కరోనా వైరస్: అమెరికా మరో ప్రపంచ రికార్డు.. గత 24 గంటల్లో 55వేల కేసులు

అమెరికాలో రెండోసారి విజృంభిస్తోంది. గడచిన 24 గంటల్లో రికార్డుస్థాయిలో ఏకంగా 55వేల మందికి వైరస్ పాజిటివ్‌గా తేలింది. గురువారం ఫ్లోరిడాలో అత్యధికంగా 10వేల మందికి వైరస్ నిర్ధారణ అయ్యింది. మొత్తం 2.10 కోట్ల మంది ఉన్న ఈ రాష్ట్రంలో రోజూ కొత్త కేసులు బయటపడుతున్నాయి. గతంలో ఐరోపా దేశాల్లోనే ఈ మేరకు కేసులు బయటపడేవి. ఓ రాష్ట్రంలో ఏకంగా 10వేల కేసులు బయటపడటం ఇదే తొలిసారి. ప్రస్తుతం అమెరికాలో మొత్తం కరోనా వైరస్ బాధితుల సంఖ్య 28,37,189గా నమోదయితే, ఇప్పటి వరకూ 131,485 మంది ప్రాణాలు కోల్పోయారు. మహమ్మారి నుంచి 12 లక్షల మంది కోలుకున్నారు. అత్యధికంగా న్యూయార్‌లో 4.6 లక్షల మందికి వైరస్ సోకగా.. 32వేల మందికిపైగా ప్రాణాలు కోల్పోయారు. ఆ తర్వాత న్యూజెర్సీలో 15వేల మందికిపైగా చనిపోయారు. దేశంలో కరోనా వైరస్ రెండోసారి విజృంభిస్తోందని అమెరికా వైద్య నిపుణుడు ఆంటోనీ ఫౌచీ కీలక వ్యాఖ్యలు చేశారు. పరిస్థితులు ఇలాగే కొనసాగితే త్వరలో రోజుకి లక్ష కేసులు నమోదయ్యే అవకాశం ఉందని ఆయన హెచ్చరించారు. దేశంలో ప్రస్తుతం నెలకొన్న పరిస్థితులపై ఆయన తీవ్ర ఆందోళన వ్యక్తం చేశారు. ప్రస్తుతం రోజుకి 40వేల కేసులు నమోదవుతున్నాయని, పరిస్థితులు మారకపోతే రోజుకి లక్ష కేసులు నమోదైనా ఆశ్చర్యపోవాల్సిన అవసరం లేదన్నారు. ఇది తనను తీవ్రంగా ఆందోళనకు గురి చేస్తోందని, ఎంత చెప్పినా ప్రజలు గుంపులుగా సమావేశమవుతూనే ఉన్నారని వ్యాఖ్యానించారు. ప్రభుత్వ మార్గదర్శకాలను ఏమాత్రం పట్టించుకోవడం లేదని, పరిస్థితులు ఇలాగే కొనసాగితే తీవ్ర ఇబ్బందులు ఎదుర్కోవాల్సి ఉంటుందన్నారు. ఈ మహమ్మారి ఆగిపోయేలోపు ఎన్ని మరణాలు సంభవిస్తాయో చెప్పలేను. కానీ, ఆ సంఖ్య మాత్రం మనకు తీవ్ర ఆవేదనను మిగులుస్తుందని కచ్చితంగా చెప్పగలనని అన్నారు. మహమ్మారిని కట్టడి చేయాలంటే మాస్క్‌లు తప్పనిసరని ఫౌచీతో పాటు అమెరికా సీడీసీ డైరెక్టర్ డా.రాబర్ట్‌ రెడ్‌ఫీల్డ్‌ సూచించారు. ప్రతిఒక్కరూ వైరస్‌ వ్యాప్తిని నిరోధించడాన్ని వ్యక్తిగత బాధ్యతగా స్వీకరించాలని కోరిన ఆయన.. నాణ్యమైన మాస్కులు తయారు చేసి వాటిని ఉచితంగా పంపిణీ చేసే దిశగా తీసుకునే చర్యలకు తన మద్దతు ఉంటుందని ఫౌచీ హామీ ఇచ్చారు.

By July 03, 2020 at 01:21PM

Read More https://telugu.samayam.com/latest-news/international-news/us-covid-cases-hit-new-global-record-rising-over-55000-in-single-day/articleshow/76766645.cms