కొనసాగుతోన్న వైరస్ విజృంభణ: నిన్న ఒక్కరోజు 46వేల కేసులు.. 1,131 మరణాలు
దేశంలో విజృంభణ కొనసాగుతోంది. బుధవారం దేశవ్యాప్తంగా 46వేలకుపైగా పాజిటివ్ కేసులు నమోదు కాగా.. మరో 687 మంది ప్రాణాలు కోల్పోయారు. దేశంలో కరోనా వైరస్ మొదలైన తర్వాత ఇంత పెద్ద సంఖ్యలో కేసులు, మరణాలు నమోదుకావడం ఇదే తొలిసారి. దీంతో దేశంలో మొత్తం కరోనా కేసుల సంఖ్య 12.40 లక్షలకు చేరుకోగా.. మృతుల సంఖ్య 29,890కి చేరింది. దేశవ్యాప్తంగా 7.84 లక్షల మంది కోలుకోగా.. 4.25 లక్షల మంది వివిధ ఆస్పత్రుల్లో చికిత్స పొందుతున్నారు. బుధవారం అత్యధికంగా 29,854 మంది కోలుకోవడం విశేషం. అయితే, మరణాలను తమిళనాడు బుధవారం సవరించడంతో మొత్తం 1,131 మంది ప్రాణాలు కోల్పోయినట్టు గణాంకాలు వెల్లడిస్తున్నాయి. దేశంలో బుధవారం నమోదయిన కేసుల్లో మహారాష్ట్రతోపాటు దక్షిణాది రాష్ట్రాల వాటా 42 శాతంగా ఉంది. మహారాష్ట్రలో అత్యధికంగా 10,500 మందికి వైరస్ నిర్ధారణ కాగా.. ఆ తర్వాత ఆంధ్రప్రదేశ్‌లో 6,045 కేసులు నిర్ధారణ అయ్యాయి. తమిళనాడులో అత్యధికంగా 518 మంది ప్రాణాలు కోల్పోగా.. ఆ తర్వాత మహారాష్ట్రలో 280 మంది చనిపోయారు. తర్వాత ఆంధ్రప్రదేశ్ 65, కర్ణాటక 55, పశ్చిమ్ బెంగాల్ 39, ఉత్తరప్రదేశ్ 34, ఢిల్లీ 29, గుజరాత్ 28 మంది ప్రాణాలు కోల్పోయారు. మహారాష్ట్ర 10,576, ఆంధ్రప్రదేశ్ 6,045, తమిళనాడు 5,849, కర్ణాటక 4,764, ఉత్తరప్రదేశ్ 2,300, బెంగాల్ 2,291, తెలంగాణ 1,556, బీహార్ 1,502, ఢిల్లీ 1,200, ఒడిశా 1,078, కేరళ 1,037, గుజరాత్ 1,000 మందికి కొత్తగా వైరస్ నిర్ధారణ అయ్యింది. మహారాష్ట్రలో పాజిటివ్ కేసులు 2.37 లక్షలకు చేరగా.. 12,556 మంది ప్రాణాలు కోల్పోయారు. ఏపీలో కరోనా వైరస్ విజృంభణ కొనసాగుతోంది. రోజురోజుకీ రికార్డు స్థాయిలో కేసులు నమోదవుతుండటం ఆందోళన వ్యక్తమవుతోంది. గడిచిన 24 గంటల్లోనే కొత్తగా 6045 పాజిటివ్ కేసులు, 65 మరణాలు నమోదయ్యాయి. తెలంగాణలో కరోనా వైరస్ విజృంభణ కొనసాగుతున్నా.. కోలుకుంటున్నవారి సంఖ్య గణనీయంగా పెరుగుతోంది. గత 14 రోజుల గణాంకాలను పరిశీలిస్తే రోజుకు నమోదవుతున్న కేసులు సుమారు 1200 నుంచి 1600 వరకూ ఉంటుండగా, కరోనా బారినపడి కోలుకుంటున్నవారు కూడా రోజుకు సుమారు 1200 - 2000 మధ్య ఉంది. రాష్ట్రంలో నమోదైన మొత్తం 49,259 కేసుల్లో.. 76 శాతం (37,666) మంది కొవిడ్‌ నుంచి కోలుకున్నారు.
By July 23, 2020 at 08:09AM
No comments