత్యేకమైనదని, అక్కడి వాతావరణ పరిస్థితుల దృష్ట్యా చైనా ప్రభుత్వం విదేశీయులు పర్యటించడంపై కొన్ని నిబంధనలు పాటిస్తుందని వెల్లడించారు.


By July 09, 2020 at 09:04AM


Read More https://telugu.samayam.com/latest-news/international-news/us-announces-new-visa-restrictions-on-china-over-access-to-tibet/articleshow/76866245.cms

No comments