కొనసాగుతోన్న కోవిడ్ ఉద్ధృతి.. దేశంలో 32వేలు దాటిన మరణాలు
మహమ్మారి రోజు రోజుకూ ఉద్ధృతమవుతోంది. దేశవ్యాప్తంగా శనివారం మరో 48,539 కేసులు నమోదు కాగా.. మరో 695 మంది ప్రాణాలు కోల్పోయారు. దీంతో దేశంలో కరోనా వైరస్ కేసుల సంఖ్య 13.85 లక్షలకు చేరింది. ఇప్పటి వరకూ వివిధ కొవిడ్‌ ఆసుపత్రుల్లో 4,67,882 మంది చికిత్స పొందుతుండగా.. 8,85,577 మంది వ్యాధి నుంచి కోలుకుని డిశ్ఛార్జి అయినట్లు కేంద్రం తెలిపింది. దేశంలో కరోనాతో ఇప్పటి వరకు 32,063 మంది ప్రాణాలు కోల్పోయారు. శనివారం 4,42,263 నమూనాలు పరీక్షించినట్టు భారత వైద్య పరిశోధన మండలి (ఐసీఎంఆర్) వెల్లడించింది. ప్రభుత్వ ల్యాబొరేటరీలో 3,62,153, ప్రయివేట్ ల్యాబ్‌లో 79,878 నమూనాలు పరీక్షించారు. మహారాష్ట్రలో అత్యధికంగా 9,251 కొత్త కేసులు.. 257 మరణాలు చోటుచేసుకున్నాయి. మహారాష్ట్ర తర్వాత ఆంధ్రప్రదేశ్‌లోనే అత్యధికంగా 7,888 మందికి కొత్తగా వైరస్ నిర్ధారణ అయ్యింది. తమిళనాడులో రికార్డుస్థాయిలో 6,988 కేసులు బయటపడగా.. కర్ణాటకలో 5,072, ఉత్తరప్రదేశ్‌లో 2,984, బీహార్ 2,803, రాజస్థాన్ 1,120, గుజరాత్ 1,081 కేసులు వెలుగుచూశాయి. మొత్తం 22 రాష్ట్రాలకుగానూ 20 రాష్ట్రంలో మహమ్మారి తీవ్రత అధికంగా ఉంది. జులై నెల ప్రారంభం నుంచి ఈ రాష్ట్రాల్లో పాజిటివ్ కేసులు పెద్ద సంఖ్యలో నమోదవుతున్నాయి. ఢిల్లీలో మాత్రం పాజిటివ్ కేసుల నమోదు 53 శాతం మేర తగ్గింది. ఇక, ఆంధ్రప్రదేశ్‌లో పాజిటివ్ కేసుల పెరుగుదల 8.7 రెట్లుగా ఉంది. జులై 104 మధ్య సగటు 776 కేసులు నమోదు కాగా.. 20-24 నాటికి ఇది 6,783గా ఉంది. ఝార్ఖండ్‌లో 6.6 శాతం, కేరళలో 4.9 శాతం, బిహార్ 4.1 శాతం, బెంగాల్ 3.4 శాతం, పంజాబ్ 3.1 శాతం, యూపీ, కర్ణాటకలో 3 రెట్లు అధికంగా కేసులు నమోదవుతున్నాయి. ప్రస్తుతం దేశంలో కరోనా రికవరీ రేటు దాదాపు 63శాతం ఉండగా మరణాల రేటు 2.35శాతంగా ఉంది. దేశవ్యాప్తంగా తొమ్మిది రాష్ట్రాల్లో కరోనా తీవ్రత అధికంగా ఉన్నట్లు కేంద్ర ఆరోగ్యశాఖ తెలిపింది. తమిళనాడులో కరోనా కేసుల సంఖ్య 2లక్షలు దాటింది. తెలంగాణలో వైరస్ శరవేగంగా విస్తరిస్తోంది. గత మూడు వారాల్లోనే మూడింతలకు పైగా పాజిటివ్ కేసులు నమోదవడం తీవ్రతకు అద్దం పడుతోంది. శనివారం అక్కడ కరోనా కొత్త కేసులు, మరణాలకు సంబంధించి రోజూ ప్రభుత్వం విడుదల చేసే హెల్త్ బులెటిన్ విడుదల కాలేదు. ఈ మేరకు హెల్త్ బులెటిన్ విడుదల చేయనందుకు తెలంగాణ వైద్య ఆరోగ్య శాఖ శనివారం రాత్రి వివరణ ఇచ్చింది.
By July 26, 2020 at 10:42AM
No comments