కరోనాపై పోరులో భారత్ మరో ముందడుగు.. రెండో దేశీయ వ్యాక్సిన్కు డీసీజీఐ అనుమతి
ప్రపంచానికి కంటిమీద కునుకులేకుండా చేస్తోన్న మహమ్మారికి వ్యాక్సిన్ కోసం ముమ్మరంగా పరిశోధనలు కొనసాగుతున్నాయి. ఇప్పటికే కొన్ని వ్యాక్సిన్లు క్లినికల్ ట్రయల్స్ ప్రారంభించాయి. అటు, భారత్‌లోనూ హైద‌రాబాద్ కేంద్రంగా ఉన్న భారత్ బ‌యోటెక్ రూపొందించిన 'కొవాగ్జిన్' వ్యాక్సిన్ క్లినికల్ ట్రయల్స్‌కు డ్ర‌గ్ కంట్రోల‌ర్‌ జ‌న‌ర‌ల్ ఆఫ్ ఇండియా(డీసీజీఐ) గ్రీన్ సిగ్న‌ల్ ఇచ్చిన విష‌యం తెలిసిందే. తాజాగా భార‌త్‌కు చెందిన మరో కంపెనీకి డీసీజీఐ అనుమ‌తినిచ్చింది. వ్యాక్సిన్లు, ఔష‌ధాల త‌యారీకి కేంద్ర‌మైన భారత్ కూడా కోవిడ్-19పై పోరులో ముందుంది. గుజ‌రాత్‌లోని అహ్మ‌దాబాద్‌కు చెందిన జైడస్ కాడిలా హెల్త్‌కేర్ రూపొందించిన వ్యాక్సిన్కు డీసీజీఐ అనుమతి లభించింది. దేశంలో డీసీజీఐ అనుమతి పొందిన రెండో ఇదే కావడం విశేషం. తాజా అనుమతులతో జైడస్ కాడిలా రెండు దశల్లో క్లినికల్ ట్రయల్స్ ప్రారంభించనుంది. మ‌హ‌మ్మారి విజృంభ‌ణ నేపథ్యంలో అత్య‌యిక స్థితిని ప‌రిగ‌ణ‌లోకి తీసుకొని కొవిడ్-19పై వేసిన నిపుణుల కమిటీ ఇచ్చిన సిఫార్సుల మేర‌కు ప్ర‌భుత్వం వేగంగా అనుమ‌తులిస్తోంది. ఈ నేపథ్యంలో జైడస్ కాడిలాకు కమిటీ సిఫార్సులతో డీసీజీఐ అనుమతించింది. జంతువులపై ప్రయోగాలు విజయవంతం కావడంతో మానవులపై మొదటి, రెండు దశలకు అనుమతిస్తూ డీసీజీఐ చీఫ్ డాక్టర్ వీజీ సోమణి గురువారం ఉత్తర్వులు జారీచేసినట్టు అధికార వర్గాలు తెలిపాయి. జంతువులపై ప్రయోగాలకు సంబంధించిన ఫలితాలు, నివేదికను డీసీజీఐకి సమర్పించింది. జంతువులపై ప్రయోగాల్లో వ్యాక్సిన్ విజయవంతమైందని, ఎలాంటి దుష్ప్రభావాలు తలెత్తలేదని తేలింది. భద్రత, రోగనిరోధక శక్తి అంశంలో విజయవంతమైనట్టు తేలింది. తాజాగా, అనుమతులతో త్వరలోనే జైడిస్ కాడిల్లా మనుషులపై ప్రయోగాలు ప్రారంభించనుంది. మొదటి, రెండు దశలు పూర్తికావడానికి మూడు నెలల సమయం పడుతుందని విశ్వసనీయ వర్గాలు పేర్కొన్నాయి. ఇదిలా ఉంటే, ప్ర‌పంచ‌వ్యాప్తంగా కొవిడ్-19 వ్యాక్సిన్ ప‌రిశోధ‌న‌లో ఆస్ట్రాజెనికా, మోడెర్నా కంపెనీలు వ్యాక్సిన్ రూపొందించ‌డం‌లో ముందున్నాయ‌ని ప్ర‌పంచ ఆరోగ్య‌సంస్థ ఈమ‌‌ధ్యే ప్ర‌క‌టించింది. మోడెర్నా రూపొందించిన వ్యాక్సిన్ ఈ నెలలో మూడోద‌శ ప్రయోగాలు ప్రారంభించేందుకు సిద్ధ‌మైన‌ట్లు తెలుస్తోంది. ఆక్స్‌ఫ‌ర్డ్ వ్యాక్సిన్ కూడా ప్ర‌యోగ దశల్లో ముందుంది. ఇక జ‌ర్మనీకి చెందిన బ‌యోఎన్‌టెక్‌, ఫైజ‌ర్ క‌లిసి రూపొందించిన వ్యాక్సిన్ స‌త్ఫ‌లితాలు ఇస్తున్న‌ట్లు ప్ర‌క‌టించిన విష‌యం తెలిసిందే. కొవిడ్ వ్యాక్సిన్ త‌యారీలో చైనా కంపెనీలు కూడా ముందున్నాయి.
By July 03, 2020 at 12:24PM
No comments